Oqaluuserisassani immikkoortoq 15-3 |
|
||
| Siullermeerneqarnera | Aappassaanneerneqarnera | Pingajussaaneerneqarnera | |
Tallimanngorneq 29. oktoberi 1999
nal. 16.24
Ataatsimiinnermik
aqutsisoq: Finn
Karlsen, Atassut, Siulittaasoqarfimmi ilaasortaq.
Jørgen Wæver Johansen, Siumut, Aningaasaqarnermut
ataatsimiititaliap siulittaasua:
Qinnutigissavara
isumaliutissiissut naalisarlugu saqqummiukkusullugu.
1999-imut Inatsisartut
ilassutitut aningaasaliissutinut inatsisissaasa aappaannut siunnersuut pillugu,
Inatsisartut aningaaqarnermut ataatsimiititaliaata ilassutitut
isumaliutissiissutaa pingajussaaneerinermi matumuuna saqqummiunneqassaaq.
Inatsisartut aningaasaqarnermut
ataatsimiititaliaat suliarinninnermini ukuninnga inuttaqarpoq:
Inatsisartuni ilaasortaq Jørgen
Wæver Johansen (S), siulittaasoq, Inatsisartuni ilaasortaq Asii C. Narup (IA),
siulittaasup tullia, Inatsisartuni ilaasortaq Per Berthelsen (S), Inatsisartuni
ilaasortaq Anders Nilsson (A) aamma Inatsisartuni ilaasortaq Mogens Kleist (K),
Inatsisartuni ilaasortamut Anthon Frederiksenimut sinniisussatut.
Inatsisartut ulloq 20. oktober
1999-imi ataatsimiinnerminni siunnersuut ataatsimiititaliamit nutaamit
suliarineqaqqullugu innersuutereermassuk, aningaasaqarnermut ataatsimiititaliaq
ulloq 23. oktober 1999-imi ataatsimiinermini siunnersuut sulereqqippaa.
Soorluttaaq ataatsimiititaliap ulloq 25. oktober 1999-imi Peqqinnissamut
Naalakkersuisoq aamma Inuussutissarsiornermut Naalakkersuisoq
isumasioqatigigai.
Naalakkersuisut ulloq 23. oktober
1999-imi allannguutissatut siunnersuutinik qulinik nassiussaqarput, taakkulu
isumaliutissiissummut matumunnga ilanngunneqarlutik. Aningaasaqarnermut
ataatsimiititaliap allannguutissatut siunnersuutinut inassutigisai
allannguutissatut siunnersuutit ataasiakkaat kingorna, kingornatungaanni takuneqarsinnaapput.
Naalakkersuisut allannguutissatut
siunnersuutaasa kingunerissavaat 1999-imi IST-imut angusassamit 7,7 mio.
kr.-inik pitsaanerusumik angusaqartoqarnissaa. Tamatumalu kingorna ukioq manna
IST-mut angusaq, tassaalersussaalluni amigartoorut 44,1 mio. kr.-inik
aningaasartalik.
Inatsisartut aningaasaqarnermut
ataatsimiititaliaata oqaatigissavaa IST-mut pitsaanerusumik angusaqarneq
makkuninnga pissuteqartoq:
Siulleq. Akitsuutit pillugit Inatsisartut
inatsisissaata allanngortinneqarnerata kinguneratut akitsuutit 3,5 mio.
kr.-inik qaffariarnerat, Inatsisartut ulloq 6. oktober 1999-imi
akuersussutigisaat.
Aappaat. KNI Pilersuisoq A/S-imi
ingerlatseqatigiiffiup nioqqutissanik uninngasuutaasa nalingisa amerlinerisa
kingunerisaanik 929.000 kr.-inik taassuma utertillugit akiligai.
Pingajuattut. Assagiarsunnik
pisat tunineqartarneraninut tapiissutinut aningaasaliissutit 4 mio. kr.-inik
appartinneqarneri.
Sisamaat. Peqqinnissaqarfimmi
nakorsanik sullinneqarnermut aningaasaliissutit 300.000 kr.-inik
appartinneqarneri.
Kiisalu tallimaat. Aamma Qaanaami
nunap immikkoortuanut timmisartunut suluusalinnut mittarfiliornernut
Naalagaaffiup aningaasaliissutaasa 1,8 mio. kr.-inut nuunneqarneri.
Taamaalilluni Naalakkersuisut
allannguutissatut siunnersuutaanni aningaasartuutit 2,8 mio. kr.-inik
qaffariaateqarput, taakkulu sulliveqarfimmut tapiissummut 1,5 mio. kr.-inut
aamma piffissami sivikitsumi taartaanermut aningaasartuutinut - tassa
nakorsanut 1,3 mio. kr.-inut qaffariarnerannut agguataarneqarlutik.
1999-imut Inatsisartut
ilassutitut aningaasaliissutinut inatsisissaasa aappaannut siunnersuummut
Naalakkersuisut allaanngutissatut siunnersuutaat.
Aningaasaqarnermut
ataatsimiititaliap Naalakkersuisut allannguutissatut siunnersuutaannut tamanut
inassuteqareernikuuvoq, matumanilu Naalakkersuisut allannguutissatut
siunnersuutaat marluk taamaallaat taasaqarfigissavakka.
Tassalu allannguutissatut
siunnersuutit nr. 25 aamma nr. 26.
Allannguutissatut siunnersuut nr.
25 tunisinermi akinut tapiissutit aalisarnermut tunngassuteqartut. Nunarsuarmi
tuniniaavinni assigiarsuit piumaneqaleraluttuinnarput.
Tamatuma kinguneraa tunisinermi
akit niuerneq tunngavigalugu qaffakkiartorneqarnissaannut tunngavissaqalerneq.
Taamaalilluni nalilerneqarpoq assigiarsunnik aalisartunut nunamilu
aalisakkerivinnik suliassanngorlugu tunissisartunut akinut
tapiissuteqartarnissaq pisariaaruttoq, taamaalimmat naatsorsuutigeqalerpoq
ulloq 1. november 1999-imiit atuutilersumik assagiarsuit tunisaanerannut
tapiissuteqartoqartarunnaassasoq.
Aningaasaliissutit 4 mio.
kr.-inik appartinneqarnissaat qinnutigineqarpoq, tunisinermi tapiissut
naatsorsuutigineqartutut peerneqarnerisa kingunerisaattut appariaat
qinnutigineqarpoq, aammalu missingersuusiatigut atukkamut sanilliullugu
atuinermi allannguutit allat kingunerisaattut.
Taamaammat maannakkut
missingerneqarpoq katillugit 4 mio. kr.-inik atuinikinnerusoqassasoq.
Aningaasaqarnermut ataatsimiititaliap inassutigaa aningaasaliissutit
appartinneqarnissaat akuersussutigineqassasoq.
Allannguutissatut siunnersuut nr.
26, ataasiaannartumik tapiissutit illoqarfimmut tunisassiorfimmut
tunngassuteqartoq. Suliffeqarfimmut ilaatigut tunissassiat
pingaaruteqannginnerusut, iluaqutigalugit ingerlatsinermi tunngaveqartumut
tapiinissaq siunertaralugu 1,5 mio. kr.-inik aningaasaliissuteqartoqarnissaa
qinnutigineqarpoq. Aningaasaliinikkut ilaatigut qulakkeerniarneqassaaq,
Danmarkimi kalaallinut atuisartunut puisinit tunisassianit
nioqquteqalertoqarsinnaanera. Aningaasaqarnermut ataatsimiititaliap inassutigaa
aningaasaliissummut qaffariaat akuersissutigineqassasoq.
Aningasaqarnermut
ataatsimiititaliaq pinngitsoorumanngilaq oqaatigissallugu qinnuteqaat
eqqarsarnartoqartikkini, isumasioqateqareernermili ataatsimiititaliaq Sisimiut
Food A/S-imit pisut immikkorluinnaq ittut paasilluarpai. Isumasioqateqarnermi
ilaatigut ilisimatitsissutigineqarpoq tapiissutit EU-mit akuersissummit
pissarsinissaq siunertaralugu nunani EU-miittuni nioqqusianit
nioqquteqarsinnaajumagaanni sulliviup pisinnaasaasa qaffatsinneqarnissaannut
allamut atornagit atorneqassasut.
Aningaasaqarnermulli
ataatsimiititaliap erseqqissassavaa ataatsimiititaliaq isumaqartoq qinnuteqaat
allakkoorlugu suliarineqarsimasariaqaraluartoq. Ataatsimiititaliallu erseqqilluinnartumik
naatsorsuutigigaa sullivimmut aalajangersimasumut tapiissuteqarnissamik
Naalakkersuisut naggammik qinnuteqaateqartut.
Aningaasaqarnermut
ataatsimiititaliaq ilanngullugu oqaatigiumavaa, ataatsimiititaliap
inaasuteqarneranut tunngaviusoq, tapiissutit tunniunneqalinnginnerini
ingerlatseqatigiiffiup nammineerluni 2 mio. kr.-init pissarsiariniassagai.
Aamma Naalakkersuisut isumagissagaat tapissuussutit ingerlatseqatigiiffiup
illutaasa qularnaveeqqusiunneqarnerannut pingaarnerpaatitatut nalunaarsorneqarnerannut
qulakkeerutaasussat.
Aningaasaqarnermut
ataatsimiititaliap inassuteqaataa, taamatut oqaaseqarluni aningaasaqarnermut
ataatsimiititaliap isumaqatigiittoq inassuteqarpoq 1999-imut Inatsisartut
ilassutitut aningaasaliissutinut inatsisissaasa aappaannut siunnersuut,
aappassaanneerneqareerluni iluserileriikkamisut Naalakkersuisut
pingajussaaneerinermi allannguutissatut siunnersuutaasa
akuersissutigineqarnerisigut akuersissutigineqassasoq. Qujanaq.
Johan Lund Olsen, Ataatsimiinnermik aqutsisoq, Inatsisartut
Siulittaasuat:
Ja, qujanaq. Taavalu maannakkut
aningaasaqarnermut ataatsimiititaliap isumaliutissiissutaannut
akissuteqaqqaassaaq Aningaasaqarnermut Niuernermullu Naalakkersuisoq, Josef
Motzfeldt.
Josef Motzfeldt, Aningaasaqarnermut Niuernermullu
Naalakkersuisoq:
Aallartitsinnaga
ilisimatitsissutissavara nalinginnaasumik Naalakkersuisut akissuteqaataannut
ilassummik uiggiullugu akissuteqaataammik saqqummiussaqalaarnissara
pilersaarutigigakku.
1999-imi ilassutitut
aningaasaliisutinut inatsisissat aappaannut siunnersuutip
pingajussaanneerneqarneranut aningaasaqarnermut ataatsiititaliap
isumaliutissiissutaa Naalakkersuisuni tiguarput, Naalakkersuisunilu
nuannaarutigalugu takusinnaavarput allannguutissatut siunnersuutit
Naalakkersuisuneersut quliusut tamarmik akuersissutigineqarnissaat
aningaasaqarnermut ataatsimiititaliamit inassutigineqartoq.
1999-imi ilassutitut
aningaasaliissutinut inatsisissat aappaannut siunnersuut inassutigineqartutut
aammalu taamatut isikkoqarluni akuersissutigineqarpat, amingartoorutit
44.183.000 kr.-niussapput, tassa aappassaaneerneqarneranut sanilliullugu
angusat 7,7 mio. kr.-inik pitsanngoriaateqassallutik.
Angusat pitsanngoriarnerannut
annermik pissutaaqataapput akitsuutit qaffaataat oktoberip 20-ani
Inatsisartunut akuersissutigineqartut, taakkununngalu ilanngunneqassapput
saattuat tunineqarneranut tapiissutit 4 mio. kr.-inik appartinneqarnerat,
kiisalu Qaanaami mittarfiliornermi Naalagaaffiup akileeqataassutai, ukiormanna
1,8 mio. kr.-inut Naalagaaffimmit nalunaarutigineqartut.
Aningaasartuutit amerlissutaat
eqqarsaatigalugit qaammatini decemberimi januarimilu naammattunik
nakorsaqarnissaq qularnaarniarlugu peqqinnissaqarfimmut immikkut
aningaasaliissuteqartoqarnissaanik Naalakkersuisut siunnersuuteqarput.
Tamatumalu saniatigut suliffeqarfimmut kalaaliminernut tunisassiortumut
immikkut aningaasaliissuteqartoqarnissaa siunnersuutigineqarluni.
Naalakkersuisut sinnerlugit
akissuteqaammut matumunnga ilannguppara ilassutitut aningaasaliissutitut
inatsisit aappaannut 1999-imi ilassutitut aningaasaliissutit aappaannut,
inatsisissatut siunnersuut taama isikkoqarluni akuerineqaruni,
allannguutissatullu siunnersuutit qulit ilanngunneqarpata qanoq
isikkoqarnissaanik takussutissiisoq.
Inatsisissatut siunnersuut
aappassaaneerneqarmat Inatsisartuni ilaasortaq Vittus Mikaelsen Great Greenland
pillugu paasissutissanik ujartuivoq. Naalakkersuisut sinnerlugit apeqquteqaataa
misissuiffigaara oqaatigisinnaavaralu, nannut amiisa ikinnerpaamik qulit
ataatsikkut ammerivimmiit tunineqartarnissaanik oqaaserineqartoq
paasinerluinerusimammat. Tamatumani pineqarpoq, ammit qulit ataatsikkut
qitulisarneqarnissaannik suliaritinneqartarnissaat - tassa nannut amii
ataasiakkaaarlugit suli pisiarineqarsinnaajuarput.
Paasiuminaatsinneqartut aappaat tassaavoq,
Great Greenlandimi aalajangersimasumik aningaasartuutit, Naalakkersuisunit
paasiniarparput aningaasartuutit tamakku tunngassuteqarnersut, paasivarpullu
tassaasut biilinut ineqarnermullu aningaasartuutit ikittuinnaat
aningaasartuutit %-tinngorlugit ikittuararsuupput, suliffeqarfiullu
aningaasatigut angusaanut tamarmut pingaaruteqaratik.
Taama oqaaseqarlunga ilassutitut
aningaasaliissutinut inatsisisssat aappaat ukiormanna suliarineqarneranut
aningaasaqarnermut ataatsimiititaliaq sulisimaneranut qutsaviginiarpara,
ilassutitut aningaasaliissutinut inatsit manna suliarisarput, maanna periutsimi
atukkatsinnik kingullerpaajuvoq. Matumuunalu siunnersuut Inatsisartunut
oqallisigisassanngortippara, taasissutigissassan-ngortillugulu.
Taavalu akissuteqaammut
ilassutitut Naalakkersuisuninngaanniit paatsoortoqaqqunagu, matumuuna 1999-imi
ilassutitut aningaasaliissutinut inatsisissat aappaannut, siunnersuutip
pingajussaaneerneqarnissaanik Naalakkersuisut akissuteqaataannut oktoberip
26-aneersumut tapilissaqalaassaanga.
Allannguutissatut siunnersuummut
nr. 26-mut oqaaseqaamminni aningaasaqarnermut ataatsimiititaliaq
inassuteqaammiunngitsoq, isumaliutissiissummili kingusinnerusukkut
suliffeqarfimmut ataasiartumik tapiissutit 1,5 mio. kr.-inik
aningaasaliisuteqarnissamik Naalakkersuisut siunnersuutaannut piumasaqaatinut
saqqummiussaqarpoq, piumasaqaatit ukuupput:
Siullermik tapiissutit
tunniunneqannginneranni suliffeqarfiup nammineq 2 mio. kr.-it
pissarsiarereersimassagai.
Piumasaqaatit aappaat.
Tapiissutit siulliullugit taarsigassatut ingerlatseqatigiiffiup illuutaasa
tamanut nalunaarutigineqartumik qularnaveeqqusiorneqarnerisigut
qularnaaveeqquserneqassasut.
Naalakkersuisut oqaatigissavaat
piumasaqaat siulleq isumaqatigigamikkut. Aappaali naammassineqarsinnaanngilaq,
tapiissutit pineqarmata, aningaasalersuinermut aningaasaliineq
taasigassarsitsinerluunniit pineqarani. Tamanna tunngavigalugu Naalakkersuisut
isumaqarput erserinnerpaalluunilu eqqornerpaassasoq, allannguutissatut
siunnersuutip nr. 26-ip tunuartinneqarnissaa qinnutigissallugu.
Taarsiullu Naalakkersuisut
taamatuttaaq kontomut pingaarnermut 50.06.19-mut ataasiaannartumik tapiissutit
illoqarfinnut tunissassiorfiit allannguutissatut siunnersuummik nr. 33-mik
nutaamik saqqummiussaqarput, allannguutissatut siunnersuut taanna siulimisulli
1,5 mio. kr.-inik aningaasartaqarpoq. Missingersuutinulli ilanngussartaani
nassuaatit sukumiinerullutik. Tassani naatsorsuutigineqarpoq tapiissutit 1,5
mio. kr.-init tunniunneqannginnerini ingerlatseqatigiiffiup nammineq 2 mio.
kr.-inik allanik pissarsisimanissaa.
Per Bethelsen, Siumup oqaaseqartua:
1999-imut Inatsisartut
ilassutitut inatsisissaata aappannut siunnersuutip pingajussaanneerneqarneranut
atatillugu Siumumit imatut oqaaseqarniarpugut:
Siumumit nuannaarutigalugu
maliginiarparput assagiarsunnut akit nunarsuarmi ima maanna qaffatsigisimasut
pisariaaruttutut nalilerneqarsimalluni aalisartunut tunisinermi
tapiissuteqartitsinissaq.
Siumumit nuannaatutigaluguttaaq
maluginiarparput ilassutitut aningaasaliissuteqarnikkut maanna
qulakkeerniarneqartoq nunaqqatitta Qallunaat Nunnaanniittut kalaallit
nioqqutissiaannik pisisinnaasarnissaat.
Taamatut naatsumik oqaaseqarluta
saniatigullu qulequtaasumut atatillugu siullermeerinnermi
aappassaaneerinninnermilu oqaatigisimasagut innersuusutigalugit
oqaluuseineqartup taamatut isikkoqarluni Inatsisartunit
akuersissutigineqarnissaa Siumumit inassutigiumavarput.
Anders Nilsson, Atassutip oqaaseqartua:
Atassumiit
allannguutissatut siunnersuutip Naalakkersuisut saqqummiussaannut isumaqataasinnaavugut,
nunatta karsianit tapissuuteqarnissamik piumasaqaatit Sisimiut Foodip
suliffissuarmut pisinnaatitsissutip pisortatigoortumik nalunaarsorneqarnissaa
atorunnaarsinneqarpat.
Taanna eqqaassanngikkaanni
Atassummiit allamik oqaaseqarnata aningaasaqarnermut ataatsimiititaliap
isumaliutissiissutaanut isumaqataavugut. Kiisalu aamma isumaqataaffigaarput
ilassutissatut aningaasaliissutissanut inatsisisaq 1999-imi
aappassaaneerneqarneranut saqqummiunneqartumut.
Asii Chemnitz
Narup, Inuit
Ataqatigiit oqaaseqartuat:
Inatsisartut ilassutitut
aningaasaliissutinut inatsisissaasa aappaannut siunnersuutip siullermeernerani
aappassaaneerneranilu Inuit Ataqatigiinniit oqaatigeriikkagut
innersuussutigalugit matumuuna nalunaarutigissavarput pingajussaaneernerani
Naalakkersuisut allannguutissatut siunnersuutaat ilanngullugit siunnersuut
tamakkiisoq akuerseqataaffigissagatsigu.
Maluginiagassaavoq
siunnnersuutip massakkutut isikkoqarluni akuersineqarpat Landskarsip
amigartoorutai 44 mio. kr.-uunit sinnilaarlugit annertussuuseqarssammata. Aappassaaneerinninnermit
amigartoorutissat 7,7 mio. kr.-inik annikillillutik. Tamanna tusaatissatut tiguarput.
Naalakkersuisut
allannguutissatut siunnersuutaat nakorsaqarniarnerup
aaqqiissuteqarfiginiarneranut siunertaqartut immikkut oqaaseqarfigilaassavagut.
Naalakkersuisut katillugit qinnuuteqaatigaat 1,3 mio. kr.-it qaammatini
tullerni nakorsaqarfinni tamani minnerpaamik ataatsimik nakorsaqarnissaq
qulakkeerumallugu.
Inuit Ataqatigiinnit
nakorsanut atorfiit aalajangersimasumik inuttaqartinniarnerat
ajornartorsiutaasoq imaannaanngitsoq arajutsisimanngeqaarput, Naalakkersuisullu
ilungersorlutik ajonartorsiummik aaqqiissuteqarniarneranni
tunuliaqutaarusuppugut.
Ilungersunarluinnartutut
isigaarput aaqqiissutissatut periarfissat qaammatinut arlaqanngitsunut
taamaallaat atuuttussaasarmata, taartaagallartussanik atorfinititsisarnerit
periarfissatut qinertariaqartarmata. Taamaalilluni pissutsit ima
isikkoqarlersarput, soorlulusooq peqqinnissaqarfimmi nukiit amerlanerit
ajornartorsiutinut pinartunut atortartut, ungasinnerusorlu isigalugu
ineriartortitsinissamut nukissat amigalersarlutik.
Nassuerutigissavarpulli
aaqqiissutissanik allanik matumani tikkuussisinnaannginnatta. Nakorsaqarfinnilu
tamani innuttaasut peqqinnissakkut pitsaasumik sullinneqartariqarmata -
nakorsamit taartaagallartumilluunniit - aningaasartuutissatut qinnuteqaatit
akuerseqataaffigissagatsigit. Isertornaguli aaqqiissutiaagallartut
aningaasarpassuarnik naleqarmata.
Konto pingaarneq 50.06.19
oqaaseqarfigilaassuarput:
Pingajussaaneerinninnissamut
Naalakkersuisut allannguutissatut siunnersuuteqarnerminni qinnuteqaatigaat 1,5
mio. kr.-it tunisassiorfimmut ataasiartumik tapiissutitut atorneqartussat.
Inuit Ataqatigiit nunatta pissarititai atorluarlugit tunisassiornermik
ineriartortitsiuarnissamut periarfissiinissaq pingaartipparput. Taamaattumik
aningaasaliissutissatut qinnuteqaatigineqartut akuersaarniarpavut - soorlu
aningaasaqarnermut ataatsimiititaliap inassuteqaatigigaa. Paasinarsimmat
aningaasaqarnermut ataatsimiititaliaata akuersinissamut piumasaqaatigeqqusaataa
aappaa inatsisitigut tunngavissaqanngitsoq Naalakkersuisut tassunga
allannguutissatut siunnersuutaat nutaaq nr. 33 akuersaarparput.
Taamatut oqaaseqarluta
nalunaarutigissavarput 1999-imut Inatsisartut ilassutitut aningaasaliissutinut
inatsisissaasa aappaannut siunnersuut akuerseqataaffigalugu taasissagatta.
Mogens Kleist, Kattusseqatigiit oqaaseqartuat:
Aningaasaqarnermut
ataatsimiititaliap Inatsisartunut innersuutaat Kattusseqatigiinniit
akuersaarlugit oqaaseqassaagut. Taamaattorli saniatigut allannguutissatut
siunnersuut punkt 23, 25-lu taakkua immikkut qinersinermi
akuersaassannginnatsigit.
Maluginiakkagulli
taakkartorusutagullu ukuupput: amigartoorutissat appariarsimanerat 7.729.000
kr.-inik taamaalilluni 1999-imut amigartoorutissat 44.183.000 kr.-inngorlutik.
Tamanna nuannaarutigaarput, tassa isertitassatut nutaatut taakkartorneqarput
3,5 mio. kr.-init KNI Pilersuisumiit utertitassatut 929.000 kr.-init,
assagiarsunnut tapiinermut appartitsinerit 4. mio. kr.-inik nalillit,
nakorsanit sullinneqarnermi appartitsinerit 300.000 kr.-inik nalillit,
Qaanaamut mittarfiliornermut Naalagaaffimmiit nuussinerit 1,8 mio. kr.-it.
Naalakkersuisullu
allannguutissatut siunnersuutaanni 2,8 mio. kr.-nik qaffaanikkut taakkartorusuppagut
suliffeqarfinnut 1,5 mio. kr.-init, tassalu Sisimiut Foodimut aammalu
sivikitsumik taartaanikkut aningaasartuutissat 1,3 mio. kr.-it nakorsaqarnermut
tunngasut.
Kattusseqatigiinniit
oqaatigissuarput assagiarsunnut tunngatillugu Naalakkersuisut aamma
aningaasaqarnermut ataatsimiititaliap eqqumaffigisai, assagiarsuit akii
appassangaluarpata aningaasanik tapiisinnaanerat ammaffigeqqullugit.
Oqaatigissavarpullu naggataatigut allannguutissatut siunnersuutit punkt 23,
25-lu naaggaarfiginiaratsigit. Taamatut Kattusseqatigiinniit oqaaseqassaagut.
Ruth Heilmann, Siumut:
Tassa uanga allannguutissatut
siunnersuut nr. 26-mut tunngatillugu aningaasaqarnermut ataatsimiititaliap
uparuagai isumaqatigilluinnarpakka, aammalu itinerulaartumik paaserusullugu
taakku aningaasaliissutissat Sisimiunuinnaq tunngasuussanersut, imaluunniit
kingusinnerusukkut nunatsinnut tamarmut iluaqutaasumik tassani
siunnerfeqartoqarnersoq. Tassa uani allaqqammat ilaatigut
qulakkeerniarneqassasoq Danmarkimi kalaallinut atuisartunut puisinik
tunisassianik nioqquteqarsinnaalertoqassasoq, taamaalilluni.
Josef Motzfeldt, Aningaasaqarnermut Niuernermullu
Naalakkersuisoq:
Qujanarujussuaq, qujaannarnanga
qujarujussuarpunga. Tassa aningaasanut ilassutitut aningaasaliissutinut
inatsisissap oqaluttuarisaanermi nunngutaat massakkut matumani suliarineqarpoq,
akuerineqaraluttuarlunilu.
Taamaattoq marlussuit
oqaaseqarfigilaanngitsoorusunngilakka siullermik: Naalakkersuisut
allannguutissatut siunnersuutaat 33-mut tunngasoq tassalu Sisimiuni tunisassiorfiup
innuttaasunik pigineqartup ikiorserneqarnissaannik tunissassiornimigut,
aningaasatigullu isumannaannerusumik ingerlalernissaannut tapiissut. Soorunami
Sisimiunuinnaq tunngasuunngilaq.
Aammalu tunisassiorsinnaaneranik
siuarsarneqarnissaat nunatsinnut Siumullu oqaaseqartuata oqarneratut nunatta
avataani innuttaqatitsinnut pilersuinissaminik aningaasarsiornerminillu
isumannaannerusumik ingerlalernissaannik siunnerfeqarpoq.
Taamaattumik ilaatigut
aningaasaqarnermut ataatsimiititap inuussutissarsiornermut Naalakkersuisoq
apeqqummik tassani sukumiisumik imaluunniit Naalakkersuisoqarfimmi sukumiisumik
paasiniaasimanera isumasioqateqarsimanera, partiinit tamanit ilisimaneqartoq
innersuussutigissavara.
Aappaattullu Inuit Ataqatigiit
oqaaseqartuata peqqinnissaqarfimmut tunngasumik oqaasii,
oqaaseqarfigilaarusuppakka:
Soorunami Naalakkersuisut
arajutsisimanngilluinnarpaat ilaartuillui iluarseeqattaarnerit
peqqinnissaqarfik eqqarsaatigalugu, aamma - aamma peqqinnissaqarfik
eqqarsaatigalugu sutigullu tamatigut ilaartuilluni aaqqiigallartarnerit
tamakkua tutsuiginarnerpaajunngitsut, Naalakkersuisut arajutsisimanngilaat.
Uanili ilaatigut nakorsiartut tamarmik nappaateqartut tamarmik
nakorsarneqartariaqarneranik Inatsisartut tunngaviusumik isummersimanera pissutaaqataanngitsuunngilaq.
Aammalu ullumikkut soorlu 1999-i
eqqarsaatigalugu vikarbureau-nut tassa taartaagallartartunik
nioqquteqartarfinnut aningaasarparujussuarnut atuisarsimavugut. Aamma
siornatigut taamaattarsimavoq.
Kisianni tassa ajoraluartumik
aningaasat taakku aningaasarparujussuit taakkununnga akiliutigisartakkagut
imaasiallaannaq akissarsianut iluarsiissutitut atorsinnaanngilagut.
Taamaalilluni akissarsiatigut isumaqatiginninniarnikkut nalingiinnerpaamik
akissaatitigut qaffaasarnerit anguneqartartut isumaqatigiinniarnikkut
equterujussuarsinnaagatsigit, malinnaaffigisinnaajunnaakkatsinnik allaat
kinguneqarsinnaasumik.
Taamaattumik peqqinnissaqarfimmut
tunngatillugu pissutsit taamaakkallarnerat assigiinngitsut atorlugit,
Naalakkersuisut naalakkersuisoqarfiup Inatsisartunik qujanartumik
suleqateqarluni aaqqinniarpai. Aaqqiniarnermili nukiit avataaninngaaneersut
imaannaanngitsut illuatungeraagut, kattuffippassuit allat peqqinnissaqarfimmut
tunngasuinnaanngitsut, aamma sanitsinni qamappuut, soorunami qanoq
isumaqatigiissuteqarnerit inerneqarnerat najoqqutaralugit nammineq
isumaqatigiissutigisinnaasaminnik aamma tunngavigisinnaasassaminni
ujarlerlutik.
Taamaattumik nukigut
pitsaanerpaamik atorniarsarigatsigit tamanna qularineqassanngilaq. Tamatumunngalu
aamma qulananngilaq Naalakkersuisut tamaasa sinnerlugit qujassaguma
Inatsisartunut, tamatumani suliniarnitsinnut tapersersorneqarnerput
annertuujusoq malugisinnaangatsigu.
Johan Lund Olsen, Inatsisartut Siulittaasuat:
Ja, qujanaq. Tassalu taamaalilluta
1999-imut Inatsisartut ilassutitut aningaasaliissutinut inatsisaasa aappaannut
siunnersuummut atatillugu, tassa taasisinnaanngorpugut. Taavalu
ilisimatitsissutigissavara allannguutissatut siunnersuut aningaasaqarnermut
ataatsimiititaliap isumaliutissiissutaani nr. 26-p tunuartinneqarnissaa tassa
Naalakkersuisut ippassaq oktoberip 28-ani tassa kissaatigisimammassuk. Tamatuma
peqatigisaanik tassunga taarsiullugu Naalakkersuisut allannguutissatut
siunnersuummik nutaamik nr. 33-mik saqqummiussipput.
Naalakkersuisut oktoberip 28-ani
1999 allannguutissatut siunnersuutaat nr. 33 taamaallillugu siulliullugu maani
taasissutigineqassaaq.
Taamaammat apeqqutissaavara
Naalakkersuisut allannguutissatut siunnersuutaannut nr. 33-mut isumaqataasut
qinnuigissavakka nikueqqullugit.
30-t.
Tassa Inatsisartuni ilaasortat
30-t, maani najuuttut tamarmik.
Taava tulliullugit
taasissutigineqassapput Naalakkersuisut allannguutissatut siunnersuutaat
aningaasaqarnermut ataatsimiititaliap isumaliutissiissutaani nr. 23-miit 25-mut
aamma 27-miit 32-mut ataatsimiititaliap isumaqatigiittup Inatsisartunut
akuerineqaqqullugit inassutigisai.
Siullermik apeqqutigissavara allannguutissatut siunnersuutip immikkoortillugit taasissutigineqarnissaat kissaatigineqarnersoq? Anthon Frederiksen.
Anthon Frederiksen, Kattusseqatigiit:
Aningaasanut ilassutitut aningaasaliissutissap siullermeerneqarnerani, aammalu aappassaaneerneqarnerani Kattusseqatigiinni oqaaseqaatigut innersuussutigeqqillugit, uani suliami allannguutissatut siunnersuutit 23-minngaanniit 25-mut taaseqataaffigissannginnatsigit erseqqissaatigerusupparput. Tassa tassani isumaqataanngereernikuungatta aamma taanna erseqqissarlugu oqaatigeqqikkusupparput. Kisiannili tassa 27-miit 32-mut taakkua isumaqataaffigaagut.
Johan Lund Olsen, Inatsisartut Siulittaasuat:
Ja, tassa taamaalilluta avillugit tassa taasissutigitittariaqassavagut. Taava tassa ikinnerussuteqartut tassa Kattusseqatigiit. Siullermik tassa taasissutigissavagut Naalakkersuisut allannguutissatut siunnersuutaannut nr. 23-miit 25-mut isumaqataasut, taava qinnuigissavakka nikueqqullugit.
26.
Taava aamma apeqqutigissavara Naalakkersuisut taamatut allannguutissatut siunnersuutaannut nr. 23-miit 25-mut akerliusut qinnuigissavakka nikueqqullugit.
4.
Tassalu Inatsisartut maani najuuttut tamarmik taamaalillutik taasipput.
Taava Naalakkersuisut allanngutissatut siunnersuutaannut nr. 27-miit 32-mut isumaqataasut aamma qinnuigissavakka nikueqqullugit.
30.
Tassa taamaalilluni taanna erseqqippoq, taava matuma kingorna siunnersuutip taama iluseqarluni inaarutaasumik akuersissutigineqarnissaa tassa taasissutigineqassaaq.
Siunnersuutip taama iluseqarluni inaarutaasumi akuersissutigineqarnissaanut isumaqataasut qinnuigissavakka nikueqqullugit.
30.
Tassa taamaalilluni 1999-mut Inatsisartut ilassutitut aningaasaliissutinut inatsisaasa aappaannut siunnersuut akuersissutigineqarpoq. Tassalu nunatsinni oqaluttuarisaanermi kingullersaat.
Oqaluuserisaq naammassivoq.