Oqaluuserisassani immikkoortoq 16-2-2 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Sisamanngorneq
29. oktober 1998 nal. 13.27
Ataatsimiinnermik
aqutsisoq: Anders Andreassen, Inatsisartut Siulittaasuat.
Peter Ostermann, Aningaasaqarnermut Ataaatsimiititaliap siulittaasorigallagaa.
Ilassutitut isumaliutissiissut saqqummiutissavara, taassumap suliarinerani peqataapput:
Siumumiit: Ruth Heilmann Laannguaq Lynge taarserlugu kiisalu Lars Karl Jensen, Atassummiit: Anders Nilsson aamma Peter Ostermann, Inuit Ataqatigiinniit: Josef Motzfeldt.
1998-imut Inatsisartut ilassutitut aningaasaliissutinut inatsisaasa aappaannut siunnersuutip aappassaaneerneqarnissaanut Aningaasaqarnermut Ataatsimiititaliaq isumaliutissiissummik tunniussivoq. 1998-imut Inatsisartut ilassutitut aningaasaliissutinut inatsisaasa aappaannut siunnersuutip aappassaaneerlugu marlunngornermi 27. oktober 1998 ataatsimiittarfimmi oqaluuerineqarnera Inatsisartunit untsinneqarpoq. Tamatuma kingorna Aningaasaqarnermut Ataatsimiititaliaq Takornariaqarnermut, Angallannermut, Niuernermut Attaveqaatinullu Naalakkersuisoq isumasioqatigaa, tamatumalu kingunerisaanik pisariaqalerpoq ilassutitut isumaliutissiissummik matuminnga saqqummiussinissaq.
Inatsisartut ilassutitut aningaasaliissutinut inatsisaasa aappaannut siunnersuummik aappassaaneerinninnermi Inatsisartut ilassutitut aningaasaliissutinut inatsisaasa aappaannut siunnersuummut, Naalakkersuisunit siullermik saqqummiunneqartumut Aningaasaqarnermut Ataatsimiititaliaq isumaliutissiissuummin imaattunik oqaaseqaateqarpoq:
ANaalakkersuisut 1998-imut Inatsisartut ilassutitut aningaasaliissutinut inatsisaasa aappaannut siunnersuutaatigut siunnersuuteqarput aningaasaliissutit 1998-imi 21 mio. kr.-inik qaffaavigineqassasoq, 1998-imi ukiunilu siuliini Kalaallit Nunaanni helikopterit atorlugit timmisartuussisarnermi aningaasartuutit matuneqarnissaannut.
Aallaqqaasiutigalugu Aningaasaqarnermut Ataatsimiiititaliap 1997-imut Inatsisartut ilassutitut aningaasaliissutinut inatsisaannittoq innersuussutigaa, tassuuna oqaatigineqarmat A1996-imi Inatsisartut ukiakkut ataatsimiinneranni Naalakkersuisut, Grønlandsfly A/S isumaqatigiissuteqarfigalugu, suleqatigiissitanik pilersitsipput, Grønlandsfly A/S-imit, Politikikkut Aningaasaqarnikkut Allaffimmit, Aningaasaqarnermut Pisortaqarfimmit aamma Inuussutissarsiutinut, Angallannermut Pilersuinermullu Pisortaqarfimmit ilaasortaaffigineqartumik. Suleqatigiissitap 1996-imut aamma 1997-imut Grønlandsfly A/S-imi naatsorsuutinut missingersuutinullu paasissutissat misissuataassavai, taamaaliornikkut uppernarsiniarlugu 1997-imi nunatsinni timmisartuussinermi konto pingaarneq 70.11.03-mi uppernarsarneqarsinnaasumik pisariaqartitsisoqarnersoq aningaasaliissutit qaffaavigineqarnissaannik, Suliaq tamanna maanna naammassineqarsimalerpoq, nunatsinnilu timmisartuussinermut konto pingaarneq 70.11.03-mi 7 mio. kr.-inik tapiissutit qaffanneqarnissaat qinnutigineqarpoq, taamaaliornikkut 1996-imi tapiissutigineqartut qaffaseqataannik 1997-imi aalajangiusimanninnissaq. Ukiunut missiliuusiorfiusunut aningaasaliissutit qaffaavigeqqullugu qinnueqaateqartoqanngilaq. AIlanngullugugu ilisimatitsissutigineqarpoq taamatut isumaqatigiissuteqartoqarnera Grønlandsfly A/S-imit allakkakkut uppernarsarneqartoq.
Aningaasaqarnermut Ataatsimiititaliamit uparuarneqassaaq Naalakkersuisut suleqatigiissitamik piersitaat ukiut marluunngitsulluunniit qaangiuttut Inatsisartut ilassutitut aningaasaliissutinut inatsisaat matumani pineqartoq atorlugu ukiunut missiliuusiorfiusunut aningaasaleeqqinnissamik pisariaqartitsisoqannginneranik isummereersoq, aningaasaliissut maannakkut 21 mio. kr.-inik qaffaavigineqaqqullugit qinnuteqaateqarmata. Taamatuttaaq takuneqarsinnaavoq Grønlandsfly A/S aningaasanik atoriaannarnik allanik pisariaqartitsivinngitsoq, Grønlandsfly A/S-immi neqeroorutigimmagu 1998-imi tapiissutit qaffaatissaasa, tassa 21 mio. kr.-it aningaasalersorneqarnissaat pisinnaasoq S61-helikopterinik Namminersornerusut pigisaat arlallit Grønlandsfly A/S-imit pisiarineqarnerisigut. Aammattaaq takuuk ataatsimiititaliap konto pingaarneq 20.10.22-mi, Isertitat allat, oqaaseqaatai.
Tunngavik maannakkut pigineqartoq atorlugu Aningaasaqarnermut Ataatsimiititaliaq inassuteqarsinnaanngilaq qaffariaat akuersissutigineqassasoq.@
Inatsisartut ilassutitut aningaasaliissutinut inatsisaasa aappaannut siunnersuutip aappassaaneerlugu Inatsisartunit oqaluuserineqarnerata unitsinneqarnerata kingorna, immikkoortoq 1-imi oqaatigineqartutut Aningaasaqarnermut Ataatsimiititaliap Naalakkersuisuni ilaasortaq susassaqarfimmi tassani akisussaasuusoq isumasioqatigiinnissamut aggersarpaa. Isumasioqatigiinnerup taassuma inerneraa Aningaasaqarnermut Ataatsimiititaliami isumaqatigiittoqarnera. Isumaqatigiinneq taanna pilerpoq, isumasioqatigiinnermi taaneqartumi Naalakkersuisuni ilaasortap aningaasat akuersissutigineqartussatut kissaatineqartut pillugit nassuiaateqaqqinnerata kingorna. Nassuiaanermi tassani Naalakkersuisuni ilaasortaq makkunannga paasissutissiivoq,
1. Angallavinni sinneqartoorutaanngitsumik ingerlanneqartuni kiffartuussinerup pitsaassusaata allanngortinneqannginnissaa akuersissutitigut qulakkeerneqassasoq,
2. Grønlandsfly A/S-ip 1998-imi aningaasartuuteqarneruneranut akuersissutit attuumammata, taamaattumillu Naalakkersuisuni ilaasortap ataatsimiititaliamut qulakkeerinnissutigaa ukioq manna aammalu ukiuni missingesuusiorfiusuni ilassutitut akuersissuteqaqqittoqarnissaa kissaatigalugu qinnuteqaateqaqqittoqassanngitsoq,
3. Grønlandsfly A/S-ip Naalakkersuisuni ilaasortamut oqaatigisimagaa - aningaasat akuersissutigineqanngippata - Grønlandsfly A/S-ip ornitakkanut sinneqartoorutaaffiuneq ajortunut timmisartuussinerminik unitsitsisariaqarnini, tamatumani ilaalluni sikusartunut nioqqutissanik nutaanik pilersuineq, taakkumanngami manna tikillugu pilersuineq Grønlandsfly A/S-imut annaasaqaataasunik taarsiissuteqarfigineqarneq ajorpoq.
Taamaalluni Aningaasaqarnermut Ataatsimiititaliap - Naalakkersuisuni ilaasortap nassuiaateqarnerata kingorna - inassuteqaatigisimasami naliliiffigeqqinnissaa pisariaqarsorisimavaa, taamaattumillu Aningaasaqarnermut Ataatsimiititaliaq isumaqatigiittoq isumaqarpoq qaffaanissaq akuersissutigineqartariaqartoq.
Aningaasaqarnermut Ataatsimiititaliap inassutigaa, isumaliutissiissummi aammalu ilassutitut isumaliutissiissummi matumani inassutigineqartut ilanngullugit, Inatsisartut aningaasaliissutinut inatsisaasa aappaannut siunnersuut pingajussaaneerneqarnissaminut ingerlaqqissasoq.
Daniel Skifte, Aningaasaqarnermut Ineqarnermullu Naalakkersuisoq:
Inatsisartut marlunngornermi oktoberip 27-ani 1998-imut ilassutitut aningaasaliissutinut inatsisissat aappaannut siunnersuut aappassaaneerpaat. Aappassaaneerinninnerli naammassineqanngilaq Inatsisartut Siulittaasuat aalajangermat suliarineqarnera unitsikkallarniarlugu, Naalakkersuisut kontomut pingaarnermut 70.11.03-mut, nunatsinni timmisartuussineq, ilassutitut aningaasaliissutissatut siunnersuutaata nalileqqinneqarnissaanut Aningaasaqarnermut Ataatsimiititaliaq periarfissaqaqqullugu.
Aappassaaneerinninnermik Inatsisartut nangitsinissaannut tunngavissamik Aningaasaqarnermut Ataatsimiititaliaq maanna tapiliussatut isumaliutissiissuteqarpoq.
Aningaasaliisoqarnissaanik qinnuteqaatip akuerineqarnissaanik Aningaasaqarnermut Ataatsimiititaliap isumaqatigiissup kaammattuuteqarnera Naalakkersuisut naammagisimaarlugu paasivaat. Aningaasaqarnermut Ataatsimiititaliap suliamik nalileeqqinneqarneranut atatillugu Angallannermut Naalakkersuisoq isumasioqatigineqarpoq, tassanilu qinnuteqarnermut pissutaasut itisilerlugit.
Tamakku saniatigut aappassaaneerinninnerup maanna naammassineqarnissaanik kiisalu Naalakkersuisut allannguutissatut siunnersuutaasa akuerineqarnissaannik Naalakkersuisut kissaateqarnerat oqaatigissavara.
Lars Karl Jensen, Siumup oqaaseqartua:
1998-imut Inatsisartut ilassutitut aningaasaliissutinut inatsisaasa aappaannut siunnersuut kingullermik oqaluuserigatsigu, Siumumiit pingaartillugu oqaatigaarput silaannakkut ilaasunik kiffartuussilluni angallassinerup ajornerulernissaa kissaatiginngilluinnaripput.
Siumumiit oqaatiginngitsoorusunngilarput nuannaarutigigatsigu suliassaq manna, tassalu silaannakkut ilaasunik nioqqutissanillu angallassinermi aningaasartuutinut tapiissuteqarnissaq paaseqatigiiffiusumik inassutigineqarmat, taamaalilluni illoqarfiit Maniitsoq Paamiullu aammalu nunaqarfiit anginerusut allallu sikusartumiittut maannakkut silaannakkut angallannermi pitsanngorsaavigineqassammata.
Ataatsimiititaliamit aningaasaliissutit sumut atorneqarnissaannik nassuiaatigineqartut, maannakkut angallannerup aaqqisuganeranut attuumalluinnartutut paasillugit Siumumit 1998-imi silaannakkut angallassinermut atorneqartussanik Naalakkersuisut aningaasaliissutinik qaffaanissamik qinnuteqaat Siumumiit akuersissutigaagut.
Siumumit taamatut naatsumik oqaaseqarluta, matumani isumaliutissiissummi inassutigineqartut ilanngullugit suliassap pingajussaaneernissaanut ingerlaqqinnissaa inassutigaarput.
Anders Nilsson, Atassutip oqaaseqartua:
Atassumminngaanniit ilassutitut
isumaliutissiissummi inassutigineqartut taperserpavut.
Josef Motzfeldt, Inuit Ataqatigiit oqaaseqartuat:
Aningaasaqarnermut
Ataatsimiititaliap ilassutitut isumaliutissiissutaa oqaaseqarfigitinnagu, Inuit
Ataqatigiinnit oqaluuserisaq manna marlunngormat unitsinneqartinnagu partiinit
allanit Naalakkersuisunillu oqaaserineqartut oqaaseqarfigeqqaalaarniarpavut.
Siullermik Aningaasaqarnermut
Naalakkersuisup partiinit oqaaserineqartunut akissuteqarnermini oqaaserisai
oqaaseqarfiginngitsoortariaqarnagit misigisimavugut.
Nunatta aningaasaqarnikkut
inissisimanerata ernumanartoqannginneranut uppernarsaaniarluni
Naalakkersuisunut ilaasortap angakkuartartutullusooq pappialaq suugaluarnersoq
oqaluttarfimmit maannga nittarteqattaarpaa. Taamaliornerminut atatillugu
Naalakkersuisunut ilaasortap ajornannginaariniarluinnaqqissaarluni nunatta
aningaasaqarnerani ullumikkut pissutsit qinigaaffiullu siuliani pissusiusimasut
sanilliunniarsarigaluarpai.
Taamaattoq
maluginianngitsuunngilarput taama assersuussiniarnermini paasissutissat marlussuinnaagaluarlutik
pingaaruteqarluinnartut qaangiataaginnarai. Nunanut allanut akiitsunut aammalu
landskarsip tigoriaannartut aningaasaatigisaannut tunngasuupput.
1990-ikkut aallartinneranni KNI-mik
allanngortitereqqinneq aningaasartornarsimaqaaq, 100 millionilikkaartunik
tigoriaannartut sillimmatinut ilanngartuutaaqisumik.
Qinigaaffimmili matumani
eqqaamasariaqarpoq Namminersornerullutik Oqartussat selskabiutaasa
pingaarnertut marluusut aningaaserivinni erniakinnerusunik attartornermigut
landskarsimut akiitsuminnik akiliigasuarsimanerat. Aningaasat tamatumuuna
landskarsimut nakkartinneqartut 600 mio. kr.-it qaangersimavaat, KNI-mit Tele
Greenland A/S-imillu pisuullutik.
Ullumikkulli aningaasatigut
inissisimanerup ernumanartoqarneranut pissutigisariaqakkat
ilaginngitsuunngilaat, illuutinut allanullu nutarterinissanut pisariaqartitatut
Naalakkersuisunit nalunaarsorneqarsimasut ullumikkumut suli
aningaasassaqartinneqanngitsut, 1,2 mia. kr.-it angullugit
atuiffiusariaqarumaartut, meeqqerivinnut sanasariaqakkanut
aningaasaliuneqartariaqartut suli amigaatigaagut, meeqqammi ullumikkut
inissaminnik utaqqisut 1.400-t missaannimmata, soorlumi aamma avammut
nioqqusiarisakkatta nalingi qaffakkiartorunnaarsimasut.
Siuliani taagoriikkatta saniatigut
Inuit Ataqatigiit ernumassuteqarnitsinnut pingaarnertut tunngavigaarput,
landskarsip aningaasaataannik pilersaarusiugaarpasinngitsunik atuisariaqarnertut
Naalakkersuisunit tassanngaannaq saqqummiussaqartarneq.
Paamiuni inissiat inoqanngitsut
pillugit marloqiusamik aningaasartuuteqarnertut taallugu
anersaaruluuteqarpugut, Naalakkersuisut tamanna siunnerfeqarnerusumik qanoq
iliuuseqarfigiumanngikkaat oqarluta, soorlu innuttaasut illoqarfinnut allanut
ntsertariaqartutut misigisimanerannut, nutsertuarnerannullu,
unikaallatsitsisinnaasunik qanoq iliuuseqarniannginnerarlugit. Taamami
nutsertoqarnerata kinguneraa illoqarfinni nutserfiusuni inissaaleqisorpassuit
amerliartuinnarnerat. Tamatumunnga Naalakkersuisunut ilaasortap akissuteqaataa
tupaallannarpoq, ajornartorsiutip annertussusaanut
paasinnissimanngisaannarneranut ersiutaanerugamik.
Naalakkersuisunut ilaasortap
Inatsisartunut inuiaqatigiinnullu tuppallersaataasinnaasorisamisut oqaatigaa,
inissiat Paamiuni inoqanngitsut aningaasartuutaanerat Namminersornerullutik
Oqartussat kisimiillutik akilersunngikkaat. Ilamigooq kommuni aamma
akileeqataasarpoq!!
Naalakkersuisut maani allaffeqarfissuarminni
ingerlatsinermut aningaasartuuterpassuarnik annikillileriniarsinnaanermut
piumassuseqannginnerarlugit uparuaanitsinnut, Aningaasaqarnermut
Naalakkersuisoq isumaqarpoq atorfinitsitsisarnerup unitsinneqarnera
oqaatigiinnaruniuk tamanna nassuiaataasoq naammattoq. Manna iluatsillugu
ilanngullugu Inuit Ataqatigiit eqqaasitsissutigerusuppaat Aningaasaqarnermut
Naalakkersuisup nammineerluni ingerlatsinermut aningaasartuutit
qaffasippallaarnerat siusinnerusukkut uparuaaffigereersimammagu. Tamanna pivoq
1999-imut aningaasanut inatsisissatut Naalakkersuisut siunnersuutaat
tusagassiorfinnut saqqummiukkamiuk.
1999-imut aningaasanut
inatsisissatut siunnersuut siullermeerlugu oqaluuserineranili Inuit Ataqatigiit
siunnersuutigaat atorfinitsitsiortorneq unitsinneqaannarani siunnerfeqartumik
annikillileriffigineqartariaqalersoq.
Aap, tassami Naalakersuisut
atorfinitsitsiortorneq unitsereersimalerpaat. Tamatumali sumut qanorlu
atorneqartariaqarnera Naalakkersuisut suli isumaqarfigisimannginnamikku, Inatsisartunut
isumaliumminnik sumininnguamilluunniit saqqummiussaqanngillat. Tassa
pierlsaarusiugaanngitsumik eqqaariutaa qanoq iliuusaasartut
ilagiinnarsimanerpaat?
Maannalu aappassaaneerinninnerup
kipitinneqannginnerani Atassutip oqaaseqartuata oqaasiissa ilai
oqaaseqarfigilaassavagut. Aningaasaqarnermut Ataatsimiititaliap
arlaleriartarlugit siusinnerusukkut ujartortagai, ineqarnermut meeqqanut
tapiissutit aammalu boligsikringitut tunniunneqartartut kattutsinneqarnissaat
Atassutip oqaaseqartuata ujartuiffigai. Tamatuma aaqqiiffigineqartariaqarnera
Inuit Ataqatigiinni ukiuni amerlasuuni sorsuutigereersimallugu
nuannaarutigaarput ullumikkut Atassut tamatumunnga toqqaannartumik
peqataalersimammat. Inuit Ataqatigiit isumaqarput tapiissutaasartut taakku kattunneqarnerisigut
isertitakinnerusut akunnattumillu isertitaqartartut malunnaateqartumik
oqilisaaffigineqarsinnaasut, isertitaqqortunerpaallu ineqarnermut meeqqanut
tapiiffigineqartarnerat atorunnaarsinneqartariaqartoq. Tamatumunngalu
atatillugu isumaqarpugut pisartagaqarnissamut isertitatigut 128.000 kr.-it
ullumikkumut killigitinneqartoq assersuutigalugu 200.000 kr.-inut
qaffanneqartariaqartoq.
Ulluni kingullerpiani paasissutissat
allaganngorlugit Naalakkersuisunit pissarsiarisimasagut najoqqutaralugit
Naalakkersuisut kiisami tamanna qanoq iliuuseqarfiginiarlugu suleqatigiissitaliulersaalersimasut
paasinarpoq. Naalakkersuisullu naatsorsuutigaat suleqatigiissitaliarilersaagartik
ineqarnermut tapiissutaasartut iluarsaanneqarnissaannut siunnersuumminnik
saqqummiussaqareeriarpata iluarsaaqqinissamut naalakkersuinikkut
isummertoqarsinnaalissasoq taavalu pissutsit nutaat 1. januar 2000
atuutsinneqalersinnaassallutik.
Helikopterinut S61-inut tunngasoq
suliap matuma untsinneqarallarneranut pissutaarpiartoq Aningaasaqarnermut
Ataatsimiititaliamit suliareqqinneqarsimavoq ilaatigut Angallannermut
Naalakkersuisumik isumasioqateqarnikkut.
Suliamut aama tassunga tunngatillugu
Inuit Ataqatigiit ajuusaarutigeqqissavaat piffissaq taama sivikitsigisoq
atorlugu apeqqutit taamaattut aalajangiiffigineqartariaqarnerat,
annertunerusumimmi misissuinissamut Inatsisartuni partiit
piffissaqartinneqanngilagut.
Taamaakkaluartoq Inuit
Ataqatigiinnit oqaatigiinnassavarput neriuutigigatsigu aalajangiinissatsigut
matumuuna Namminersornerullutik Oqartussat pigisaasa Namminersornerullutik
Oqartussanut, taamalu inuiaqatigiinnut, isumannaannerpaamik
illersorneqarsinnaasumillu naammassineqarsimanissaat
peqataaffigisimassagipput.
Tamakkiisumik oqaatigissagutsigu Inuit
Ataqatigiit ajuusaarutigaat, ilaasutitut aningaasaliissutissanut inatsisissap
aammalu 1999-imut aningaasanut inatsisissap suliarineqarneri taamannak
torinngitsigisorujussuarmik suliarineqartariaqarsimanerat pisariaqarsimammata.
Inatsisissatut siunnersuutit amigarluinnartumik piareersarneqarsimanerattut
taaneqartariaqartoq tamatumunnga pissutaalluinnarpoq.
Aasianni Inuusuttut Inaata
matuniarneqarneranut siunnersuutip nangillugu KANUKOKA-mit Inatsisartullu
Isumaginninnermut Suliffissaqartitsinermullu Ataatsimiititaliaanit
peqataaffigineqartumik suliarineqarnissaa Aningaasaqarnermut
Ataatsimiititaliap inassutigaa.
Tassunga tunngatillugu Inuit
Ataqatigiit erseqqissaassutigissallugu pingaartippaat, inuusuttut matumani
pineqartut isumagineqarfissaannik inissiiniarnerni illoqarfiit mikinerusut
inissiivigineqartarnissaata salliutinneqarnissaat illoqarfissuarnut pinnagit.
Taamatullu oqaaseqarluta
Aningaasaqarnermut Ataatsimiititaliap ilassutitut isumaliutissiissutaa
akuersaarparput.
Anthon Frederiksen, Kattusseqatigiit:
Inatsisartut 1998-imut ilassutitut
aningaasaliissutinut inatsissaata aappaata siullermeerneqarluni
oqaluuserineqarnerani oqaaseqaatikka innersuussutigeqqissavakka
Naalakkersuisut aningaasaqarnikkut sukangasuumik
ingerlatsinerarlutik oqartarnerat timitaqanngitsoq Aningaasaqarnermut
Ataatsimiititaliamit oqaatigineqartoq uppernarsarneqareerpoq, tamannalu suliap
siullermeerneqarnerani sakkortuumik aamma uanga uparujuarsimavara.
Erseqqissaassutigissavara suliap
siullermeerneqarnerani oqaaseqaatinni oqaaseqaatikka imaattut
aalajangiusimagakkit, aningaasaqarnikkut ingerlatsinerup sukangasuumik
aqunneqarnera Naalakkersuisut oqartarnerat sakkortuumik
illuatungilertariaqarpara. Taamaammat Aningaasaqarnermut Ataatsimiititaliap
assersuutitut oqaatigisaa, tassalu Peqqinnissaqarfimmi piviusorsiunngitsumik
pilersaarusiortoqartarnera akueriinnarneqarsinnaanngitsoq tapersertariaqarpoq,
tassami ukioq 2000 tamatta peqqissuussagut HIV-imik tunillatsittartut,
toberkulosertut suliaritinniarlutillu utaqqisorpassuit allallu
amerligaluttuinnartut suliaritittussaasut pilersaarusiorneri piviusorsiortumik
pissutsinullu piviusunut naapertuuttumik piumassuseqartumik suliarineqartariaqarput.
Kiisalu Peqqinnissaqarfiup ingerlanerliorneranut
tunngatillugu ilaatigut Kattusseqatigiit sinnerlugit sakkortuumik
uparuaatiginiakkakka eqqortunik tunngaveqartut erseqqissaassutigissavara.
Tamanna pillugu Peqqinnissamut Naalakkersuisup akerartuinerarlunga
tusagassiutitigut saqqummiussaqarnera akuersaarsinnaanngilluinnarakku.
Politikeriussagaannimi isornartorsiorneqarsinnaaneq
akuersaarneqarsinnaasariaqarpoq aammalu isornartorsiuineq inuiaqatigiinni
pitsaanerpaamik sullissinissamut tunngavilersuutaasarmat.
Taamaammat aamma 1999-imi Inatsisartut
upernaakkut ataatsimiinnissaanni Naalakkersuisut nassuiaateqarnissaannik
Aningaasaqarnermut Ataatsimiititaliap inassuteqaataa Kattusseqatigiinniik
tamakkiisumik taperserpara. Tassami upernaaq ataatsimiinnitsinni ilassutitut
aningaasaliissutitut siullermut naleqqiullugu 45 mio. kr.-ingajannik
ingerlatsinermut sanaartornermullu angusassap ajorseriaqqinnissaa
imaannaanngitsoq nalilertariaqarpoq, minnerunngitsumik landskarsip 1996-imiit
aningaasat tigoriaannaat pigisai 600 mio. kr.-it missaani ikileriarsimanerat
eqqarsaatigalugu. Taamaammat Aningaasaqarnermut Ataatsimiititaliap
mianersoqusinera pissusissamisoorluinnarpoq.
Nalunngilluinnarparpummi nunatta
karsiata isertittagaasa amerlanersaat suminngaanniit pineqartartut,
taamaattumik tupinnanngilluinnartumik akitsuutitigut tassanngaannaq qaffaasoqartarnissaa
aamma siunissami pinngitsoorsinnaanngitsoq qularutissaanngilaq. Aammalu
tamatuma sunniutipilugisartagassai inuiaqatigiinnut
naatsorsuutigineqarsinnaassapput. Nunattami karsiata pisinnaasai nammassinaasaalu
sinnerlugit iliuuseqartoqarsinnaanngilaq.
Naalakkersuisut Inatsisartunut
inatsisissamut matumunnga qinnuteqaataasa ilai maanna
suliarineqareersimalerput.
S61-inullu tunngatillugu
qularnanngilaq kalaallip tamatta immaqami amerlanerpaat isumaqarsimapput,
S61-it Grønlandsfly-p pigisarisai pigigai. Aammami taamaattariaqarpoq.
Taamaattumik naalakkersuinikkut kukkuneq qangarsuarli
iluarsineqarsimassagaluartoq aatsaat maannakkut iluarsiniarneqalernera
naatsorsuutinik kusassaanerinnartut Naalakkersuisullu tiimiminni
sinissimanerattut nalilertariaqarpoq, imaaliallaannaq
akuersaarneqarsinnaanngitsoq.
Kisianni suliap aappassaaneerlugu
unitsikkallarnerata kinguneranik Aningaasaqarnermut Ataatsimiititaliamut
Naalakkersuisuimit isumasiuereernerata kingorna paasinarpoq maannakkut
qinnuteqaatigineqartut akuersissutigineqanngippata ilaatigut kommuneqarfiit
avannaani sikusartumiittut timmisartuussinikkut eqqornerlunneqartussaasut. Naak
illuatungaatigut oqaluttoqaraluartoq billetsinngooq akikillissapput,
S61-inngooq atorunnaalerput, naak tamakku neriorsuutit? Taamaammat pissutsit
taamaakkallartillugit oqartariaqarpugut oqaaseq nuanngikkaluartoq, allatut
ajornartumik qinnuteqaatigineqartut akuersaartariaqaratsigit Inatsisartuni
pissusissamisuuginnartussaassaaq.
Kiisalu suluusalinnut
mittarfiliortiternut tunngatillugu paatsoorneqarsinnaanngilluinnarpoq suliat
kinguartiterneqalernerat, taamaattumik siusinnerusukkut inimi maani
oqaatigisarsimasakka oqaatigeqqittariaqarpakka, tassalu: Aanersaaq kajumikkaluarpoq uinilli sanngiippoq@, tassa nassuerutigisariaqartoq
ersarilluinnartoq oqaatigiuartagara oqaatsinut issuakkannut assersuunneqarsinnaasoq
imaalillugu, politikerit piumagaluaqaagut kisiannili karsip imai
naammaqqajanngillat.
Taamatut naatsumik oqaaseqarlunga
Aningaasaqarnermut Ataatsimiititaliap ilassutitut isumaliutissiissutaa allatut
ajornartumik akuerisariaqassaaq.
Anders Andreassen, Inatsisartut Siulittaasuat:
Kissaatigissavara ajornanngippat
maani ilaasortat imminnut akisaqattaannerat pinaveersaaqqullugu,
oqariartuutillu pitsaasut kalaallinut inuiaqatigiinnut sammitinneroqqullugit.
Aamma kissaatigissavara upperisarsiornermi upperisamut atatillugu oqaatsit
atorneqartut, maani inimi aamma politikimut saatillugit atornaveersaaqqullugit.
Daniel Skifte, Aningaasaqarnermut Ineqarnermullu
Naalakkersuisoq:
Qujanaq, siullermik partiit
oqaaseqartuinut tamanut. Isumaqatigilluinnartumut qujavunga, taamaattumik
Inatsisartut Siulittaasuat ataqqinartoq kaammattuuteqarmat, taanna naalassavara
taavalu oqaannassallunga, partiit ataasiakkaat oqaaseqarfigissamaaraluarakkit.
Kisianni Siumut oqarpoq isumaqatigiippugut, Atassut oqarpoq isumaqatigiippugut, Inuit Ataqatigiit oqarpoq, naggataatigut isumaqatigiippugut, Kattusseqatigiit aamma taamatut oqarput.
Taamaattumik isumaqatigiinneqarpoq, aningaasaatitsinnik sipaarniaraluarnitsinni immaqa oqaaserpassuit sipaartuugutsigit taava angusassaq ajornannginnerusoq angussagaluarparput, taamaalillunga oqassaanga pingajussaaneerneqarnissaanut ingerlaqqinnissaa kaammattuutigaara.
Josef Motzfeldt, Inuit Ataqatigiit oqaaseqartuat:
Minnerunngitsuminguna nutserisunut utoqqatsissutiginiarlugu Inuit Ataqatigiit oqaluuserisamut matumunnga atatillugu oqaaseqarnitsinni nutsernera marlunngormat atorsimasarput ilanngullugu kakkiunneqarsimammat, ullumilu oqaatsitta nutserneqarnera ilanngunneqarsimanngimmat, massakkut agguaanneqassaaq, utoqqatserpugut.
Anders Andreassen, Inatsisartut Siulittaasuat:
Taavalu maannakkut taasisariaqalissaagut, tassalu Aningaasaqarnermut Ataatsimiititaliap isumaliutissiissutaatut iluseqarluni pingajussaaneerneqarnissaanut suliamut matumunnga akuersisut nikueqqussavakka: 30, tassalu isersimasut tamarmik, akerliusoqaranilu taasinngitsoortoqanngilaq, taamalilluni tassa immikkoortoq 16 aningaasanut inatsisissap aappaannut siunnersuut ingerlaqqissaaq pingajussaaneernissaminut.
Oqaluuserisaq naammassivoq.