Oqaluuserisassani immikkoortoq 15-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Pingasunngorneq 6. oktober 1999
Ataatsimiinnermik aqutsisoq: Anders Andreassen, Siulittaasoqarfimmi ilaasortaq, Siumut.
Josef Tuusi Motzfeldt, Aningaasaqarnermut Niuernermullu Naalakkersuisoq:
Naalakkersuisut sinnerlugit matumuuna 1999-imut Inatsisartut ilassutitut aningaasaliissutinut inatsisaasa aappassaattut siunnersuut saqqummiutissavara.
Inatsisissamut siunnersuut imaqarpoq aningaasaliissutit, oqaasertaliussat tjenestemanditullu atorfiit allanngortinneqarnerinik.
Inatsisissatut siunnersuutip ataatsimut inerneratigut takuneqarsinnaavoq ukioq manna 1.622.000 kr.-inik pitsanngoriaateqartoqassasoq, inatsisissatut siunnersuut akuerineqassappat, taamaalillunilu Ingerlatsinermut, Sanaartornermut Taarsigassarsisitsisarnermullu missingersuutini amigartoorutit upernaaq 53.534.000 kr.-ininut inissinneqarsimasut appartinneqassapput 51.912.000 kr.-inorlugit.
Ilassutitut aningaasaliissutinut inatsisissat aappaattut siunnersuutip imarisai naatsumik oqaatigalugit tassaapput:
Siullermik;
aappaattut;
pingajuattullu;
Aningaasartuuteqarnerunissamik pisariaqartitsineq minnerunngitsumik pissuteqarpoq ingerlatsinermut aningaasartuutit - pingaartumik peqqinnissaqarfimmi - amerliartuinnarnerannik. Tamatumunnga katillugit 30 mio. kr.-it missaannik ilassutitut aningaasaliisoqarnissaa qinnutigineqarpoq. Naalakkersuisullu 2000-imut Aningaasanut inatsisissamut siunnersuutaanni taamatut qaffariaateqartoqarnissaa sillimmartaarfigineqareersimavoq. Peqqinnissamut tunngassuteqartuni pisariaqartitat annertunerulernerannut pingaartumik pissutaavoq ilaatigut sulisoqarniarnikkut ajornartorsiuteqarnerup malitsigisaanik Danmarkimut katsorsartikkiartorlugit aallartinneqartartut amerleriarujussuarnerat.
Namminersornerullutik Oqartussat missingersuutaat pillugit Inatsisartut inatsisissaattut Naalakkersuisut siunnersuutaanni, ippassaq maani sammineqartumi aamma takuneqarsinnaasutut, aningaasaqarniarnikkut aqutsinerup nakkutiginerunissaa Naalakkersuisut siunnersuutigaat. Tamatuma ilaatigut kingunerissavaa inatsit atuustilersinneqariarpat ukiumi aningaasaliiviusumi pineqartumi ilassutitut aningaasaliissutinut inatsisissatut siunnersuutinik saqqummiussisoqartarunnaarnera.
Isertitanut matumani inatsissami ilanngunneqartunut tunngatillugu naammagisimaarnarpoq, akileraarutitigut akitsuutitigullu isertitat suli amerliartormata. Qaffariaatikkut tassuuna takuneqarsinnaavoq ilaatigut pissutsit pitsanngoriartortut inuiaqatigiinni ingerlatat naammaginartumik annertusiartornerisigut. Ukioq manna akuersissutit katillugit isertitat 39,5 mio. kr.-inik qaffanneqarnissaat qinnutigineqarpoq. Ukiuni missingersuusiorfiusuni sunniutaasussat 2000-imut Aningaasanut inatsisissamut siunnersuutip oqaluuserineqarneranut atatillugu erseqqinnerusumik naliliivigineqassapput.
Aningaasartuutinullu tunngatillugu siunnersuutit ilarpassui teknikikkut iluarsiinerupput, tamatumani pineqarlutik assersuutigalugu kontut sanaartugassalluunniit akornanni, missingersuutinut sunniuteqanngitsumik nikerartitsinerit. Allanngortitsinissanik siunnersuutinut ataasiakkaanut tunngatillugu missingersuutinut ilanngussat innersuussutigaakka. Allanngortitsinerilli annertunerusut tulliullugit naatsumik oqaaseqarfigissavakka.
Allaffissornikkut aqutsinermut aningaasaliiffimmi missingersuutinik ammut iluarsiissutissat sinneruttut 12,4 mio. kr.-iusut timitalerneqassapput.
Qarasaasiaqarfimmi ingerlatsinermut aningaasartuuteqarnerunissamut matusissutissatut 5 mio. kr.-it qinnutigineqarput, ilaatigut qarasaasiat atorlugit attaveqarnermut aqqutit ingerlanneqarnerisa kingunerisaanik, kiisalu suliassaqarfiup aaqqissuuteqqinneqarneranut atugassat. Suliaq Inatsisartut Aningaasaqarnermut ataatsimiititaliaannut immikkut saqqummiunneqareerpoq.
Isumaginninnermut tunngasuni Nunat Avannarliit akornanni isumaqatigissut malillugu pensionisianut aningaasaliissutit 1 mio. kr.-inik qaffanneqarnissaat qinnutigineqarpoq.
Meeqqat atuarfiannut tunngasuni Ilinniarfissuarmi ingerlatat nukittorsarneqarnissaat siunertaralugu missingersuutinut sunniuteqanngitsumik allanngortitsisoqassaaq, tamatumali saniatigut annertusisamik immikkut atuartitsinermut 3 mio. kr.-luinnangajannik qinnuteqartoqarluni. Ilisimatusarfimmut aningaasaliissutit 860.000 kr.-inik qaffanneqarnissaat qinnutigineqarportaaq.
Sanaartornermut tunngasuni nutarterinissanut aningaasaliissutinit atugassanngortitsisoqarnissaa assigiinngitsunillu missingersuutinut sunniuteqanngitsunik nikerartitsisoqarnissaa qinnutigineqarput. Sanaartugassanut aningaasaliissutit tamarmiusut 1999-imi 773 mio. kr.-it missaanniipput. Tassa sanaartugassat 773 mio. kr.it missaani ukiormanna aningaasaliivigineqarsimapput. Missingersuutinik ammut iluarsiinerit tamarmiusut nangittumik 129 mio. kr.-iumata, upernaaq aalajangerneqartutut, ilanngaatissat ilanngaatigereerlugit sanaartukkanut aningaasaliissutit 644 mio. kr.-it missaanniipput. Missingersuutinik ammut iluarsiissutinik piviusunngortitsinissanik siunnersuuteqarnissartik Naalakkersuisut pissutissaqarsorinngilaat, ataatsimummi isigalugu ammut iluarsiissutissaareersut ukiup naatsorsiuffiup naanerani naammassineqarsinnaasunut naapertuuttumik annertussuseqartussatut aalajangiiffigineqareersimammata.
Ilassutitut aningaasaliissutinut inatsisissat aappaattut siunnersuutip ilanngullugu kingunerissavaa Ingerlatsinermut sillimmatit 6.661.000 kr.-inik amerlassuseqarnissaat, tassa ingerlatsinermut sillimmatit. Missingersuusiortarnermut teknikikkut sillimmatit 30 mio. kr.-inik aningaasartaqassapput - ukiup sinneranut, kontumut aningaasaliissutit 7 mio. kr.-it missaannik ikilisinneqarnissaat siunnersuutigineqarmat. Missingersuusiortarnermut teknikikkut sillimmatit sumut atorneqarsinnaanerat inatsissatut siunnersuummut matumani saqqummiunnerqartumi missingersuutinut ilanngussami allaaserineqarsimasut takuneqarsinnaapput.
Ingerlatsinermut, Sanaartornermut Taarsigassarsisitsisarnermullu missingersuutit inernerinut ataatsimut sunniutaasussaq oqaatigeriikkattut tassaassaaq 1.622.000 kr.-inik pitsanngoriaateqarneq, taamaalillunilu 1999-imi katillugit amigartoorutissat 51.912.000 kr.-iussallutik.
Ilassutitut aningaasaliissutinut inatsisissat aappaattut siunnersuummi aningaasaliissutit allan-ngortinneqarnissaannik siunnersuutit saniatigut, oqaasertaliussassatut siunnersuutit, ilanngussaq 2-mi takuneqarsinnaapput.
Taamatut oqaaseqarlunga siunnersuut Inatsisartunut oqallisigisassanngortippara kaammattuutigissallugulu oqallisigineqareerpat Inatsisartut Aningaasaqarnermut Ataatsimiititaliaanni suliassanngortinneqassasoq.
Per Berthelsen, Siumup oqaaseqartua:
1999-imut Inatsisartut ilassutitut aningaasaliissutitut inatsisaasa aappassaattut siunnersuutaannut atatillugu Siumumiit makku taajumavagut:
Aallaqqaataasumilli taareerumavarput ajuusaarutigigatsigu ingerlatsinermut aningaasartuutit minnerunngitsumik peqqinnissaqarfimmut atatillugu qaffakkiartuinnarnerat.
Siumumimmi tamanna eqqumalluinnartariaqartutut nalilerparput, inassutigissavarpullu tamatuma iluani piaartumik nalilersuisoqarnissaa, sapinngisamillu sukkangasuumik aningaasartuutitigut aqutsinikkut apparsaatissanik aqqutissiuussiniartoqarnissaaq.
Angusariaqarparput tutsuiginartumik missigersuusiorneq, pilersaarusiorsinnaanerlu. Siumumiit naluunngilarput peqqinnissaqarfiup ingerlanniarnera imaannaanngitsuusoq. Siusinnerusukkullu oqaatiginikuuarput, peqqinnissaqarfiup iluani paasinnilluta eqaatsumik nalilersuisarnissaq peqataaffigiumallugu. Kisiannili isumaqarpugut pissusissamisoortoq oqaatigissallugu aamma naak, eqaatsumik nalilersuijumassuseq pigigaluarutsiguluunniit soorunalimi aamma killeqartitsinissaq pisariaqassammat.
Isertitat eqqarsaatigalugit Siumumit naammagisimaarlugu maluginiarparput akileraarutitigut akitsuutitigullu isertitat kaffakkiartornerat. Tamanna inuiaqatigiinni aningaasaqarniarnikkut siumut ingerlajartuaarnermik tikkuussisuummat.
Aningaasartuutit iluini qarasaasiaqarfimmut atatillugu ilassutitut aningaasartuutit 5 million koruuniusut Siumumiit naammaginartinngikkaluaqalugit akilerneqartariaqarnerat avaqqunneqarsinnaanngimmat akuerivagut. Kisiannili ilanngullugu uani erseqqissumik aamma taajumallugu siunissaq eqqarsaatigalugu taamatut pisinnaasut akuereqqikkumanaviannginnatsigit. Tamatumunngalu atatillugu taanngitsoorumanngilarput, missingersuusiornermut inatsisiliorneq aqqutigalugu aningaasaqarnikkut sukannernerusumik aqutsilernissaq qilanaaralugu isumalluarfigigatsigu. Isumaqarluinnarattami tamanna siunissami uanitut pisimasumut assingusumik pisoqaqqissinnaanermut annikinngitsumik pakkersimaarinnissutaalerumaartoq.
Takussaajuarpoq aamma pisortat ingerlatsiviisa iluini sulisoqarnikkut sipaarniuteqartarneq. Tamanna tupigisassaanngilaq. Kisianni uani Siumumi taajumavarput inassutigiumallugulu tamatuma isumatusaarluinnartumik ingerlanneqarnissaa. Tassanilu inassutigiumallugu, sulisutigut ikilisaanialersaarnerni salliutinneqarluni aalajangiussiniarnerni tunngaviusassasoq suliap suunera, taamatullu tamanna tunngavigalugu nalilersoqqissaarneqaqqaartassasoq pineqartumut atatillugu naapertuuttumik sulisoqarnersoq.Taamatut aqutsinikkut ingerlaavartumik nalilersuiffigineqartuarluni sulisutigut ikilisaaniarneq inuiaqatigiinni sullissinissamut pitsaassutsikkut anguniagaasumut naapertuunnersoq.
Taamatut naatsumik oqaaseqarluta saqqummiussinermi taaneqartut sinneri immikkut oqaaseqarfiginagit tusaatissatulli tigullugit akuerineri Siumumit nalunaarutigaarput. Inassutigissavarpullu Inatsisartuni aappassaaneeriininnissaq pitinnagu, 1999-imut Inatsisartut ilassutitut aningaasaliissutinut inatsisaasa aappassaattut siunnersuutip Naalakkersuisunit inassutigineqartutut Inatsisartut Aningaasaqarnermut Ataatsimiititaliaanut suliassanngortinneqarnisaa.
Anders Nilsson, Atassutip oqaaseqartua:
Inatsisartut ilassutitut aningaasaliissutinut inatsisissaattut
siunnersuutip aappaata 1999-imoortup siullermeerneqarnerani Atassummiit
oqaatigiumasagut imaapput:
Siullermik konto 13.01.02. Namminersornerusut qarasaasiaqarfiat.
Naalakkersuisup saqqummiinermini oqaatigaa, aningaasartuutit amerlissutaat 5
millioner koruuniusutqarasaasiat ataqatigiiaat ingerlanneqarnerannik kiisalu
tamatumani aaqqissuusseqqqinnermik pissuteqartut.
Missingersuutinut tapiissutini allassimavoq 3,2 millioner koruuninut
tunngatillugu nuna tamakkerlugu qarasaasiat ataqatigiiaat pilersinneqarnerisa
kingornagut ingerlatsinermut aningaasartuutaalersimasut pineqartut.
Aningaasartuutillu aningaasanut inatsisip 1999-imoortup suliarineqarnerani
naatsorsorneqarsinnaasimanngitsut. 1,4 millioner koruuninut tunngatillugu
akiligassaq 1998-imeersoq akilerneqarsimanngitsoq pineqarneruvoq.
Ilassutitut aningaasaliissuteqarnissamut pisariaqartitsisoqarneranik
nassuiaatigineqartut assigiinngitsut marluk eqqaassanngikkaanni
allassimanngilaq aningaasat amerlanersaat atorneqareersimasut.
Qinnuteqaat oqaatsinik qanorluunniit kusanartigisunik poortoraluaraanni
aningaasanik nunatta karsianeersunik aningaasaliissutitigut
matussuserneqanngitsunik atuineq inatsisaatsuliorneruvoq.
Aningaasaliissuteqarnissamut pisariaqartitsileriataarnermut nassuiaatit
pingajoqarput. Nassuiaallu taanna Aningaasarnermut Ataatsimiititaliamut
nassuiaatigineqarsimavoq, tassami Inatsisartut ataatsimiinngilaataanni
aningaasaliissutit akueritinneqartariaqarsimammata suliassap
kinguartinneqarsinnaannginnera pissutigalugu. Ilassutitummi
aningaasaliissutinut inatsisissatut siunnersuut manna aatsaat
inatsisinngortinneqassammat oktoberip qaammataata naanerani.
Routernetip ingerlanneqarnissaanut 3,2 millioner koruunit
pisariaqartinneqartut
Aningaasaqarnermut Ataatsimiititaliamut nassuiaammi ima
allaatigineqarpoq. Issuaavunga:
Januarimiit routernetip nutaap ingerlanneqarnera atulerpoq, naak tamanna
aningaasanut inatsimmut 1999-imoortumut ilanngunneqanngikkaluartoq.
Taamaattumik ingerlatsineq unitsinneqarsinnaanngitsutut isigineqartariaqarpoq
1999-imilu katillugit 3,2 millioner koruuninik aningaasartuutaassalluni.
Taannami 1999-imi sanaartugassanut tunngavoq aatsaallu 2000-imi
ingerlatsinermut, taakkunannga 2,4 millioner koruunit maannamut
atorneqareersimallutik. Tassa 1. september 1999-imi. Isuaaneq naavoq.
1,4 millioner koruuninik pisariaqartitsinermut tungatillugu ima
allassimasoqarpoq. Issuaavunga:
Aningaasaqarnermut tunngasunik misissueqqissaarnermi Oracle-mut
akiligassanik takkuttoqarsimavoq - 1998-imi akiligassat allagartaannut
arlalinnut tunngasunik - 1,4 millioner koruuninik akilerneqareersimasussanik
aningaasartalinnik. Issuaaneq naavoq.
Aningaasaqarnermut Ataatsimiititaliamut nassuiaatitut allassimavoq
pisussaaffiit aqutsisut siuliisa pilersissimasaat ima annertussuseqartut
missingersuutini kingumoortuni ataatsikkut tamakkerlugit
matussuserneqarsinnaanatik.
Tassunga oqaatigisariaqarpoq tamanna aamma inatsisaatsuliornerussammat.
Routernetip ingerlanneqarnissaa aningaasaliiffigineqarsimanngitsoq
pilersinneqarsinnaanngilaq immikkoortortani kontot assigiinngitsut
nikisiternerisigut.
Missingersuutinut tapiissutit oqaasertaat upperissagaanni aningaasat
atorneqarsimapput naatsorsuutigalugu aningaasat atorneqareernerini maannakkut
aningaasaliisoqassasoq. Tassamigooq 1999-imut aningaasanut inatsimmut
angumeqqunneqarsinnaasimanngimmata.
Nassuiaatit arlaannaataluunniit inatsisit malillugit ingerlasoqarsimanersoq
oqaatiginngilaa. Nam-minersornerusut qarasaasiaqarfianni aningaasaliinissamut
pisariaqartitsinermut nassuiaatit imminnut assortuuttut eqqumiilluinnartullu
sukumiisumik nassuiarneqarnissaat Atassummiit kissaatigaarput. Kia suna qanga
ilisimavaa? Kina politikkikkut akisussaava? Kina aningaasaqarnikkut akisussaava?
Konto 20.10.12. Aningaaseriveqarnikkut pilersuineq. Missingersuutinut
tapiissut manna arlaleriarlugu atuaqqaartariaqarunarpoq suup pineqarnera
paasilluarsinnaassagaanni. 1. januar 1999-ip tungaanut Grønlandsbankip Post
Greenland ukiumut 2.725.000 koruuninik akilertarpaa illoqarfitta ilaanni
qulingiluaasuni allakkerivinni aningaaseriveqarnikkut niuernini
ingerlanneqartikkumallugu.
Allakkerivinni qulingiluaasuni taakkunani aningaaseriveqarnikkut niuernini 1.
januar 1999-imit Grønlandsbankip akilerumajunnaarpaa. Akerlianilli Post
Greenlandip Grønlandsbankip aningaaseriveqarnikkut suliassaanik
isumaginninnerata ingerlaannarnissaanut ukiumut 3 millioner koruunit
akiliutigeqquneqaalerput.
Missingersuutinut tapiissutini allasimavoq nutaamik
isumaqatigiissuteqarniarluni isumaqatigiinniarnerigaluit unittoorsimasut,
tamatumalu kingorna allakkeriveqarfiup sullissinerit pineqartut Grønlandsbankip
sullitaanut ingerlassimagai Grønlandsbankimit akilerneqangikkaluarluni.
Tamanna 1999-imi Post Greenlandimut 1,4 millioner
koruuningajalluinnarnik akeqarpoq. Ukiup sinneranut aningaaseriveqarnikkut
niuernerup allakkerivinni qulingiluani taakkunani ingerlanneqartinnissaanut
Grønlandsbanki 400.000 koruuninik akiliiumalluni akuersisimavoq.
Missingersuutinullu tapiissutit naapertorlugit naatsorsuutigineqarpoq 963.000
koruunit sinneruttut nunatta karsianit akilissagivut.
Grønlandsbanki ukiorpassuit kingulliit ingerlaneranni
killilersugaanngitsumik unammilleqatigiittoqarnissaanut namminersortullu
suliniuteqarnissaannut illersuisuusutut sassartaartarsimasoq, annermik
piginneqataaffigineqartoq aningaaserivissuarnit pingasunit - Den Danske
Bankimit, Unibankimit BG-Bankimillu. Namminersornerusut Nuna-Fonden aqqutigalugu
aningaaserivimmi aamma piginneqataassuteqarput.
Piginneqataasut akornanni isumaqatigiissuteqartoqarsimavoq Kalaallit
Nunaanni aningaaseriveqarnikkut unammillernerusumik piginneqataasut akornanni
ingerlatsisoqassanngitsoq. Isumaqatigiissut tamanna - inatsisitigut
piumasaqaataagaluartoq - Konkurencenævnimut
nalunaarutigineqarsimagunanngivippoq. Sunniutaali erseqqareqaaq. Kalaallit
Nunaanni aningaaseriveqarnikkut sullissinermi Grønlandsbanki kisermaassisuuvoq.
Najukkani assigiinngitsuni aningaaseriveqarnikkut sullinneqarneq
eqqarsaatigalugu kisermaassineq taanna maanna millilernialerpaat nunap
immikkoortuinut iluanaarnerpaanuinnaq tunngatilerlugu.
Tamatuma taaguut Grønlandsbankip tassaalersippaa nioqqutissat
nassuiaataat eqqunnitsoq. Aningaaserivimmi ima
taaguuteqartariaqaraluarpoq:"Illoqarfiit pingaarnersaata aningaaserivia
Nuuk", imaluunniit nassuiaalluarnerorpaluttumik "Aningaaserivik
kisermaassisoq".
Kisermaassineq pisussaaffiliisarpoq, nuanniitsut nuannersunut
ilanngullugit pisariaqarput. Imaalluarsinnaavoq illoqarfinni qulingiluani
pineqartuni aningaasanik Grønlandsbankip iluanaarnartitaatut amerlassusilinnik
nassaassaqanngitsoq. Kisianni kommuneni qulingiluani innuttaasut nunatta
karsianik nikisitersinnaasaminnik aningaasarpassuaatilimmik piginneqataapput.
Aningaasat taakkua ilarpaalussui arlaatigut Grønlandsbankimi
inissisimatinneqarput.
Illoqarfinni taakkunani allakkerivinni aningaaseriveqarnikkut
sullissiuartoqarsinnaanera Atassummiit qulakkeerinneqataaffigerusupparput.
Allatut ajornassappat aamma aningaasat pisariaqartinneqartut
akuersissutigiumavagut. Kisianni Grønlandsbankip nunatsinni niuernerata
sinneranut kinguneqartinneqassanngippat taamaaliorusunngilagut, matumani
pingaartumik aningaasat nunatta karsianeersut inissisimatinneqarnerannut
atatillugu.
Tamatuma saniatigut isumaqarpugut aningaasaateqarfiit allat,
soraarnerussutisiassanut aningaasaateqarfiit aningaasaateqarfiillu kommunenit
qulingiluanit pigineqartunik nunatsinnillumi tamarmeersunit
aningaasaliiffigineqartartut aningaaserivimmik suleqateqarnertik
isummerfigeqqittariaqaraat.
Sooq naatsorsuutigissavarput nunatta karsiata ukiumut 3 millioner
koruunit aningaasaliissutigisassagai Grønlandsbankip, nunatsinni
aningaaserivittut kisermaajulluni, sullitaminut anngussinnaanissaa qulakkeerniaannarlugu?
Konto 60.10.03. Nunani allani katsorsaasarneq, timikkut nappaatilinik.
Rigshospitalimit akiligassat akiligassamut allamut ilanngullugit
kakkersarneqarsimanerat pissutigalugu takunngitsoorneqarsimasut matussuserneqarnissaannut
8,5 millioner koruunit qinnutigineqarput. Nassuiaatip eqqumiikkaluassusia.
Nunatta karsia bingortarfiunngilaq timersoqatigiilluunniit
peqatigiiffiginagu. Nassuiaat uppernassuseqanngilluinnarpoq.
Allamit paasitinneqarpugut aningaasat taakkua ilaat 3-4 millioner
koruunit katsorsaanernut aalajangersimasunut atassuteqarsinnaasut. Matumani
napparsimasut 300-400-ut pineqarunarput billetinik allatigut
akilerneqarsimasunik tunineqarsimasut. Kalaallit Illuutaanni najugaqarsimapput
aningaasartuutillu Rigshospitalimit akiligassamut ilaanngitsut
aningaasartuutigineqarsimallutik. Puigutsiarnerup taassumap paasitippaatigut
Danmarkimi katsorsartitsisarnermut aningaasartuutit ingerlaavartumik
naligiissaarneqartarsimanngitsut. Taamaanngippammi kukkuneq
pisimanavianngikkaluarmat.
Ajornartorsiutip tamatuma Inatsisartut Kukkunersuinermut
Ataatsimiititaliaanni sukumiisumik iliuuseqarfigineqarnissaa
naatsorsuutigaarput.
Kontomi aamma tassani, Nuani allani katsorsaaneq. 16,5 millioner
koruunit qinnutigineqarput itigartinneqarsinnaanngitsumik atuinerusimanermik
pissuteqartinneqartut.
Qinnuteqaatip soqutiginartua tassaavoq atuinerusimanermut
tunngavilersuut. Missingersuutinut tapiissummi ima allassimasoqarpoq.
Issuaavunga:
Aningaasaliisoqaqqinnissamut kissaatip toqqammavia pingaarutilik
tassaavoq Dronning Ingrids Hospitalimi passussisarfiit immikkuullarissut
ilaanni inuttassaqarniarnikkut ajornartorsiuteqarneq. Issuaaneq naavoq.
Tamanna pingaarutilimmik apeqquteqarfiusariaqalerpoq. Dronning Ingrids
Hospitalimut piukkunnaateqarluartunik sulisussarsiorneq ajornarsimaqippat
Danmarkimut aallartitsisarnissaq pisariaqartarluni, ulloq taanna nunap
immikkoortuini marlunni napparsimmaveqalerutta sulisussanik immikkut
ilinniarsimasunik taakkuninngarpiaq pisariaqartitsisunik, taava pissutsit qanoq
ittuujumaarnerat takorloorneqarpa?
Akissut tassaasariaqarpoq, taava pissutsit ajornerulissapput.
Sumiiffinni pingasuni tamani sulisussaqarniarerup ajornerulersimanera
pissutigalugu napparsimasut amerlanerusut Danmarkimut katsorsartikkiartorlugit
aallartittariaqalissapput. Naliliinerlu imaattariaqarpoq. Nunap immikkoortuini
marlunni napparsimmavinnik pilattaagasuarfiusinnaasunik pilersitsissanngilagut.
Taamatut oqaaseqarluta inimi maani aappassaaneerneqannginnerani suliassaq
Aningaasaqarnermut Ataatsimiititaliamut ingerlaqqittussanngortipparput.
Asii Naarup, Inuit Ataqatigiit:
1999-imut Inatsisartut ilassutitut aningaasaliissutinut inatsisaasa
aappassaattut siunnersut. Ukioq 1999-imut aningaasanut inatsisissaq siorna akuersissutigineqarmat
aningasartuutissat isertitassallu oqimaaqatigiissillugit missingersuutini
inissisimapput. Ilassutitut aningaasaliissutinut inatsisissat aappassaattut
siunnersuut, siunnersuutigineqartutut isikkoqarluni akuerineqarpat, landskarsi
ukiup naanerani 52 milliuunit missaanniik amigartuussaaq, naak 1999-ip
ingerlanerani missingersuusiornermi isertitat qaffariaateqarsimagaluartut.
Landskarsip isertitassai, akileraarutitigut akitsuutitigullu
qaffariaateqartussatut missingersuutigineqarnerat nuannaarutissaavoq.
Minnerunngitsumik akileraarutitigut isertitassat amerlanerunerat nunatsinni
aningaasaqarnerulersimanermik ersiutaapput. Akitsuutit aqqutigalugit
landskarsimut nakkartussat amerlisimammata aningaasartuutissatta ilaannut
matussutissaqartitsissammata qujanaraluarpoq. Taamaattoq aningaasat
imigassartornermik tupatornermillu landskarsimut assakaalaaginnavillutik
nakkaaneri eqqarsarnartoqarpoq.
Inuulluarniutinik atuipilunnerup kinguneri inuit ataasiakkaat
ilaqutariillu peqqissusiannut siunniuteqartarpoq, inuiaqatigiinnut
aningaasartuutaasumik. Taamatuttaaq meeqqat sumiginnagaasut ilaqutariillu
atugarliorlutik inooqatigiinnerat assiliartaliunneqartariaqartunut ilaapput.
Imigassaq aqqutigalugu pilliutigut naammaleqaat. Inuit Ataqatigiinnit aammaarluta
Naalakkersuisut kaammattorusuppagut imigassamik atuinerujussuup
affaannanngortinneqarnissaa anguniarlugu suliniuteqaqqullugit.
Aningaasartuuteqarneruneq assigiinngitsorpassuarnik patsiseqarpoq.
Soorlu ingerlatsinermut aningaasartuutit qaffannerannik, aamma suliniutinut
pilersaarusiorluagaanngitsunik aningaasaliissuteqartarnernik.
Kukkuluttuutaasarsimasut uggornaannaratik kamannaannartut.
Aningaasarpassuarnillu inuiaqatigiinnut nammakkiisut. Kukkuluttuutit
minnerpaamik ilinniarfigisariaqaratsigit, eqqarsaatigilluakkanik
pilersaarusiorluakkanillu siunissami aningaasalersuisarnissaq Inuit
Ataqatigiinniit pingaarteqaarput.
Pissutsit ataatsimut isigalugit taamatut naatsumik nalileereeratta,
aningaasartuutissatut qinnutigineqartut ataasiakkaat ilaat immikkut oqaaseqarfigerusuppagut:
Peqqinnissaqarfiup ingerlanneqarneranut Inatsisartut
aningasaleeqqittariaqarnerat ima oqaaseqarfigerusupparput. Inuit Ataqatigiit
tungaanninngaanniit piffissanngorsorivarput inuiaqatigiit
erseqqissuliorfigalugillu unneqqarissumik nalunaarfigisariaqartut
peqqinnissaqarfimmi pissutsit atukkat massakkutut ittuartillugit
naatsorsuutigiuartariaqassagipput peqqinnissaqarfiup annertoorujussuarnik
aningaasartuuteqarfigiuartarnissaanik.
Peqqinnissaqarfiup aaqqissuussaanerata allangortinneqarnissaata
tungaanut sulisoqarniarnikkullu pissutsit tamakkiisumik
iluarsiivigineqarnissaasa tungaanut pingaarnersiuillunilu tulleriissarinissamik
oqallinnerup inerniliiffiusumik naammassereernissaanut aningaasat 700 millioner
koruunit sinnerlugit atorfissaqartinneqartuassapput.
Ajornartorsiutit kipiluttunartut nutaajunngillat, ukiunilu arlaqalersuni
iluarsiiviginiarlugit sulisoqarsimasoq nalunngikkaluarlutigu, Inuit
Ataqatigiinni isumaqarpugut siornatigut akisussaasut ajornartorsiutit
aaqqiliivinnerarlugit nipilimmik innuttaasunut paasissutissiisarsimasut.
Isumalluarsaarinerit taamaattut soorunami tusaalluarneqartarsimapput,
allaat isumaqalersitsisarsimallutik aningaasartuutit
qaffakkiartoqqissanngitsut. Pissutsilli piviusut taamaanngillat, nassuerutigisariaqarporlu
ajornartorsiutinut qaangiinissamut aqqutissat suli nassaarineqarsimanngimmata.
Taama annertutigisumik aningaasartuuteqarneq illuanut saatillugu aamma
ima isiginiarneqarsinnaavoq. Aningaasartuutit taama qaffasitsiginerisa
uppernarsarpaat napparsimasunik kiffartuussinerup ingerlajuarneranik, inuillu
nappaateqarlutik katsorsartittariaqartut sumiginnarneqartannginnerannik.
Inuit Ataqatigiinni isumaqarpugut pingaarersiuilluni
tulleriissaarinermik oqallinnerup inerniliivigineqarnissaata tungaanut pissutsillu
siuliinni oqaatigeriikkakka aaqqinnissaasa tungaanut innuttaasut
naatsorsuutigisinnaasariaqaraat napparsimalissagunik sapinngisamik
katsorsarneqarnissaminnut periarfissaqarnissartik.
Peqqinnissaqarfimmut aningaasartuuterpassuit inooriatsitta peqqiitsup
ilaatigut kingunerivai. Katsorsarnissamik pisariaqartitsinerit amerlasuut
imigassartorpallaarnerup kingunerivai. Aningaasartuutit annikillisarniarlugit
tamatta ilungersoqataasariaqarpugut, inersimasuusugut inuuneq sutigut tamatigut
peqqissoq kinguaatsinnut maligassiuinikkut kingornussarsiaritittariaqarparput.
Inooriaaseq peqqissuunitsinnik siuarsaasoq qinertariaqarpoq.
Immitsinut tassuuna piumaffiginnissinnaaneq qaffassartariaqarpoq. Taava
aningaasartuutit annikilliartulissagaluarput. Sipaarutillu atorneqarsinaassagaluarput
meeqqat atugarisaanik pitsanngorsaanissanut, anersaakkut kulturikkullu
ineriartornermut piorsaaqqinnissamut, inissaaleqinerujusssuullu
qaangerniarnissaanut. Taakkununngami aningaasat atorfissaqarteqaagut.
Inuit Ataqatigiinni arajutsisimanngilarput peqqinnissaqarfimmut
aningaasaleeqqittariaqarnermut peqqutit ilagigaat siornali Rigshospitalimut
akiligassap akilerneqarsimannginnera. Qinigaaffiup siuliani
naalakkersuisuusimasut tamanna akisussaaffigaat. Siunissamilu tamakkua pinngitsoorluinnartariaqarput.
Taamaattumik allaffissornikkut aningaasaqarniarnikkullu aqutsineq
pitsaalluinnartuusariaqarpoq. Tusarusunnarporlu Peqqinnissamut Naalakkersuisoq
siunissami tamanna pinngitsoortinniarlugu qanoq iliorsimanersoq.
Peqqinnissaqarfimmik aaqqissuusseqqinnerit pingaarnersiuillunilu
tulleriissaarinissamik suliniutit pingaaruteqarluinnertuummata
Naalakkerusisumut kaammattuutigissavarput ingerlateqeqqullugit. Ilanngullugu
kissaatigeqaarput nukiit ilaat atorneqassasut siunissaq ungasinnerusoq isigalugu
anguniagassanik siunnerfissanik naleralersuisuinissamut.
Qarasaasiaqarfik 5 miliuuninik immikkut qinnuteqaassunneqarpoq.
Paasinarmat ukiuni qaangiuttuni qarasaasiaqarfimmi suliassat ilaat aallartinneqartarsimasut
aningaasartuuteqarnissamut akuersissutit qulakkeeqqaarnagit Inuit
Ataqatigiinnit sakortuumik uparuaassalluta pissutissaqarsorivugut.
Taamatuttaaq akiligassat piffissaq eqqorlugu akilerneqarsimannginnerat
aningaasaleeqqittariaqarnermik kinguneqarpoq. Pissutsit taamaattut,
akisussaaffimmik sumiginnaalluni sulisimaneq akuersaarusunngilagut.
Taamaattumik isumaqarpugut akisussaaffik inissinneqartariaqartoq, imaluunniit
arlalinnuuppat akisussaaffiit inissinneqartariaqartut.
Qarasaasiaqarfik eqqartortillugu Inuit Ataqatigiinnit paaserusupparput
Naalkkersuisut qarasaasiaqarnerup tungaatigut ukioq 2000-imut
isumannaallisaanerit Namminersornerullutik Oqartussani tamarmi naammaginartumik
ingerlanneqarnersut.
Aningaasaliiffik pingaarneq 20.10.12. Aningaaseriveqartitsineq pillugu
immikkut oqaaseqalaassuugut aamma. Tamanit ilisimaneqartutut nunatsinni
aningaaseriveqarneq aningaaserivimmit maani angerlarsimaffeqartutuamit
isumagineqarpoq. Inuit Ataqatigiit tunngaviusumik isumaqarpugut tamanna kisermaassilluni
ingerlataqarneq pisussaaffittut aamma nalilerneqartariaqartoq.
Inuiaqatigiit aningaaserivitsigut sumi nunaqarnerput najoqqutaralugu
immikkoortiterluta kiffartuunneqarnerput ullutsinnut naleqquttuusorinanngilaq.
Aningaasammi nunaqarfinni illoqarfinnilu aningaaserivituarsuup
immikkoortortaqarfiginngisaanni pigineqartut ilanngullutik nunap
aningaasaqarneranut ikorfatut isigineqartariaqarput. Aningaaseriviullu
kisermaassisup aningaasaqarneranut, taamalu aamma
taarsigassarsiaritittagaannut, ilaalluinnartutut oqaatigineqartariaqarmata
ajuusaarnarluinnarpoq Grønlandsbankip illoqarfinni pineqartuni
nunaqarfippassuarnilu aningaaseriveqarnikkut kiffartuussinermut
akileeqataajumajunnaarluni aalajangersimanera.
Saqqummiunneqartutigut paasivarput Naalakkersuisut apeqqummut
aaqqiiniarlutik suliniuteqartut. Ukiullu imaalereernera innersuussutigalugu
innuttaasut ajornartorsiummik eqqorneqartut qanoq ilimasuttariaqarnerannik
Naalakkersuisut naliliinerat paaserusupparput.
Aningaasaliiffik pingaarneq alla eqqarsalersitsisoq tassaavoq 40.10.13.
Meeqqat atuarfianni annertunerusumik immikkut atuartitsineq. Ukiut atuarfiusut
kingulliit tallimat ingerlanerinnaanni meeqqat taamatut pisariaqartitsisut
306-nit 426-mut amerlisimapput. Amerliartornerinut assigiinngitsunik
tunngavilersuutissaqaraluarpalluunniit amerlapput, aperisariaqarpugullu sumik
ersiutaappat? Sullinneqarnerat naammaginarnerluni, siunnersuisarfimmi PPR-imi
tarnip pissusaanik ilisimasallit taama ikitsigitillugit atorfiillu
inuttaqartuaannartannginneri eqqarsaatigalugu? Pissutsit meeqqat atugaannut
tunngasut tamakkiisumik eqqartorneqalerpata uterfiginissaat qilanaarivagut.
Taama oqaaseqarluta 1999-imut Inatsisartut ilassutitut
aningaasaliissutinut inatsisissaassa aappassaattut siunnersuutip
Aningaasaqarnermut Ataatsimiititaliamut innersuunneqarnissaa akuersaarparput.
Mogens Kleist, Kattusseqatigiit oqaaseqartuat:
1999-imut Inatsisartut ilassutitut aningaasaliissutinut inatsisissaata
aappaanut siunnersuut Kattusseqatigiinniit imatut oqaseqarfigissavarput. 1999-imut
tapiissutissatut siunnersuutigineqartunut tunngatillugu taakkartugassat makku
oqaatigerusuppagut. Aningaasartuutit annertuseriarsimaneri maluginiarpagut
Namminersornerullutik Oqartussat qarasaasiaqarfianni. Tassami
akiligassaasimasut keermiaasiit takunngitsuukkat 1,4 millionunik nalillit
nassaarineqarsimapput. Taakkulu akilerneqarnissaat pisariaqarlutik. Taassumalu
saniatigut qarasaasianik aaqqissuiniarnernut suli aningaasat amigaataasut
qinnuteqaatigineqarlutik.
Namminersornerullutik Oqartussat qarasaasiaqarfiata iluani
ajornartorsiutaasut Kattusseqatigiinniit piaarnerpaamik aaqqiivigineqarnissaat
kissaatigaarput. Tassami ukiut arlalinngorput ajornartorsiuteqarnernut
tunngasut suli aaqqiivigineqarsimanatik. Akisussaasut imaluunniit oqartussaasut
qarasaasiaqarfimmit naliliiffigineqartariaqarput taamatut
ingerlatsisimanerannut.
Peqqinnissaqarfik ukioq manna 30 millionit missaannik
aningaasartuutissaminnik amigaateqarput. Takkartorneqartut ilagaat
napparsimasut qallunaat nunaannut aallartinneqartartut amerlisimanerat. Aap
taamaassimassaaq. Kisianni Kattusseqatigiinnit taakkartorusupparput qallunaat
nunaannut aallartitsisarnerit pitsaanerusumik aaqqissuunneqartariaqartut,
taamaalilluni aningaasartuutissat sippornagit aningaasatigut ingerlatsineq ingerlanneqarsinnaassammat.
Peqqinnissaqarfiup iluani akiligassat 8 millioninik nalillit
nassaarineqarsimapput, Kattusseqatigiinniillu oqaatigissavarput napparsimasut
qallunaat nunaannut katsorsartikkiartortartut sukumiinerusumik suliarineqarneri
malinnaavigineqarnissaat kaammattuutigerusukkatsigu, aammalu akiligassanut
tunngatillugu sukumiisumik aqutsineq sakkortuumik innersuussutigerusukkatsigu.
Akiligassat 8 millioninik nalillit misissorneqarnissat kissaatigaagut.
Nakorsassaaleqineq pissutigalugu saniatigut aningaasanik 2,3 millioninik
qinnuteqartoqarpoq ataatsimut aningaasartuutit nuna tamakkerlugu siunertamut.
Kattusseqatigiinnillu oqaatigerusupparput sineriammi nakorsassaaleqinerit
Naalakkeruisunit aamma nakorsat peqatigiiffiannit ajornartorsiutaaqisumut ataatsimoorlutik
aaqqiiniartariaqalersut innuttaasut illoqarfinni arlalinni
toqqissisimannginnertik ersersittarmassuk tusagassiuutitigut.
Naalakkersuisunit katersuiniarnernut assigiingitsunut aningaasanik
immikkoortitseqqaartarnissat Kattusseqatigiinnit innersuussutigerusupparput,
tassami nalunngilarput Namminersornerullutik Oqartussat assigiinngitsunut
tapiissuteqartartut. Tapiissuteqartarnerilu ingerlanneqartarlutik.
Eqqaasitsissutigissavarput Naalakkersuisut siulittaasuata qimaasunut checkimik
tunniussinera Aningaasaqarnermut Ataatsimiititaliaq akuersiteqaarnagu.
Taamaattut pissutsit aaqqittariaqarput.
KGH-toqqap quersuisa aaqqissuunneqarnerinut tunngatillugu
Kattusseqatigiinnit misissugassatut innersuussutigerusupparput quersuit
allaffittut atorneqarsinnaanissai eqqarsaatigeqqullugit. Tassami maannakut
Danmarkskontorip siunissami nuunneqarsinnaanissaa eqqarsaatigalugu.
Ilisimatusarfimmut tunngatillugu oqaatigissavarput tapiissutissatut
qinnuteqaatigineqartut paasilluaratsigit. Tassami piumasaqaatit assigiinngitsut
eqquutsinneqarsimapput. Ilinniartitsinerit saniatigut piumasaqaataasimasut
annertusimapput aammalu pissutsit assigiinngitsut ilinniartut atugarisaannut
tunngasut aaqqiivigineqarsimapput qarasaasianik pisiortornikkut.
Kalaallit Illuannut aningaasartuutit saniatigut qinnuteqartoqarpoq 1,5
millioninik. Nuannaarutigaarput illumik attartorsinnaalernerup
kingunerissappagu aningaasartuutit ungasinerusumut ikilissappata,
patienthotelinut assigisaannullu.
Namminersornerullutik Oqartussat ilinniartitaanermut qarasaasiaqarfiani
qarasaasianik aaqqiiniarnerit erloqinaqisut suli naammassinngitsut piaartumik
aaqqiivigineqarnissaat Kattusseqatigiinnit oqaatigerusupparput.
Akileraarutitigut isertitassanut tunngatillugu takusinnaavarput
isertitassat 1999-imi annertuseriarsimasut. Tassami nalunngilarput ukiat
tamaasa akitsuinikkut innuttaasut eqqorneqartuarmata.
Sungiutiinnalerunarparpummi ukiat tamaasa akitsuisarnerit Naalakkerusisunit.
Iluarsaaqqinnissamut tunngatillugu Kattusseqatigiinnit imatut oqaaseqaateqassuugut.
Andelsfondip atuutilerneqaratigut aningaasatigut missingersuusiornermi aammalu
ilassutissatut qinnuteqaateqartarnernit immikkoortinneqartalernissaa siunissami
pitsaanngoriaatigut taakkartorusupparput. Tassami ukiut tamaasa aningaasat
atunngitsuukkat millionerpassuuummata. Taamatullu atunngitsuuinikkut
illoqarfinni assigiinngitsuni suliassaqanngitsuni
suliassaqartitsisinnaagaluarmata. Kommuninullu annertuumik aningaasatigut
isertitassaraluit annaaneqartarlutik.
Aningaasatigut nuussinerit arlallit Aningaasaqarnermut Ataatsimiititaliap
ilaaffigisimasai Kattusseqatigiinnit annertunerusumik
oqaaseqarfigissanngilagut. Taamatut naatsumik oqaaseqarluta siunnersuutip
aappassaaneerneqartigani Aningaasanut Ataatsimiititaliamut ingerlaqqinnissaa
innersuussutigissavarput.
Josef Motzfeldt, Aningaasaqarnermut Niuernermullu Naalakkersuisoq,
Inuit Ataqatigiit:
Oqaaseqartunut Inatsisartuninngaanniit oqaaserineqartunut uannut
tunngassuteqavissut aningaasanut inatsisissamut siunnersuummut
akissuteqarfigissavakka, naatsorsuutigalugu soorunami Naalakkersuisunut
ilaasortat ataasiakkaat susassaqarfimmik tunngasunik uparuarneqartunik
saqqummiussinissaat.
Siullermik Kattusseqatigiinninngaanniit Københavnimi qanga KGH-jusimasup
quersuakorsuata Islandimiut Savalimmiormiut Norgep avannaamiullu peqatigalugit
nunarput peqataalluni iluarsaanneqarnissaannut, taavalu tassani
nunatsinninngaanniit europami iliuuserisakkagut ataatsimut
katersorneqarsinnaanerat ilaatigut siunnerfigalugit suliniut taanna
Naalakkersuisut tapersersugassamissut aalajangersimanerinut peqqutaavoq ukiuni
arlaqaleqisuni nunat atlantikup avannaani kitaamiut minnerunngitsumik
suleqatigiinniarnikkut anguniakkamissut oqaatigisarsimasaat ataatsimiinnernilu
avammut suaarutigisarsimasaat iluatinnartutut Naalakkerusisunit isigigatsigu,
aammalu oqaasiinnarmiinnatik timitaliiviginissaat piffissanngortutut
piffissatsialak manna allanit aningaasaleeqateqarluta iluatsissinnaagutsigu
iluatigigatsigu.
Tassuunakkut ilaatigut nunat atlantikup avannaani kitaamiut arfanniarnikkut
inuuniarnikkut aalisarnikkullu allatigullu takornariaqarnikkullu soqutigisatta
ataatsimoorullugit europamiunut nunarsuullu sinneranut sunniuteqarfiginissaat
isumaqarpunga tassuunga periarfissatsialaassasoq. Mogens Kleistillu
Kattusseqatigiinnit nalornerpasillugu apeqqutigisaanut tassa
massakkutNnammienrsornerullutik Oqartussat Københavnimi allaffeqarfiat qannoq
pineqassanersoq, tassani inatsisissamut siunnersuummut oqaasertaliunneqartunut
kontomi pineqartumi allassimavoq naatsorsuutigineqartoq ullumikkut Namminersonerullutik
Oqartussat allaffeqarfiat atorneqarunnaassasoq Namminersornerullutik
Oqartussaninngaanniit. Naatsorsuutigineqarluni quersuakorsuarmi tassani
nutartikkami nutarterneqassappat aningasaliiumasoqassappallu tassani
Namminersornerullutik Oqartussat angerlarsimaffeqalissasut allaffeqarfiat.
Soorunami aningaasanut inatsisissami matumani eqqaaneqartut ilagivaat
nunatsinni aningaaseriveqarnikkut pissutsit, massakkut inatsisissakkut
matumuuna 900.000 qaangilaarlugit qinnuteqaassunneqartoq. Atassutip oqaluttuata
nassuiaaneratut ilumoorpoq kiffartuunneqarnissamut isumaqatigiissut
Grønlandsbanki aningaaseriviugami nunatsinni aningaaserivitsigut
kiffartuussineq ingerlakkumallugu illoqarfinni arfineq sisamaasuni nammineq
immikkoortortaqarfiginngisamini nunaqarfinnilu kiffartuussinissaq pillugu
allakkeriveqarfik isumaqatigiissuteqarfiginikuusimammagu millionit pingasut
pallillugit ukiumut akilertakkaminik. Tamannali ukiortaamit ukioq manna
ukiortaamiit
Arfineq-sisamaasunit nammineq immikkoortortaqarfiginngisaminit
nunaqarfinnilu kiffartuus-sinissaq pillugu Allakkeriveqarfik
isumaqatigiissuteqarfiginikuusimammagu, millionit pingasut pallillugit ukiumut
akilertakkaminik.
Tamannali ukiortaami Grnlandsbank-i qimanniarlugu pisussaaffimmisut isigiunnaarniarlugu,
sinneqartoorfigineq ajoramiuk amigartooruteqarfigisaramiuk
nalunaarutigisimavaa. Taamaakkaluartoq ingerlatiinnarallarpaa ilaannakortumik
aningaasaliilluni. 400.000 kr-nik akileeqataajumavoq, Atassutip oqaluttuata
oqarneratut.
Ajornartorsiut tamanna imaannaanngilaartuuvoq, Grnlandsbank-i
Namminersornerullutik Oqartussat piginngilaat. Niuernikut ingerlariaatsit
malillugit ingerlatsivoq. Taamaattumik iluanaaruteqarfigisinnaangisamini
ingerlatsinissamut pinngitsaalineqarsinnaanani. Aktie-teqaqatigiinnikkulluunniit
uagut piginneqataaffigigaluarutsigu siulersuisui akilersin-naanngitsumik
ingerlatseqqullugit qinnuigisinnaanngilavut.
Taamaakkaluartoq aningaaserinermik ingerlatsisuugaanni, aammalu Inuit
Ataqatigiinnin-ngaanniit Atassumminngaanniillu oqaatigineqartutut,
isumaqarnarsinnaavoq ilumoortoq manna: Nunatsinni aningaasat kaaviiaartitat
ataatsimut nalilerneqartariaqartut, Inuit Ataqatigiillu oqaluttuata oqarneratut
ullumikkut sumi nunaqarnerput najoqqutaralugu aningaaserivitsigut kiffartuunneqarneq
immikkoortitsiviussappat tamanna ullutsinnut naleqquttuunngitsoq.
Tassani Grnlandsbank-ip nalunngeqatiginnissusia soorunami
saassutarisinnaavarput, ima-luunniit ajunngitsuusinnaasoq Grnlandsbank-ip
pigisaa qarmarlugu, aqassullugu uummarissarsinnaavarput, kisianni
pinngitsaalisinnaanngilarput.
Taamaattumik nunaqarfinni isorliunerusunilu annikikkaluamik
aningaaseriveqarnermut assingusunik ingerlatsinissamut
isumaqatigiissuteqartoqarsimavoq, aamma Allakkeriveqarfik KNI Pilersuisorlu
imminnut isumaqatigiissuteqarsimammata.
Tassungalu aningaaseriveqarnikkut kiffartuussinissamut millionit arfinillit
KNI Pilersuisup Allakkeriveqarfimmut akilertarpai. Nunaqarfiit Isorliunerusullu
annikillisaagaluamik bank-itigut kiffartuunneqarnerat plastikkillu tigusissutaasartut
atorlugit tigusisinnaanermut ammaassinerput.
Kisianni taakkua aningaasat millionit arfinillit akilerneqartarput
Allakkeriveqarfiup allakkanik nassiussinikkut isertitaaninngaanniit. Ingerlatap
allaqqinnaap sinneqartoorutaaninngaanniit taakkua matuneqatarsimapput,
ullumikkumut.
Taamatut ingerlasoqaannarsinnaangitsoq Naalakkersuisut isumaqarpugut,
taamaattumik massakkut immaqa nuannaajallakkusuttoqarpat,
nuannaajallatsitilaarusukkaluarpunga; tassa ukiup matuma maanga killinnerani
isumaqatigiinniarnigut annertuut ingerlappavut, Naa-lakkersuisuninngaanniit
pissutsit ataavartumik aaqqiissuteqarfiginissaat ilungersuupparput,
Aningaasaqarnermullu Niuernermullu uanga oqartussaaffigisara massakkut
isumaqatigin-ninniarpoq aningaaservinnut arlariinnut.
Nunatsinni aningaaserivik kisermaassisutut oqaatigineqartoq, siorna
tamatuma missaani-oqqooqaaq oqallisaasorujussuaq, taamatut taaneqarami.
Massakkut taanna allamik aapperlugu isumaqatigiinniarnerit ingerlanneqarput,
tassalu Spar Bank Vest, nunatsinni aamma ilisimaneqartoq, ilaatigut maani
immikkoortortaqalerniarluni suliniuteqartoq, Naalakkersuisuninngaanniit
ilisimavarput.
Pingaarnerusorli mannaavoq: Aningaaserivitsigut nunaqarfinni
isorliunerusunilu arfineq-sisamanik ullumikkut immikkoortortaqarfiunngitsuni
ingerlassinissamut Ukioq 2000-minngaanniit siunissamut ataavartumik
aaqqiiniarnigut aningaaserivinnik arlariinnik qujanartumik
isumaqatiginninniarnernik timitaliiviginiarneqarmata, tassa banki ataasiinnaq
matumani eqqartorneqanngilaq.
Tassalu massakkut isumaqatiginiarneqartut aammalu qanoq
piumasaqaateqarnermi saqqummiussaqartut aningaaseriviit marluupput.
Aningaaserivinnut tunngatillugu, qimannginnerani taanna pingaaruteqarpoq
aningaaserigitsigut sullinneqarnissamik isumaqatigiinniarnerit massakkut Ukioq
2000-minngaaanniit siunissami atasussat ingerlanneqarnerat.
Anguniagarput tassaavoq, innuttaasoq kinaluunniit, erniaqartitsisumik
konto-qarsinnaalissasoq sumiikaluaruniluunniit aningaasaatiminillu sumiluunniit
tigusisinnaanermut allagartaqar-sinnaalissasoq, tassa
Naalakkersuisuninngaanniit anguniakkatta ilaat.
Aappaattullu: Illoqarfinni aningaaseriviit immikkoortortaqarfiginngisaanni
arfineq-sisamaa-suni innuttaasut nalinginnaasumik aningaaseriveqarnikkut
kiffartuunneqalernissaat sullinneqarnissamik isumaqatigiinniutigaavut.
Aammalu anguniarparput nunaqarfinni isorliunerusunilu
aningaaseriveqarnikkut allakkanik nassiussinermik isertitanik
akilerneqartarnerata qimanneqarnissaa, taakku imminnut attuumassuteqanngimmata.
Kisianni tassani isumaqatigiinniarnerit ingerlanerini aningaasartai
Inatsisartuninngaanniit akuerineqartariaqarumaassapput. Tamannalu
oqaaserineqartut najoqqutaralugit paasisinnaavara eqqumaffiginiarneqartoq.
Sulisut ikilisarneqarnissaannik Siumup oqaluttuata oqaaserisaanut
tunngatillugu, mianersortariaqarneq, tamanna ilumoorpoq, amerlasoorsuarnik
sulisoqaraluaruttaluunniit oqaannavilluta ilaat 50-it 75-illuunniit
peersinnanngilavut. Taamaaliorutta sulisunik isumaqanngitsumik
sulisisisisimasutut imminut nerliutissuugut.
Sulisut amerlassusaasa suliassanut naleqqussartuarnissaat pisariaqarpoq.
Taamaattumik Inatsisartuni oqallittarnerpassuarni uparuartorneqarsimasut,
minnerunngitsumillu ukioq qineqqusaarnermi aamma oqaluuserineqartut
ilagilluinnarsimasaat, maani ingerlatsinermut 300 millionit qaqillugit
aningaasartuuteqartarneq, maluginiarlugu Naalakkersuisut manna tikillugu
ingerlatsinermi, allaffissornermi matumani 25-millionit angullugit
annikillisitsereerput, angalanernut ingerlatsinermullu nalinginnaasumut.
Uanilu 12,4 millionit annikillissutaasussat aamma qinnuteqaatigineqarput.
Ingerlavoq suliaq, kisianni sukumiisumik sulisunut
isumaqatigiissuteqarnerit toqqamma-viusariaqarmata, perorsarsimarpasissumik
pissuseqassagutta.
Massakkut Inatsisartunik ilisimaqartumik Naalakkersuisut allaffissornermi
ingerlatsinerat qulaajaasitsipput. Qulaajaanerlu taanna aallaavigalugu
inassuteqaatigiumaagaat Naalakkersuisuni isummersorfigissuagut.
Eqaallisaaneq nunatsinnut ingerlatseriaaseq naleqquttoq ujartorparput
ippassaq soorlu tamanna oqaatigereeriga.
Qarasaasiaqarnermut tunngatillugu naatsorsuutigaara Qarasaasiaqarnermut
Naalakkersuisoq tamatumunnga akissuteqassasoq. Tassami qarasaasiaq
tassaaniaraluarpoq sulinermut pisariillisaatissat, kisianni oqaluuserineqarnera
najoqqutaralugu pullaaqinartorujussuarmut maanna killiffeqartutut isikkoqarpoq.
Atassutikkut Inuit Ataqatigiillu oqaluttuisa kingumut qiviarluni
kukkussutaasarsimasut tikkuartorpaat. Aningaasanut inatsisissami kukkussutitut
taaneqarsinnaasut, qarasaasiaqarnermut tunngasuusinnapput kiisalu aamma
akiligassat peqqinnissaqarfimmut tunngasut uparuarneqarput
pissusissamisoortumik, Naalakkersuisut tamanna maluginiarparput. Kukkunivut
ilinniarfigisartariaqarpavut, kisianni aamma Naalakkersuisuni kingumut
qiviartarneq pisariaqarpoq, kingumut qiviartanngikkutta nalerarput
aanngaqinagatsigu. Kingumuinnavissuaq isiginaveersaartariaqarpugut, soorunami
siunissaq pitsaanerusoq ingerlannigarput aanngaanaveersaassavarput,
kukkunerilli ilinniarfigisariaqarivut tamanna isumaqatigiissutigi-sinnaavarput.
Kiisalu ilaatigut peqqinnissaqarnermut tunngatillugu, Aningaasaqarnermut
Naalakkersuisutut oqaatigissavara, ilumoortoq tassaammat katsorsaariaatsit
nutaat atorneqartut eqqarsaatigalugit, misissueriaatsit nutaat nunatsinni
atulersimasavut najoqqutaralugit, qujarapoq nappaatit siornatigut
malugisinnaasarsimanngisavut, takusinnaasarsimanngisavut piffissaagallartillugu
massakkut piaarnerujussuarmik qujartumik malugineqarsinnaanngorsimammata.
Tamannalu aningaasanik kinguneqaraluarpalluunniit inuiaqatigiit kalaallisut
ittut pisussaaffiisa ilagaat napparsimasut, Inuit Ataqatigiit oqaluttuata
oqarneratut, napparsimasut tassaapput katsorsarneqartussat. Tamannalu aamma
nakorsanngornermi atatillugu isumaginninnissamik neriorsuutigisagaannut
naapertuulluinnartumik ingerlanneqartariaqarmat puiorneassanngilaq.
Alfred Jakobsen, Peqqinnissamut Naalakkersuisoq:
Naalakkersuisut aningaasanut ilassutissatut inatsisissap
aappassaaneerneqarnerata saqqummiunneqarneranut atasumik, Aningaasaqarnermut
Naalakkersuisup oqaatigeriigaatut peqqinnissamut tunngasut uannut
uparuartorneqartut erseqqissaateqarfigilaassavakka nassuiaatelaassallungalu.
Uani pineqartut kisitsisit assigiinngitsut oqaatigineartut pillugit.
Ataatsimoortumik partiit oqaaseqartuisa uparuartugaat pillugit soorunalimi
Naalakkersuisutuut sulinitsinni maannakkut ataatsimoortumik siunnerfigigatsigu
Peqqinnissaqarfiup kiffartuussinerata Naalakkersuisuniit
aqulluarneqartuarnissaa pingaartillugu sulinerput ingerlakkatsigu.
Neriuppunga Inatsisartut ukiaanerani ataatsimiinnerat naatinnagu
Naalakkersuisuniit Peqqinnissaqarfiup qanoq iluseqartumik
aaqqissuuteqqinniarneqarnera pillugu pilersaaruterput
saqqummiussinnaajumaaripput.
Manna tikillugu Peqqinnissaqarfiup aqunneqarnera ingerlanneqarpoq pisariaqartitsineq
naapertorlugu. Taamaattumillu qaqugukkulluunniit napparsimasut
pisariaqartitsinernertik naapertorlugu aammalu nakorsat naliliinerat,
katsorsartariallillu pisariaqartitsinerat tunngavigalugu
katsorsarneqartariaqartut maannakkut peqqinnissaqarfimminngaanniit
kiffartuunneqartarmata.
Soorunalimi Naalakkersuisuninngaanniit Peqqinnissaqarfiup
kiffartuussinerata pitsaajuarnissaa aammalu kiffartuussinerup
aqunneqarsinnaasumik ingerlattuarnissaa pingaaruteqartuuvoq, ingammik
aningaasaliissutaasartut ataatsimoortumik tamaasa isigissagaanni tamanna
Naalakkersuisut pinngitsoorata eqqumaffigisassaraarput.
Kisianilu suulluunniit Naalakkersuisuninngaannit aqussinnanngisavut aamma
uani ilaatigut taakkartorneqartut tassaapput napparsimasut allatut ajornartumik
Danmarkimut angallallugit, katsorsartariallit nakorsat naliliinerat
tunngavigalugit suliaritikkiartortariaqartartut, taakkuummata annerusumik
Naalakkersuinikkut suliaqartuusugut aqussinnaanngisavut, soorunalimi
nakorsatuut naliliinertik tunngavigalugit napparsimasut katsorsartariallit
qaqugukkut pisariaqartitsinerat apeqqusersinnaanngilavut.
Taamaammat pisariaqartitsisut taakkuupput katsorsartariallit,
taamaattumillu aqukkuminaatsoq taanna allatut ajornartumik taamatut
ingerlasimavoq.
Taamaammat Naalakkersuisutuut pissangassutigaarput Inatsisartut qanorpiaq
Peqqinnissaqarfiup siunissaq ungasinnerusoq qiviarlugu
aaqqissuuteqqinneqarnissaanut tunngasumik eqqarsaatigut aammalu pilersaarutivut
kingusinnerusukkut saqqummiukkumaakkavut pillugit qanoq isumersorumaarnissaat
assut qilanaaralugu utaqqissaagut.
Maannakkumut pisariaqartitsineq tunngavigalugu ingerlatseriaaseq
aqutsinerlu ingerlanneqartuassappat aningaasaliissuteqartuartarnerit
annerusumik saneqqunneqar-sinnaagunanngillat. Kisiannilu oqarlutalu taava
aningaasat aningaasaliissutillu taakkua iluanni ingerlatsineq aqutsinerlu
ingerlanneqassappat allatut ajornartumik soorunalimi pingaarnersiuvilluni
tulleriissaarinerit tunngavigalugit aammalu siunnerfiit suuneri Inatsisartuni
aaliangerneqarumaartussat aallaavigalugit Naalakkersuisuni tamanna
najoqqutaralugu sulinissaq ingerlalernissaa eqqarsaatigaarput.
Taamaattumik Siumup oqaaseqartuata oqaatigigaa, soorunalimi
Peqqinnissaqarfiup ingerlanneqarnerani kiffartuussisinnaanerit assigiinngitsut
killeqanngiusartumik ingerlaannar-sinnaanngillat, kisiannili pinngitsooratik
killeqartariaqarlutik.
Ataatsimoortumik partiit oqaaseqartuini erseqqissaatigerusutakka ukuupput:
Immikkut aqukkuminaatsoq, konto taanna, Danmarkimut
suliaritikkiartortariaqartartut pillugit.
Ukiuni qaangiuttuni Inatsisartuninngaanniit naatsorsuutit
kukkunersiorneqarsimasut tunngavigalugit kisitsisit ukua
erseqqissaatigilaassavakka: 1995-mi Danmarkimut Islandimullu
suliaritikkiartortarsimasut aningaasartuutigineqarsimapput katillugit 53.200.000
kr.sinnerlugit. 1996-milu Danmarkimut Islandimullu suliaritikkiartortariallit
60.800.000 kr. sinnerlugit aningaasartuutaasimapput. 1997-mi 63.360.000 kr.,
1998-mi 8,5 million kr. taakkartorneqartut uterfigilaassavakka taakkua
ilanngukkaanni 68 million kr., 1998-mi immikkut aningaasartuuteqarsimavugut.
1999-mi 8,5 million kr. peereerlugit 72 million kr. -nissaat maannakkumut
taamatut inissisimapput.
Taamaattumik ilumoorpoq partiit uparuartuinerat, tassalu ukiuni kingullerni
immikkut katsorsartariallit, Danmarkiliaallugit katsorsartariaqartut
taakkununnga aningaasartuutigisavut qaffariartuaarsimammata. Taamatullu
qaffariartuaarnerat soorunami aamma Naalakkersuisunin-ngaanniit
nakkutigilluarlugit ingerlattuarnissaat pingaartipparput.
Partiit atatsiakkaat oqaaseqartuinut ukua erseqqissaatigilaarusuppakka:
Siullermik Siumukkut oqaaseqartuata oqaatigivaa Peqqinnissaaqarfiup
aqunneqarnera oqitsuinnaanngitsoq, kisiannilu aamma taassuma iluani piaartumik
nalilersuisoqarnissaa sapinngisamik sukangasuumik aningasartuutinik
aqutsinikkut apparsaatissanik aqqutissiuussiniartoqarnissaa tassani
kaammattuutigivaa. Eqqaareerpara Naalakkersuisunut, neriuutigaarpullu matumani
ukiaanerani Inatsisartut ataatsimiinnerat naatinnagu maanngaanniit
pilersaarummik saqqummiussisinnaa-jumaarluta. Ilaatigut tamakkununnga
attuumassuteqartunut.
Qujassutigissavara Siumukkormiut oqaaseqartuata nammineq paasinnilluni
eqaatsumik nalilersuisarnissaq peqataaffigiumallugu oqaaseqarmat, tamanna
Naalakkersuisuninngaanniit qujassutigissavarput.
Atassutikkormiut oqaaseqartuanut: Danmarkimut
suliaritikkiartortariaqarsimasut ilaatigut Rigshospital-imut aningaasat
akilertariaqarsimasut 8,5 million kr. Taakkua, soorunalimi Inatsisartut
kukkunersiuinermi ataatsimiititaliaanni misissoqqissaarneqarnissaat uagut
akornu-tissaqarfiginngilarput. Taamaattumik ilissi nammineq taamatut
siunnerfeqarnersi isumaqarpunga pissusissamisoortoq.
Atassutikkormiut oqaaseqartuata taakkartorpai Peqqinnissaqarfimmi nakorsat
immikkut ilisimasallit aammalu piginnaassusillit pissarsiariuminaatsoruit
taakkua, qanormitaavami ilillugit pissarsiarisinnaalissagatsigit nunap
immikkoortuini qitiusumik napparsimaveqarfiit marluk allat pilersereernerisa
kingorna.
Naalakkersuisuni siunertaqanngilluinnarpugut Peqqinnissaqarfimmi kiffartuussinerup
ajorseriarnissaa siunertaralugu maannakkut pilersaarusiorluta,
taamaattoqanngilaq.
Inatsisartut nammineerlutik siunnerfiginikuusaat naapertorlugu
Naalakkersuisuninngaanniit suliat ingerlateqqippavut. Tamanna tunngavigalugu
nunap immikkoortuini qitiusumik napparsimaviit maannakkorpiaq qanittukkut
aaliangersaavigineqarnissaat nukinginnarmat pisussaq
erseqqissaatigeqqiinnassavara naqissuseqqillugulu. Takorluunngilarput
Naalakkersuisu-niit imatut pisoqqassasoq: Nunap immikkoortuini qitiusumik napparsimaviit
marluk tassalu kujataani Qeqertarsuullu tunuani taakkua atilernerisa
kingunerissagaa, Droning Ingrid-ip Napparsimavissuani nakorsat immikkut
pilattaasinnaasut amigaatiginerulernissaat.
Naalakkersuisuni siunertarivarput taamatut nakorsat immikkut ilisimasallit
aammalu piginnaassusillit taakkua qaqugukkulluunniit nunatta iluani imminnut
unammilleratik kisiannili imminnut ikioqatigiillutik tapertariillutillu
sulilernissaat tassani eqqarsaatigigatsigu.
Inuit Ataqatigiit oqaaseqartuannut oqaatigerusuppara, ilumoormat ullumikkut
peqqinnissaqarfimmi aningaasartuuterparujussuit ajuusaarnaraluartumik
ilarparujussui inuup namminerisamik pisuussutigisaanik ajutoortarnernik
ilarpassuaqarmata. Tamakkuuppullu Naalakkersuisuninngaanniit iluatigeqisagut
tassami tamakkua annikillisarneqarsinnaasuuppata soorunalimi
aningaasartuutissaagaluit, tamakkununnga atugassaagaluit allanut
pisariaqartitsi-nerusunut atorneqarsinnaalissagaluarmata.
Taamaammat Inuit Ataqatigiit oqaaseqartuata uparuartugai eqqumaffigivagut,
aamma neriuppunga Inatsisartuni partiit allat tamakkua arlaatigut
oqilisaaffiginiarlugit iliuuserisinnaasatsinnik Naalakkersuisuninngaanniit
aamma siunnersuutinik takuttoqartaru-maartoq.
Kiisalu Peqqinnissaqarfiup aaqqissuussaanerata allanngortsinneqarnissaa taakkartoreerakku,
oqaatigeqqilaaginnassavara aningaasaannaviit naalagaralugit Peqqinnissaqarfik
aqulissagalu-arutsigu soorunalimi taannartaa aappaatigooqarmat. Taanna
eqqaasitsissutigilaaginnassavara.
Naalakkersuisuninngaanniit aqutsinerup Peqqinnissaqarfimmut
aningaasaliissutit illersorsinnaasumik atortuarlugillu aqunneqarnissaat
tunngavigalugu sulineq ingerlapparput.
Kattuseqartigiinnut: Mogens Kleist-ip oqaaserisaanut. Uparuarmagit
qallunaat nunaannut aallartitsisarnerit pitsaanersumik aaqqissuunneqartariaqartut,
taamaalillutillu aningaasartuutissat sippornagit aningaasanik ingerlatsineq
ingerlanneqassammat.
Naalakkersuisuninngaanniit soqutigaarput Kattusseqatigiit tamatuma
tungaatigut qanorpiaq eqqarsaateqarnersut tusarusussallugit. Aallartitsisarnerit
pitsaanerusumik aaqqissuunne-qartariaqartut, aallartitsisarnerit
aallartitsisariaqarnerillu taakkua tamarmik maleruagassaqarput ullumikkut.
Maleruagassat naapertorlugit napparsimasut peruluttut, aammalu qanoq
perulutsiginerat tunngavigalugit nakorsat naliliinerat aallaavigalugillu
ingiaqateqartinne-qartarnerat tamarmik ingerlataapput.
Arlaatigut qanoq pitsaanerusumik aaqqissuunneqartariaqarnerannik
tunngasunik ilissinninngaanninngaanniit qaqugukkulluunniit
siunnersuisoqarsinnaanera, taanna tikilluaqqussaqaara.
Napparsimasut Danmarkimut suliaritikiartotariaqartut, taakkuupput
Naalakkersuisuninngaanniit aqunnerorusukkalugarlugit kisianni
aqussinnaanngisavut, tassami ullumikkut nakorsas-saaleqivugut,
niviarsiassaaleqivugut ernisussiortussaaleqillutalu.
Tamakkua pillugit ippassaq Inatsisartut peqqinnissamut ataatsimiititaliaat
ilisimatitsis-suteqarfigisimavara, taamaattumik taakkua annerusumik maani
ataasiakkaarlugit immikkut taakkartornianngilakka.
Lise Skifte Lennert, Ilinniartitaanermut Ilageeqarnermullu
Naalakkersuisoq:
Siullermik Inuit Ataqatigiinninngaanniit Asii Chemnitz Narup-ip ujartugaa,
ukiuni atuarfiusuni kingullerni tallimani immikkut annertusisamik
atuartitsinerup iluani meeqqat taamatut pisariaqartitsilersimasut
malunnaatilimmik qaffassimanerannut, tassani Asii Chemnitz Narup ujartuivoq
sumik ersiutaanersut taakkua.
Tassunga tunngatillugu paasissutissatut tunniussinnaavara
peqqussutaasinnaasunik tamatigoortunik qulaajaasoqarsimanngimmat, kisiannili siunnersuisarfiit
PPR-it ittuisa naliliigallarnerminni imatut nassuiaataasinnaasut
taasimammatigit, taamaalilluni meeqqat taama amerliartorsimasut
pisariaqartitsilersimanermik amerliartorsimanerannut.
Siullermik Danmarkiminngaanniit innarluuteqartut nunatsinnut meeqqat
inuusuttuaqqallu angerlartiortulersimavagut, taavalu taanna malitsigalugu
taamatut Danmarkimut ingerlatinneqartartut ikiartorsimanerannut. Tassalu
ajornartorsiutit taakkua iluanni nunatsinni aaqqinniartariaqalersimavagut,
taakkulu malunnaataasimapput ukiuni kingullerni tallimani.
Eqqutaasinnaasut aappaattut taaneqarsimavoq: Atuarfiit siunnersuisarfiillu
PPR-it allaffeqarfii ukiuni taakkunani malitsigisaannik pikkorinnerulersimapput
kursuertarnerit allallu aqqutigalugit meeqqat immikkut ajornartorsiutillit
paasiniaaffigissallugit, aammalu ajornartorsiuteqarneranni malittaasumik
misissorneqarsinnaanissaat angulertornerusimavaat.
Kiisalu peqqutit kingullersaattut taaneqarsimavoq meeqqat
naammaginanngitsumik angerlassimaffimminnit isumagineqanngitsut malunnartumik
amerliartornerat.
Ilanngullugu taasinnaavara siunnersuisarfimmi avannaani PPR Nord, tassani
allaaserineqarsimammata atuartut 100-gaangata ajornartorsiuteqarlutik immikkut
annertusisamik atuartinneqartariaqalersimasut, taakkunannga 55 %-ii
inunnguutsiminnik innarluuteqarnertik pillugu taamatut
pisariaqartitsisarsimasut. 20 %-iilu inuunerminni atugarisatik pillugit
immikkut annertusisamik atuartinneqarnissaminnik pisariaqartitsisimasut.
Kiisalu kingulliit 25 % taakkua siulliit taariikkakka ataatsimoortillugit,
peqqut tassaniissimavoq.
Mogens Kleist-ip Kattusseqatigiinninngaanniit ujartorpaa
Namminersornerullutik Oqartussat Ilinniartitaanermut Qarasaasiaqarianni
qarasaasianut aaqqiiniarneq erloqinarnerarlugu, kissaateqarlunilu piaartumik aaqqiisoqarnissaanik.
Tassunga tunngatillugu oqaatigisinnaavara, ullut suliffiusut tallimat
Ilinniartitaanermut Qarasaasiaqarfik matoqqasariaqarsimammat saliillutik
aaqqissueqqillutilu, tassa taamatut ajornartorsiutip qaangipallannissaa
angulertorniarlugu.
Jonathan Motzfeldt, Naalakkersuisut Siulittaasuat:
Ilassutigilaassavakka EDB-mut tunngatillugu, issarli aamma aappaagumut
aningaasartuutit pillugit nassuiaammi, saqqummiussinermi nassuiaatigisakka
erseqqissaatigilaarlugit.
Tassani oqaatigaara EDB-mi pissutsit 1993-minngaanniit aallartittut
1995-milu tamakkua pillugit ingerlaqqinnissamut tunngavissiuinerit, tassa
Politisk konomisk Kontoriminngaanniit suliarineqarsimasut. Naammattumik
naammassineqarsimanngitsut nalitsinni uanga naammattoorsi-magikka, taamaattumillu
aaqqiiniarnerit maannakkut iluarsiniartut iluarsiniarlugilu sulinerit, aamma
tatigalugit tassani sulisut. Qularinngilara iluarsissallugit maannakkut
periarfissaqartugut. Taakku issarli oqaatigereerakkit annertunerusumik
oqaatigeqqissanngilakka, aamma nutaarsiaanngillat Inatsisartuni EDB-mut
tunngasut taamaalillutik pingaartumik ukuni arlalinni
malinnaaffiginnissimasunut. Aatsaat maannakkut ajornartorsiutaanngillat,
maannakkut aaqqilerput, aaqqinnissaallu suliaralugu naammassilerpoq.
Ukioq 2000-mut ajornartorsiutaasinnaasut, maannakkut ajornartorsiutinik
takusassaqanngilagut piareersarnerit pissusissamittut ingerlapput, taannalu
aamma siusinnerusukut oqaatigisimavarput.
Ilinniartitsinerit EDB-mik atuisuni Hjemmestyremi maannakkut
pilersaarusiorneri ingerlannerilu pissusissamittut ingerlapput. Aamma
tassuunakkut alaatsinaassinissaq pisariaqartissimavarput.
Tassami Namminersornerullutik Oqartussat, KNI aammalu Tele allallu
ingerlatsivissuit namminneq EDB aqutaminnik ingerlataqarput, naammaginartumik.
Aamma uagut maani naammaginartumik aaqqiinissarput qularineqassanngilaq.
Piffissarli annerusimavoq aamma akitigut ajornartorsiornarsimalluni sukkasuumik
natorsuinissat.
Kia akisussaaneranut tunngasut pillugit: Allakkiaq sisamanik qupernilik
Aningaasaqarnermut Ataatsimiititaliamut nassiussaqarsimavoq 30. septemberimili,
taannalu udvalgip tigummissagaa naatsorsuutigaara. Tassani
erseqqissaatigineqarput, ilaatigut taamanikkut EDB-mi qullersaasumut
tunngatillugu ajornartorsiutit maani oqaluttarfiminngaanniit pinnagit,
paasissutissat tassaniittut udvalgimi erseqqissaatigineqarsinnaallutik.
Taamaattumik tassani suliassap inerniarnera pimoorullugu aammalu
aqussinnaallugu inerniarne-qartoq uanga nammineq qularutiginngilara.
Oqaaseqartut allat oqaaseqarfiginagit Qimaasunut tapiisariaqarsimanerput
pillugu oqaatigissavara periuseq Namminersornerulerlutali ingerlaleratta
katersiuiniarnerni taamaattuni atortarsimasarput naatsorsuutigalugu aamma taama
neriorsuisimavugut.
Kisianni Kattusseqatigiit tamanna akerlerigunikku, taamaaliortarneq
siunnersuutigisinaavaat atorunnaarseqqullugu, kisianni qularutigineqassanngilaq
uagut tamatumunnga Siumumin-ngaanniit akerliulluinnarumaartugut.
Anders Nilsson, Atassut:
Pisariaqarpoq Naalakkersuisut Siulittaasuat oqarfigissallugu manna
EDB-mut tunngas-suteqanngimmat. Kisianni aningaasat
akuersissutigineqarsimanngitsut atorneqartarnerannut tunngavoq, taavalu
Aningaasaqarnermut Ataatsimiititaliamut nassuiaariarluni allanik allanut
nassuiaateqartarneq. Taanna Atassummut naammaginanngilaq, kisiannili EDB-mut
pissuteqartunut tunngassuteqarani.
Mogens Kleist, Kattusseqatigiit:
Qarasaasianut tunngatillugu ukiut arlalinngorput kinaana akisussaasoq?
Taannaana paaserusukkipput. Aningaasanik matussusiiniaannaavilluta ilioraagutta
sumut iluaqutaassava, kiisa Ukioq 2000-inngulerpoq aaqqilerpoq, aaqqilerpoq,
aappagumut pissaagut immaqa aaqqissimanngitsut. Isumaqarpunga taanna
eqqumaffigisariaqaripput.
Alfred Jakobsenimut, takusarpakka tusartarpakkalu kalaallit arlallit
Danmarkiliaraluarlutik suliaritikkiartortut, Kalaallit Illuanniittarput
ullorparujussuit suliarineqaratillu utertarput. Sooq Kalaallit Illuaniit
Rigshospitalimullu tunngatillugu pilattaavissat ullut suli
aaqinneqarsimanngimmata utertarput.
Nalunngilara maleruagassaqartusi taamatut Danmarkiliartitsisarnermi,
kisianni isumaqarpunga sukumiinerusumik aaqqiisoqarsinnaappat aningaasatigut,
taamaalilluta sipaarsinnaavugut arlalinnut. Tusartarpakka ukiumut immaqa
ilarsui marloriarlutik Danmarkiliartartut taamatut, kisiannili suliaritigatik
utertartut.
Jonathan Motzfeldtimut oqassaguma, uagut akerliunngilluinnarpugut
katersuiniarnernut, kisianniuku aningaasat akuersissutigineqarsimanngitsut
qulaqqeerneqartariaqartut Finansudvalgimut, akerlerinngilluinnarparput.
Josef Motzfeldt, Aningaasaqarnermut Naalakkersuisoq:
Siullermik akissuteqarninni Kattusseqatigiinninngaanniit akitsuutit
akileraarutillu malunnaateqartumik qaffakkiartorneri ajuusaarnartutut
oqaatigineqarmata, nassuiaateqarfi-ilaassavara massakkut Landskarsip
isertinnerusassaasut 40 millioningajalluinnaat aningaasanut ilassutitut
inatsisissakkut saqqummiunneqarput.
Taakkunannga Nunap karsianut 25 millionit akileraarnerunikkut,
akileraarutit qaffanneqanngimmata, Kattusseqatigiinnut
eqqaasitsissutigissavara. Innuttaasut akileraarneruneratigut 25 millioninik
1999-mi isertitsinerusussasugut paasinearpoq.
Tamanna nuannaajallannartutut isigisariaqarpoq, tamanna isumaqarmat
aningaasarsiornikkut isertitaqarnerusimaneq innuttaasuni tunngaveqarmat.
Tassungalu ilanngullugu eqqaasistsissutiginngitsoortariaqanngilaq Landskarsi
isertitsigaangat taamatut akileraarne-unikkut, akileraarutit
qaffanngikkaluarlugit, marloriaataasa missarluinnaat kommuninut aamma
isertitsinerutaasarmata.
Nunap Karsianut akileraarnerunikkut 25 millionit isertinneqarsimasut
kommunini 50 miillionit palillugit isertitsinerunikkut kinguneqarsimassasut
naatsorsuutigineqartariaqarpoq.
Landskarsip isertitaqarneruneranut ilaapput nioqqutissanik eqqussuinermi
9,5 million kr.-nit tassa akissaqarsorisut biilinut, snescooterinut
pisiortornerunermikkut 9,5 million kr.-nit akilerpaat, taavalu motorafgift
biileqarnermut millionit qeqqi isertinneqarnerusimasussatut paasinarsipput.
Niuernerunermi naqissusiinermi isertitat 2 million kr.-upput, taavalu
assartuinerup annertusisimanera assartuinermut procenti akiliutigineqartartoq,
akinut assartuinermi nalimmassaarutitut isertinneqarnerusussat 2,5 million
kr.-iupput, tassa imaappoq nioqutissat amerlanerusut nunatsinnut eqqunneqarsimammata.
Taamaammat akitsuusiiniaannarluni akitsuusiinermik taaneqarsinnaasut
allisitsiuserluni takuneqarsinnaasutut uani oqaatigineqartariaqarput.
Kattusseqatiinniit Mogens Kleist-ip aappassaaneerluni oqarneranut
tunngatillugut, suliaritikiartortut utiinnaqqittariaqarsimasut, tassani
kukkussutaasarsimasinnaasut arlaqartut ujartorneqartariaqartut nalunngilara
Peqqinnissamut Naalakkersuisup sulissutigigaa.
Tassanilu ilaatigut Rigshospitalimut isumaqatigiissuteqarsimaneq,
nalunaarfigineqarneq najoqqutaralugu Danmarkimukareeraluartut ilaatigut
utiinnartariaqartarsimappata tamanna aningaasatigut Rigshospitalimullu
isumaqatigiissuteqarnermik qanoq iluarsiisariaqarnersugut Peqqinnissamut
Naalakkersuisup sunniutigivai.
Pisariaqanngitsumik tappavunnartitsineq ilumut uagut akilertassaneripput
imaluunnit Rigshospitalimi kukkuluttornikkut sulisullu periarfissaarunneratigut
utiinnartariaqartarsimappata tamakkua aaqqinniartariaqarput.
Kiisalu qarasaasiaqarnermut tunngatillugu Naalakkersuisut Siulittaasuata
nassuiaatigeriigaanut atatillugu: Suliassaq taanna pappialarparujussuarnik
ilaqarmat inassutigeruppara apeqqutip taassuma Aningaasqarnermi
Ataatsimiititami aappassaaneerinninnissamut suliarissagaat
Nassuiaatit arlaqarput, ilumoorpoq, taakkua naapiffissarsiorariaqarput.
Aamalu Aningaasaqarnermut Ataatsimiititamik partiit tamarmik Kattusseqatigiilu
ilaasortaatitaqarmata, isumaqarpunga suliassaq taanna maani
annertuuliuutigeqqinngikkaluarlugu Ataatsimiititami inaarneqarnissaa
tulluarnerussasoq.
Ullumikkut suliarivarput ilassutitut aningaasaliissutinut inatsissap
aappassaat, oqaluttuarisaanermi naggataarutaasumik. Massakkummi ippassaq
oqaluuserineqartutut missingersuusiortarnermi inatsit akuerineqassappat,
ataatsimiinnermi matumani, ilassutitut aningaasaliissutit ullumikkutut
ingerlanerat tassunga killeqartussaavoq.
Oqaluuseqartarnivut tassunga tunngasut soorunami arpaallaataassapput maani
oqallittarnerit pisariillisaanerit najoqqutaralugit
atorunnaartussanngussammata.
Jrgen Wver Johansen, Siumut:
Inatsisartut aningaasaliissutissatut ilassutitut inatsisissaattut
siunnersuutip aappaanut tunngatillugu: Inatsisartut oqaluuserinninnerminnut
tunngatillugu, maluginiarpara Aningaasaqarnermut Ataatsimiititaliap
aappassaaneerneqartinnagu sulinerminut atatillugu immikkut eqqumaffigisassaatut
Inatsisartuni taakkartorneqartut immaqa eqikkakannissagaanni
oqaatigineqarsinnaasut tassaapput: Siullermik qarasaasiaqarnermut tunngasut,
aningaaserivitsigut kiffartuunneqarnerput pillugu aammalu Peqqinnissaqarfimmi
aningaasanik atuinermut tunngassuteqartut kiisalu aamma Siumup taakkartugaa
sulisoqarnermut tunngatillugu.
Erseqqissaatigissavarali Kattusseqatigiinniit uani oqaaseqaateqarnerminni
allaganngorlugu agguaanneqarsimasumi oqaatigineqartut, eqqoqqissaanngimmat
tassa Kattusseqatigiinniit oqaatigivaat:Naalakkersuisut Siulittaasuata
Qimaasunut check-imik tunniussinera Aningaasaqarnermut Ataatsimiititaliaq
akuersiseqqaarnagu. Taanna eqqunngilaq, checkimik tunniussineq soorunami
Aningaasaqarnermut Ataatsimiititaliamit akuersissutigineqaqqaarluni
tunniunneqarpoq, kisiannili Aningaasaqarnermut Ataatsimiititaliamit uparuaaneq
pivoq, Qimaasunut check-imik taanna neriorsuutigineqarmat
akuersissutigineqaqqaarnani, taanna erseqqissaas-sutigaara.
Kisianni isumaqanngilanga annertuuliuutigineqartariaqartoq, tassami
malunnarmat Inatsisartunit tamanit Qimaasunut checki tunniunneqarnissaa
isumaqatigineqartoq.
Mogens Kleist, Kattusseqatigiit:
Saqqummiininni qaangersimagunarakku Josef Motzfeldtip oqaatigisaanut
tunngatillugu: Akileraarutitigut isertitassanut tunngatillugu takusinnaavarput
isertitassat 1999-mut annertuseriarsimasut. Tassani nalunngilarput ukiat
tamaasa akitsuusiinikkut innuttaasut eqqorneqartarmata. Imaappoq
akitsuusiisarpugut biilinut tupanut assigiinngitsunullu, taakkuuku eqqarsaatigigikka.
Jrgen Wver Johansen-ip oqaasiinut tunngatillugu, oqaaseqarnera
isumaqatigaara, kisianni isumaqarpunga pissusissamisuussasoq arlaatigut
aaqqiisoqarsinnaappat, Naalakkersuisut Siulittaasuat taamatut pisoqartillugu,
katersuiniarnerni, immikkut pisinnaatitaaffeqassasoq Finansudvalgi
qinnuigeqqaarnagu, kisianni paasitillugu taamatut iliortaruni.
Lars Karl Jensen, ataatsimiinnermik aqutsisoq,
Siulittaasoqarfimmi ilaasortaq:
Tassalu taamaalilluta siullermeerinninneq naammassivarput,
aappassaanneerneqannginneranilu Aningaasaqarnermut Ataatsimiititaliamut
ingerlateqqinneqassaaq.
Oqaluuserisaq naammassivoq.