Samling

Ordførerindlæg(IA)-2

MANGLER

Partiit oqaaseqaataat(IA)-2

UPA 2003/30.1+2

     05.03.03

     Kuupik Kleist

Inissiaatileqatigiiffimmik pilersitsinissaq pillugu Inatsisartut peqqussutaata allanngortinneqarneranik Inatsisartut peqqussutissaattut siunnersuut

(Siullermeerneqarnera aappassaaneerneqarneralu)

Siunnersuut manna INI A/S-ip isornartorsiorneqaqqilernerata nalerpiaani saqqummiunneqarpoq. Siunnersuut inissiaatileqatigiiffiup suliassaanik erseqqissaanertut oqaatigineqarpoq, tamannalu ingerlatsinerup pitsanngorsarneqarneranik kinguneqassappat Inuit Ataqatigiit-niit tapersersussavarput.

Minnerunngitsumik Naalakkersuisup oqarneratut tamanna ”attartortunut iluaqutaasumik nuannaarutaasumik” kinguneqartinneqassappat aamma uagut nuannaarutigissavarput.

Ukiarmi pineqartoq una Inatsisartuni sammineqarmat Inuit Ataqatigiit pingaarutilinnik arlalinnik tikkuartuillutillu saqqummiussipput, tamakkulu ilaat massakkut uterfigeqqilaassavakka:

1.  INI A/S-ip ukiut arfineq pingasunngulersut matuma siorna pilersinneqarnerani siunertarineqartut pingaarnerit ilaat tassaavoq attartortut inigisaminnut aningaasartuutinut tunngasunut tamanut oqartussaaqataanissaat pilersaarusioqataanissaallu.

2.  Pisortat tassalu Namminersornerullutik Oqartussat kommunillu ataatsimoorlutik ingerlatsiveqalernissaat taamaalillutillu eqaannerusumik akikinnerusumillu ingerlatsilernissaat aamma siunertaavoq.

3.  Ukiut arlallit sanaartornissamut aserfallatsaaliunermullu pilersaarusiortalernissaq.

4.  Kiisalu nunatsinni inissaaleqinerujussuup akiorniarnerata naammassisaqarfiusumik suleqatigiiffiginissaa siunertat kusanartut ilagaat.

 

Oqassaguma siunertat tamakku ullumikkut anguneqarsimasut, taava erseqqissorsuarmik sallussaanga. Pisartummi assigiinngitsut attartortullu isummersornerisa minnerunngitsumik ulluni kingullerni takutippaat ilaatigut killormut ingerlasoqartoq. INI A/S-ip pilersinneqarnerani siunertat amerlanerit anguneqaqqajarsimanngillat.

Pissutissaqarpoq aperissalluni Naalakkersuisut qulakkeersimaneraat siunnersuut saqqummiunneqartoq ilumut siunertat anguniarnerannut iluaqutaassanersoq?

Apeqqutigisariaqarpoq INI A/S-ip pilersinneqarnerani oqartussaaqataanissamik, akikinnerusumik ingerlatsinissamik attartortunullu iluaqutissanik siunertat matumuuna qanillattorneqassanersut? 

Naalakkersuisup nalunaarutigaa INI A/S-ip allanngortilluinnarneqarnissaanik siunnersuummik ataatsimiinnermi matumani saqqummiussaqarniarluni. Apeqqutigissavara siullermik tamanna immikkoortumi sorlermi Naalakkersuisup saqqummiutilersaarneraa, aappassaanik sooq siunnersuut massakkut eqqartugarput tassunga ilanngutiinnarsimannginneraa kiisalu siunnersuutiginiagaq taanna sunik siunertaqarnersoq?

Neriuppunga apeqqutigisavut Naalakkersuisup akisinnaassagai.

Tamakku oqaatigereerlugit Attaveqaqatigiinnermut Ineqarnermullu Ataatsimiititaliap isumaliutissiissutaat tikillatsiassavara. Ataatsimiititaliap isumaliutissiissutaa isumaqatigaarput tassanilu ineqarnermut akiliutit ukioq manna januarip aallaqqaataaniit kingumoortumik qaffanneqarsimanerat ataatsimiititaliamit avoqqaarliutigineqarmat aamma isumaqatigalugu.

Taamatut pissusissamisuunngitsumik INI A/S-imit iliortoqarsimanera isornartorsiortariaqarpoq, Naalakkersuisullu siunissami assigisaanik pisoqannginnissaa qulakkeertariaqarpaa.

Saqqummiussamut Inuit Ataqatigiit akuersaarlutik taasissapput.