Samling
DANSK TEKST MANGLER
Politik-ikkut suliniaqatigiiffik ATTAVIITTUT KATTUSSEQATIGIIT |
||
Anthon Frederiksen Upa – 2003/20-01 |
ulloq, 10. marts 2003 |
Arnat angutillu naligiissitaanissaat pillugu Inatsisartut inatsisissaattut siunnersuut.
Arnat angutillu naligiissitaanissaat pillugu inatsisartut inatsisissaattut siunnersuut siullermik inatsisartut 2002-imi ukiakkut ataatsimiinneranni saqqummiunneqaqqaartoq Kattusseqatigiit sinnerlugit taamanikkut saqqummiussimasavut innersuussutigalugit imaattumik oqaaseqassuunga:
Arnat angutillu naligiissitaanissaat pillugu suliniutit tamaasa Kattusseqatigiinni tamakkiisumik malinnaaffigalugillu tapersersorpavut, minnerunngitsumik aamma danskit Naalagaaffiata Nunarput sinnerlugu naalagaaffiit peqatigiit aalajangersagaat 1979-imeersoq; arnanut assigiinngisitsinerit suungaluartulluunniit atorunnaarsinneqarnissaat pillugit suliniutit, Danmark-ip Nunarput sinnerlugu Nunatsinnut atuutussanngortissimasai innersuussutigalugu.
Ukiuni kingullerni aamma arnat assigiinngitsutigut angutinut naleqqersuukkiartornerat soorunami Kattusseqatigiinniit pissusissamisoorluinnartutut isingaarput, taamaattumillu aamma arnat angutillu nalingiinnerusumik sutigut tamatigut atungas-saqartinneqarnissaat soorunami tapersersornartillutigu.
Taamaammat arnat aamma amerlanerusut ataatsimiititaliani sinniisoqarfinni assigisaanilu Inatsisartunit Naalakkersuisuniillu inuttalersorneqartartuni ilaatinneqarnerulernissaat Kattusseqatigiit sinnerlugit inassutigissuara, tassami ullumikkut Nunatsinni suliffeqarfissuit annersaat Namminersornerullutik Oqartussanit pigineqartoq, siulersusoqarnermigullu Naalakkersuisuniit annertuumik oqartussaaffigineqartoq ataasiinnarmilluunniit arnamik aallartitaqartinneqanngimmat, aamma taamaapput suliffeqarfiit allat Namminersornerullutik Oqartussat susassaqarfiisa siulersuisoqarfii, aammalu ataatsimiititaliani aallartitaqarfinnilu ilaasortassanik naalakkersuinikkut toqqartorneqartartuni angutaannangajannik amerlanertigut siulersuisoqarfiit aallartitaqarfiillu naalakkersuisunit inuttaqartinneqartut ilisimaneqarput, taamaattumik Naalakkersuisut suliap matuma piviusunngortinneqarnissaanut timitaleeqataanissamut annertuumik peqataasariaqarput, inatsisissatut siunnersuut tamakkiisumik piviusunngortinneqassappat. Allaammi inatsisartut Siulittaasoqarfialluunniit arnamik ataatsimilluunniit peqataaffigineqanngilaq.
Taamatut oqareerlunga aamma Kattusseqatigiit sinnerlugit oqaatigissuara; soorunami siulersuisoqarfinnut, ataatsimiititalianut allanullu aallartitaqarfinnut aallartitassanik toqqaasarnissani toqqarneqarumaartussat assigiinngitsutigut piginnaasaqarnerat apeqqutaalluinnartartussaassammat, aamma inuiaqatigiinni ingerlatat assigiinngitsut patajaattumik, toqqissisimasumik isumatuumillu ingerlanneqarnissaat qulakkeersimajumallugit.
Naligiisitaaneq eqqartorneqartillugu aamma akissarsianut tunngasut soorunami eqqumaffigisariaqarnerat ilanngullugu Kattusseqatigiit sinnerlugit eqqaasitsissutigissuara, tassami ullumikkut suli suliassaqarfinni assigiinngitsuni akissarsiaqartitsinikkut arnat angutillu assigiinngitsumik pineqarnerat ilaatigut ingerlanneqarmat.
Kisianni soorunami aamma puigortariaqanngilarput arnat angutillu aamma tamarmik immikkut piginnaasaqarmata, qanorluunniit naligiisitsiniaraluaraanni naligiisinneqarsinnaanngitsunik, tamatumanilu pingaartut ilangivaat arnat angutillu aamma ataqqeqatigiillutillu paaseqatigiilluarnikkut suliassanik suungaluartunilluunniit agguataareqatigiissinnaaneq.
Taamatut oqaaseqarlunga suliap aappassaanneerneqannginnerani ataatsimiititaliami susassaqarfiusumik suliarineqarnissaa inassutingaara.