Oqaluuserisassani immikkoortoq 13-2 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ataasinngorneq 26.oktober 1998 nal
14.08
Ataatsimiinnermik
aqutsisoq: Inatsisartut Siulittaasuat Anders Andreassen.
Otto
Steenholdt, Inatsiseqarnermut Ataatsimiititaliap Siulittaasua
Atassut:
Inatsisartut
inatsiseqarnermut Ataatsimiititaliaat ataatsimiissimavoq, tassani
ataatsimiissutigalugu; atortussiassat aatsitassanit pisut pillugit suliniutit
isumagineqarnissaannut ingerlatseqatigiiffik pillugu, Inatsisartut inatsisaata
allanngortinneqarneranik Inatsisartut inatsisissaatut siunnersuut.
Ataatsimeeqataapput:
-Inatsisartunut
ilaasortaq: Otto Steenholdt,
Siulittaasutut,
-Inatsisartuni
ilaasortaq: Laannguaq Lynge, Siumut.
-Inatsisartuni
ilaasortaq: Anders Nielson, Atassut,
-Inatsisartuni
ilaasortaq: Niels Mattaaq, Siumut aamma
-Inatsisartunut
ilaasortaq: Johan Lund Olsen, IA
Siunnersuut
Inatsisartunit siummerlugu suliarineqareermat, Inatsisartut inatsiseqarnermut
Ataatimiititaliaata siunnersuut oqaaseqaatitai ilanngullugit sukumiisumik
misissuataarpaa.
Inatsiseqarnermi
Ataatsimiititaliami amerlanerussuteqartut, tassa Siumut Atassullu Naalakkersuisut
siunnersuutaat tamakkiisumik isumaqatigaat.
Amerlanerussuteqartut
taamaalillutik isumaqatigaat. Nuna Oil A/S-ip sammisai kulbrintiinnarnut
tunngatinneqassasut.
Aammattaaq
amerlanerussuteqartut isumaqarput, aktier-tit ingerlatseqatigiiffimmut
Naalagaaffimmit imaluunniit Namminersornerullutik Oqartussanit tamakkiisumik
pigineqartumut tunniunneqarsinnaalernerisigut suliassaqarfimmut
ilisimasaqarluartumik pissarsisinnaanissamut periarfissamik ammaassisoqartoq.
Amerlanerussuteqartut matumani iluarisimaarlugu oqaatigissavaat. Taamatut
tunniussisinnaalernermut piumasaqaataammat Naalagaaffiup
Namminersornerullutillu Oqartussat isumaqatigiissimanissaat.
Inatsiseqarnermut
Ataatsimiititaliami amerlanerussuteqartut tassalu Siumut Atassullu, matumuuna
inassuteqarput atortussiassat aatsitassanit pisut pillugit suliniutit
isumagineqarnissaannut ingerlatseqatigiiffik pillugu Inatsisartut inatsisaata
allanngortinneqarnerannik Inatsisartut inatsisissaattut siunnersuut, taama
iluseqarluni aappassaaneerlugu suliarineqassasoq.
Ikinnerussuteqartut
Ataatsimiititaliami: Inuit Ataqatigiit, manna oqaatigiumavaat:
IA-p
naapertuuttutut isiginngimmagu- Aatsitassap pillugit inatsimmi isertitarineqartut
agguaanneqartarnerannut tunngaviup saniatigut napasorsuarmik guldtimik
ujaasinermi isertitarineqarsinnaasut selskabimit isumaginnittuusumit
Naalagaaffiup piginneqataaffigiunnaarsimasaanit, sinneqartoorutaasinnaasunik
danskit naalagaaffiata pissarseqataasinnaanera siunnersuummi maannakkutuut
iluseqartumi pinissaa IA-mit isumaqatigineqanngilaq.
Taamatut
ataatsimiititaliaq Inatsisartunut saqqummiissuteqartoq maana oqaatigaara.
Jonathan
Motzfeldt, Naalakkersuisut Siulittaasuat:
Aallarniutigalugu
Inatsisartut qutsavigissavakka 30.september 1998-imi siullermeerinermi
siunnersuut ilassilluarmassuk. Siullermeerinermi aalajangiunneqartut
aatsitassanut tunngasut pillugit siunnersuisoqatigiinni nunatsinniit
ilaasortaatitat inatsisissatut siunnersuutip tunulequtaannik
erseqqinnerusumillu imarisaanik itisilerilluni 02. oktober 1998
ilisimatitsissuteqarfigineqarsimapput, aammalu apeqqutit assigiinngitsut
akiortorneqarlutik.
Inatsiseqarnermut
Ataatsimiititaliami amerlanerussuteqartut Siumup Atassutillu siunnersuummut
isumaqataapput, ikinnerussuteqartulli Inuit Ataqatigiit isumaqataasinnaanatik.
Ikinnerussuteqartoqarluni
oqaaseqartoqarnera ajuusaarutigaara, Naalakkersuisut sinnerlugit oqaaseqaat
immikkut maannarpiaq oqaaseqarfiginagu tusaatissatut tigullugu, kingusinnerusukkulli
erseqqissaateqarsinnaajumaarpunga oqaaseqartoqareerpat.
Aatsitassanut
tunngatillugu pillugit siunnersuisoqatigiinni nunatta ilaasortaatitaanut 02.
oktoberip 1998 ataatsimiinnermi sioqqutsisumik ilisimatitsissutigineqartutut
matumani aappassaaneerinermi Naalakkersuisut allannguutissatut
siunersuuteqarput. Allannguutissatut siunnersuut taassumalu kingunerisaanik
inatsisissatut siunnersuut iluarsisaq akissuteqaammut matumunnga ilanngunneqarput.
Allannguut
taamaallaat piffissamut atortuulersitsiffissamut tunngassuteqarpoq,
inatsisissatut siunnersummi novemberip aallaqqaataani pisussatut oqaatigisamut
Nuna Oil A/S pillugu, danskit inatsisaat inatsisip taamaaqqataa, 01. december
1998-ip missaani aatsaat Folketingimi naammassillugu oqaluuserineqassaaq.
Naatsorsuutigineqarpoq Inatsisartut inatsisaata atortuulerfissaa taamaalilluni
kinguartittariaqartoq.
Taamaaliornikkut
inatsisit taakku marluk ataatsikkoorlutik atortuulersinnaaneqarsinnaaniassammata,
tamannalu siunnersuutigineqartoq pisinnaavoq Inatsisartut inatsisaata qaqugu
atortuulernissaata Naalakkersuisunik aalajangersaaffigineqarneratigut.
Taamatut
oqaaseqarlunga inatsisissatut siunnersuut saqqummiunneqartoq allannguutissatut
siunnersuutip matuma kingunerisaanik ilusilerumaakkanik ilusilerlugu
inaarutaasumik akuersissutigisassanngorlugu
pingajussaaniigassanngortinneqarnissaa Naalakkersuisut sinnerlugit
inassutigaara.
Ruth
Heilmann, Siumup oqaaseqartua:
Atortussiassat
aatsitassanit pisut pillugit maannakkut suliniutit isumagineqarnissaannut
ingerlatseqatigiiffik pillugu, Inatsisartut inatsisaata
allanngortinneqarneranik Inatsisartut inatsisissaattut siunnersuutip
siullermeerneqarnerani oqaatigissavarput Siumumiit oqaaserisavut aalajangiusimagatsigit.
Aappassaaneerneqarneranut Inatsisartut inatsiseqarnermut Ataatsimiititaanut
isumaliutissiissut Siumumiit tusaatissatut tigullugu inatsisissamut
siunnersuutip taamatut isikkoqartillugu pingajussaaneerneqarnissaminut ingerlaqqinnissaa
innersuussutigaarput.
Otto Steenholdt, Atassutip oqaaseqartua:
Ataatsimiititaliap
isumaliutissiissutaa Atassummut oqqunneqarsimavoq, tassanilu Atassut sinnerlugu
imatut oqaaseqassaagut; isumarput allanngortissimanngilarput,
siullermeerneqarmat oqaaserisimasavut aalajangiuppavut. Naalakkersuisullu
inassutigisaa aamma taamatut taperserlugu Atassummiit naatsumik
oqaatigissavarput, taamatut isikkoqarluni ingerlaqqinnissaa Atassutip
akuersaaraa.
Johan Lund Olsen, Inuit Ataqatigiit oqaaseqartuat:
Inuit Ataqatigiit
ajuusaarnartuutipparput naalagaaffik aningaasalersuinngikkaluarluni maanna Nuna
Minerals A/S aqqutigalugu qavani Nanortallip eqqaani Napasorsuarmi
guldtisiorfissami aatsitassarsiortitsinikkut isertitat avitseqatigiissutigineqarnissaasa
qaavatigut selskabip sinneqartoorutigisinnaasaanik inatsit manna aqqutigalugu
aamma pissarsitinneqaqqinnissaa aqqutissiuunneqalermat. Taamaattumik
Inatsisartut inatsiseqarnermut Ataatsimiititaliaata isumaliutissiissutaanni
Inuit Ataqatigiit ikinnerussuteqarluta oqaaseqaaterput kiisalu allannguutissap
matuma siullermeerneqarnerani oqaaserisavut aamma innersuussutigalugit
nalunaarutigissavara kattorna taasinissatsinni akerliulluta taasissamaaratta.
Anthon Frederiksen, Kattusseqatigiit:
Kattusseqatigiinniit suliap
siullermeerneqarnerani oqaaseqaatikka innersuussutigalugit nalunaarutigissavara
ataatsimiititaliami amerlanerussuteqartut taaseqatigissagakkit. Imaanngikkaluarpoq
ilagiissuarnut ilanngukkama, kisianni pissutsit piviusut tunngavingalugit
taamatut taasissaanga.
Jonathan Motzfeldt, Naalakkersuisut Siulittaasuat:
Inuit Ataqatigiit oqaatigisaannut
erseqqissaateqalaarniarpunga akissuteqarlunga. Namminersornerusut aammalu
Naalagaaffiit akornanni isumaqatigiissut Nalunap maannakkut suliffiusup
tungaatigut, Nanortallip Kommunianiittup, erseqqissumik isumaqatigiissumik
tassani peqarpugut. Tassami isumaqatigiissut taanna tunngavigaarput suliassaq
ima aallartereersimatigimmat. Taamaalilluni tassani nalillit arlalippassuit
pissarsiarineqarsinnaallutik. Taammaattumik isumaqatigiissutip taassuma
imarisaa aamma siusinnerusukkut udvalgimi nassuiaataareersimasoq
najoqqutaralugu imaappoq, aningaasartuutit Namminersornerusut
aningaasartuutigisaat 01.januar 1999 sioqqullugu aningaasartuutaasut taakkua
matuneqaqqaarallassasut, tassunga tulliullugit aningaasartuutit 01.januar 1999
sioqqullugu. Taavalu Namminersornerusuni Naalagaaffimmilu ataatsimoorluni
aningaasartuutaasimasut pineqarput. Taavalu aamma eqqarsaatigineqarlutik
isertitassat, taamaalillutik Namminersornerullutik Naalagaaffiullu akornanni
aveqatigiiffissatut isumaqatigiissutigineqarput suliassami tassani.
Erseqqissaatigissavara
Namminersornerullutik Oqartussat Naalagaaffiullu akornanni isertitassat
tungaatigut eqqarsaatigalugit, tassani naligiimmik avitsinissaq pineqanngimmat.
Naligiissumik aviffigeqatigiissut pineqanngimmat. Kisiannili tassani
pineqarlutik aningaasartuutit Naalagaaffiup Namminersornerullutik
Oqartussalluunniit aningaasartuutigisimasaat qanoq annertutiginersut suliassami
tamatumani.
Erseqqissumik oqaatigalugu,
aningaasartuutit Namminersornerullutik aningaasartuutigisimasaat 01.januar 1999
kingornatigut, taava Namminersornerullutik Oqartussat pissarsiassaasa annertunerusumik
kinguneqarnissaannik nassataqartussaapput siunissami isertitassat
eqqarsaatigalugit.
Tamakkua erseqqissaatigaakka
isumaqaratta Namminersornerullutik Oqartussat Naalagaaffiullu akornanni
apeqqummi tassani isumaqatigiissut tunngavigalugu silatusaartumik
naapertuilluartumillu aaqqiisoqarsimasoq.
Johan Lund Olsen, Inuit Ataqatigiit:
Sivitsorsaarusunngikkaluarpunga,
kisianni isumaqarpunga aamma Inuit Ataqatigiinninngaanniik Naalakkersuisut
Siulittaasuannut aamma una oqaatigisariaqarlugu=; Inuit Ataqatigiit matumani ikinnerussuteqarluta
oqaaseqaateqaateqaratta.
Tassa uuminnga patsiseqarpoq;
ilisimaneqartutuut aatsitassat pillugit inatsimmi ' 22 malillugu imaappoq, maani
nunatsinni aatsitassarsiortitsinermi isertitarineqartussani Naalagaaffik nunarpullu
tamarmik 50 %-imik taava avitseqatigiittassasut. Tassa tamarmik 50%-imik
pissarsitinneqartassasut. Kisianniuna uani nutaamik isumaqatigiissusiornermi,
tassalu Nuna Oil A/S-ip aggulunneqarluni aaqqissuussiffigineqarnissaani
Naalagaaffik imatut aamma piumasaqaqqissimasoq, tassalu taanna Naalakkersuisut
aammalu Danmarkimi Avatagiisinut Nukissiuuteqarnermullu Minesterip
08.september atsioqatigiissutigisimavaat imaattoq: Naalagaaffiup - tassa
aatsitassat pillugit inatsimmi ' 22-imi- pissarsiassai taakkua allanngortinngikkaluarlugit taava
qaavatigut qavani Nanortallip eqqaani Napasorsuarmi guldtisiorfissami
naalagaaffik suli aamma qaavatigut suli pissarsinneqaqqittuarnissaa.
Tassa taanna aatsaaginnaq
isumaqatigiissummi uani, Danmarkimi nukissiuuteqarneq pillugu Minesterimik isumaqatigiissuteqarnikkut
taanna aqqutissiuunneqarsimavoq. Taannaavorlu uagut akuersaarsinnaanngisarput,
soormi Naalagaaffiup pissarsiassani, uffa inatsit malillugit qulakkeereerlugit,
taava aamma qaavatigut peqqissava ?
Inatsisissaq una siullermeerneqarmat oqaatigivarput 01.juli aatsitassat pillugit allattoqarfiup maanga nunatsinnut nuunneqarsimaneranut atatillugu matuersaammik tunineqarsimangaluarpugut. Aap, aatsitassat pillugit allattoqarfik tamakkiisoq nunatsinnut nuunneqarmat matuersaat taanna maannakkut pigilernikuuvarput. Kisianni illup iserterfigisatta nerisassaasivianut iseqqusaanngilagut. Paarlattuanilli Naalagaaffiup nerisassaasivimminngaanniit suli arsaartortuarniarpaatigut, taamaattuminguna uagut Inuit Ataqatigiinninngaanniit uani una Naalagaaffik immikkut pineqartuarnissaa akuersaaginnartuarsinnaannginnatsigu akerliulluta taasinialersugut.
Jonathan Motzfeldt, Naalakkersuisut Siulittaasuat:
Tassa oqaatigiinnassavara Inuit Ataqatigiit paasisinnerat uani erseqqilluinnartumik ima ittumik takussutissamik nassuiaateqarfigineqarsimammat ataatsimiititaliaq, nassuiaallu taanna najoqqutaralugu uani takuneqarsinnaasutut januarip aallaqqaataata 1999-ip kingornatigut iluanaaruteqassappata iluanaarutissani taava Nuna Minerals tassani tigusassai, uani maannakkut Grĝnlands Hjemmestyre allagartaqartoq, taakkua soorunami iluanaarutaat najoqqutaralugit alliartuinnartussaasutut anginerusumik isertitaqartussatut naatsorsuutigineqarpoq.
Uani Kalaallit Nunaata Naalagaaffiullu akileraarutitigut aammalu naliginnaasumik akitsuutitigut rċstofimi inatsit najoqqutaralugu isertitassat taakkua inatsisiliaareersut allanngortissinnaanngilagut, maannakkut atuuttut najoqqutaralugit ingerlassaaq. Uanili sinnerani piginnittuuneq kikkut piginnittunertik najoqquttaralugu taava isertitassanik tassani pissarsiaqarnissaat naatsorsuutigineqarpoq.
Tassa soorlu oqaatigereeriga naapertuilluartutut Naalagaaffiup aningaasartuutimigut tassuunakkut aamma matusiffigineqarnissaanik imaqartumik aaqqiinerit isumaqatigiinniarnermi isumagineqarsimapput.
Anders Andreassen, Inatsisartut Siulittaasuat:
Maannalu tassa taasinialissaagut, tassa taasissutigisussaavarput ikinnerussuteqartut oqaaseqaataat, tassa Inatsiseqarnermut Ataatsimiititaliap isumaliutissiissutaani Inuit Ataqatigiit ikinnerussuteqarlutik oqaaseqaataannut isumaqataasut nikueqqussavakka: 6. Akerliusut nikueqqussavakka: 23. Taaseqataanngitsut: 0. Taavalu suliap Inatseqarnermut Ataatsimiititaliap isumaliutissiissutaatut iluseqarluni pingajussaanerinissamut akuersisut nikueqqussavakka: 29. Akerliusut nikueqqussavakka: 0. Taaseqataanngitsut: 0.
Tassa taamaalilluni immikkoortoq 13 pingajussaaneerneqarnissaminut ingerlaqqissaaq.