Oqaluuserisassani immikkoortoq 28-3 |
|
||
| Siullermeerneqarnera | Aappassaanneerneqarnera | Pingajussaaneerneqarnera | |
Ataasinngorneq 25. oktober
1999 nal. 16.10
Ataatsimiinnermik
aqutsisoq:
Finn Karlsen, Siulittaasoqarfimmi ilaasortaq, Atassut.
Alfred Jakobsen, Avatangiisinut Pinngortitamullu
Naalakkersuisoq, saqqummiussisoq:
Pinngortitaleriffik pillugu
Inatsisartut inatsisaata allannguutissaatut siunnersuut, Inatsisartuni
pingasussaaneerlugu suliarineqarnissaa Naalakkersuisut sinnerlugit
saqqummiutissavara.
Inatsisissatut siunnersuut
Inatsisartut 19. oktober 1999-imi aappassaaneerlugu suliaraat. Oqaaseqartunit
tamanit ilalerneqarpoq Naalakkersuisut inatsisissatut siunnersuutaat
iluarsisanik nassuiaatitalik taama isikkoqarluni
pingajussaaniigassanngortinneqassasoq.
Suliassamik Inatsisartut
akuersaartumik suliarinninnerat qujassutigissavara, nuannarutigalugulu
Kalaallit Nunaanni piniartullu kattuffiat, aalisariutinik piginneqatigiit
kattuffiat, taamatullu savaatillit peqatigiit suleqatigiissut tamarmik immikkut
sulilersuisuni ilaasortaatitaqalermata. Taamaalillutillu nalingiillutik
siunissami Pinngotitaleriffiup suliassaanut sunniuteqarsinnaalerlutik.
Inatsisissatut
siunnersuutip akuersissutigineqarneratigut Pinngortitaleriffik
periarfissinneqassaaq siunissaq ungasinnerusoq isigalugu, suliassaqarfimmini
ilisimatusarfinngorsinnaanerminik pilersaarumminik
ingerlatitseqqissinnaanissaminut. Pilersaartit taakku danskit
ilisimatusarnermut ministeriaqarfiat suleqatigalugu ataqatigiissaarneqassapput.
Pinngortitaleriffiup aaqqissuussaanerat allanngortinneqarnera aningaasatigut
kinguneqassagaluarpat, allatigulluunniit inatsisinik allanngortitsinissamik
pisariaqartitsisoqassappat, taakku Inatsisartunut saqqummiunneqassapput.
Taama oqaaseqarlunga
inassutigissavara siunnersuut Inatsisartunit inaarutaasumik akuersissutigineqassasoq.
Finn Karlsen, Atassut, ataatsimiinermik
aqutsisoq:
Tassalu paasivara
oqaaseqarfigineqarnianngitsoq.
Taamaasillunga
apeqqutigissavara Naalakkersuisup inassuteqaataa, tassalu Pinngortitaleriffik
pillugu Inatsisartut inatsisaata allannguutissaattut siunnersuutip
pingajussaaneerneqarnera taamatut isikkoqarluni,
akuersissutigineqarsinnaanersoq Inatsisartuni ilaasortanit.
23.
Najuuttut tamarmik.
Tassalu ullumikkut
Inatsisartut ataatsimiinerat ammasoq taamaasilluni naammassivoq.
Oqaluuserisaq naammassivoq.