Samling
Qeqertarsuaq, Aasiaat, Qasigiannguit, Ilulissat, Uummannap Upernaviullu Kommuniini aalisartut piniartullu umiatsiaararsortut, umiatsiaarartaarniarnerminni pisortanit tapiiffigineqarsinnaalernissaat siunertaralugu Naalakkersuisut peqquneqarnissaannik Inatsisartut aalajangiiffigisassaattut siunnersuut.
(Inatsisartunut ilaasortaq Ane Hansen, Inuit Ataqatigiit)
Akissuteqaat
(Aalisarnermut, Piniarnermut Nunalerinermullu Naalakkersuisoq)
Siullermeernera
Inuussutissarsiutinut Tapersiisarfimmik aaqqiineq aqqutigalugu, nunatta sinnerani aalisartut piniartullu periarfissaat assigalugit, Qeqertarsuup Tunuaniit avannamut Upernavik ilanngullugu aalisartut piniartullu umiatsiaaqqanik angallatinillu allanik pissarsinissamik periarfissinneqarnissaannik, inatsisartunut ilaasortap siunnersuuteqarneratigut Inatsisartut 2003-mi upernaakkut ataatsimiinneranni kingullermik oqallisigineqarpoq.
Aalisarnermut, piniarnermut nunalerinermullu tapersiisarneq pillugu Inatsisartut peqqussutaat nr. 10. 12. november 2001-imeersup massakkut atuuttuusup § 6 imm. 7-iani aalajangersarneqarpoq Aasiaat, Qasigiannguit, Ilulissat, Qeqertarsuup, Uummannallu kommuuniini Kommuneqarfik Upernavimmilu najugaqartunut umiatsiaaqqanik aquuteralattalinnik pisaarniarlutik qinnuteqartunut tapiissuteqartoqarsinnaanngitsoq.
Killilersuinerni taakkunani siunertat marloqiusaapput, ilaatigut qalerallit aalisapilunneqarsinnaanerinik illersuinissaq ilaatigullu umiatsiaaqqanit piukkunnarnerusunik angallatinik atuinikkut aalisarnerup ineriartortinneqarnissaa. Siunertamut kingullermut pissutaapput aalisarnermi aalisakkanillu tunisassiornermi eqqiluisaarnissamut ilaalu ilanngullugit piumasaqaatit saakkortusiartuinnarnerat.
Taamaattorli Naalakkersuisut ilisimatitsissutigissavaat Aalisarnermut, piniarnermut nunalerinermullu tapersiisarneq pillugu Inatsisartut peqqussutaat nr. 10. 12. november 2001-imeersup taartissaanik Naalakkersuisut ukiami 2006-imi ataatsimiinnissamut peqqussutissamik nutaamik saqqummiussaqalersaarmata.
Tassunga atatillugu Naalakkersuisut aalajangersagaq maanna atuuttoq Aasiaat, Qasigiannguit, Ilulissat, Qeqertarsuup, Uummannallu kommuuniini Kommuneqarfik Upernavimmilu najugaqartunut umiatsiaaqqanik aquuteralattalinnik pisaarniarlutik qinnuteqartunut tapiissuteqartoqarsinnaannginnera peqqussutissami iluarsaanniarpaat.
Pisortat akileeqataaffigisaanik umiatsiaarartaarniarnermi aalajangersakkat massakkut atuuttuusut taarserniarneqarput, aningaasat akuersissutigineqartut killiligaasut iluanni, inuussutissarsiornerup imminut napatissinnaasup ineriartornerata siuarsarnissaanik, piniarnermi inuussutissarsiornermi naammassinnissinnaassutsip imminullu akilersinnaassutsip pitsanngorsarneqarnissaanik piumasaqaatitaqalissalluni, piniarnermi inuussutissarsiornermi suliffissat ungasinnerusoq isigalugu qulakkeerneqarnissaannut, tassungalu atasumik nunagisami amernik neqinillu nioqqutissiornermik tuniniaavinnut qularnaarinninniarnermik peqataassalluni.
Naalakkersuisuttaaq siunnersuutigilersaarpaat pisortat akileeqataaffigisaanik umiatsiaarartaarniarnermi piumasaqaatigineqassasoq umiatsiaaqqap minnerpaamik 16 fodinik annerpaamillu 19 fodinik takissuseqarnissaa.
Naalakkersuisut nalunaarutigissavaat, umiatsiaaqqat ESU atorlugu aningaasalersorneqarneranni isumannaallisaanermik atortut VHF-radio-llu ilaammata, kisiannili umiatsiaaqqat siunissami isumannaallisaanermik atortunik umiatsiaaqqamiititaqarnersut ESU soorunami nakkutilliinissaminut periarfissaqaranilu oqartussaatitaanngimmat.
Aammali siunissami umiatsiaaqqat pisariaqartunik isumannaallisaanermut atortoqartitaasalernissaat pillugu, innersuussutigineqassaaq Inatsisartunut ilaasortamut Isak Davidsen-imut UPA 2005/70-imi Naalakkersuisut akissuteqaataat, tassani akissutigineqarmat Naalakkersuisut siullermik kajumissaaruteqarneq paasisitsiniaanerlu aqqutigalugit innuttaasut sunnerniarniaraat, isummannaatsuunissamullu atatillugu namminneq piumassutsiminnik suliniutinik pisariaqartinneqartunik aamma pisariaqartitanik aningaasaliinissanut suliniuteqartoqartariaqartoq. Taamaattoq Naalakkersuisut suliniutigineqartoq ingerlaavartumik nalilersortassavaat aamma tunuarsimaarfigerusunnagu siunissami inatsisiliornikkut suliniuteqarnissap pisariaqalersinnaanera.
Tamanna tunngavigalugu Naalakkersuisut isumaqarput Inatsisartunut ilaasortap Ane Hansen-ip siunnersuutaata maannakkut akuerineqarnissaa piffissaanngitsoq, taamatullu oqaaseqarlunga innersuussutigissavara Naalakkersuisut ukiami 2006-imi ataatsimiinnissamut peqqussutissamik nutaamik saqqummiussaqalersaarnerat utaqqimaarneqassasoq.