Oqaluuserisassani immikkoortoq 14-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ulloq ataatsimiiffik siulleq,
marlunngorneq 4. marts 2003, nal.
Augusta Salling, Aningaasarsiornermut
Naalakkersuisoq, Atassut.
Qujanaq. Naalakkersuisut sinnerlugit
matumuuna 2003-mut Inatsisartut aningaasanut inatsisissaannut
saqqummiutissavara.
Siullermik aningaasaqanerup
inissisimanera.
Nunatta naalakkersuinikkut
aningaasaqarnikkullu imminut napatilersinnaaneranut periarfissat pillugit
maannakkut Inatsisartuusut apeqqutinik imaannaanngeqisunik naapitassaqarlutillu
suliassaqarput.
Nunatsinni siunissami imminut
napatinnerulernissatsinnut piareersimassagutta aningaasaqarnermi
allanngortiterinerujussuit inuiaqatigiillu aningaasaqarnikkut aaqqissugaanerata
allanngortiternissarujussua pisariaqassapput. Aatsaammi taamaaliornikkut
inuiaqatigiit imminnut napatittut pilersissinnaavagut.
Takusariaqarparput ukiuni aggersuni
isertitassatut ilimagisatsinnut sanilliullugu pisortani aningaasartuuteqartorujussuusugut.
Pisariaqassappat pisoartat aningaasartuutaat sukkut ilisarneqarsinnaanersut
misissorneqartariaqarput.
Tamatuma peqatigisaanik
Naalakkersuisut isumaqarput nunatta aningaasaqarnera ukiunut kingullerpaanut
sanilliullugu qaffariartunnginnerulissasoq. Nunatsinniinnaanngitsoq
nunarsuarmili tamarmi aningaasaqarneq qaffariartorunnaarsimasutut isikkoqarpoq.
Pissutsit taamaannerisa pisariaqarnerulersippaat pisortat aningaasartuutaasa
ikilisinnissaat siunertaralugu misissuataarnissaat aammalu aningaasartuutit
aningaasatigut allanngoriartornermut aningaasatigullu imminut
napatissinnaanermut naleqqussarnissaat.
Pisortat aningaasartuutaasa
appartinniarnerat suliariitigalugu inuiaqatigiinni aaqqissugaanerit
misissuataartariaqarpavut. Inuiaqatigiit aaqqissuuttariaqarpavut
aningaasaatigut iluaqutiginerullugillu iluanaarutiginerusinnaanngorumallugit.
Aningaasatigut imminut napatissinnaanissap oqaluuserinerani tamanna
pingaartorujussuuvoq. Taamaattumik Naalakkersuisut kissaatigaat inuiaqatigiit aaqqissugaanerat
eqqarsaatigalugu naalakkersuinikkut ingerlatsinerup sulissutiginera
aalajangiusimaneqarlunilu sakkortusarneqassasoq.
Tamatuma saniatigut nunarput
isertitaqarnerulertariaqarpoq siunissami unammilligassat
akissaqartikkumallugit. Tamatumani salliullugit pisariaqartinneqarput
inuussutissarsiutit ingerlalluartut akilersinnaasullu, soorunami aalisarnermi,
aammali taamatut pingaartigaaq inuussutissarsiorfissat nutaat piorsarnissaat.
Tamatumunnga tunngatillugu Naalakkersuisut inuussutissarsiutinik
ingerlataqartut tunngavissaat misissuataarneruniarpaat inuussutissarsiutinik
ingerlatsinerup ineriartornera pitsaanerpaamik tunngavissikkumallugu.
Taamaattumik inuiaqatigiit
aaqqissugaanerat aningaasartuutinullu tunngasutigut naalakkersuinikkut ingerlatsinerit
imminut napatissinnaanerup piviusorsiortumik oqallisiginissaani
pingaarluinnartut ilagaat.
Inuiaqatigiit aaqqissugaanerat
eqqarsaatigalugu naalakkersuinikkut ingerlatsineq.
Naalakkersuisut upperilluinnarpaat
nunarput aningaasatigut imminut napatikkiartussappat inuiaqatigiit
aaqqissugaanerat allannguuteqartittariaqartoq, tassami aaqqissugaanerit
allanngortiterneri inuussutissarsiutit inuiaqatigiillu ineriartornerisa
tunngavissiornerannut tunngavissaammata pingaaruteqartut. Tamatumuunakkut nunarput
aningaasarsiornermut tunngatillugu siunissami pisariaqartumik
periarfissinneqarsinnaavoq.
Taamaattumik Naalakkersuisut
kissaatigaat inuiaqatigiit aaqqissugaanerat pillugu iliuusissatut pilersaarutip
sulissutiginera aalajangiusimaniarlugu. Ingasinnerusoq eqqarsaatigalugu
ineriartortitsineq attattuartariaqarpoq, pisariaqartunillu angusaqarnissamut
aaqqissugaaneq eqqarsaatigalugu naalakkersuinikkut ingerlatsineq sakkussaavoq
pingaarutilik.
Naalakkersuisut 2003-mut
aningaasaqarniarnikkut ingerlatsineq pillugu nalunaarusiaminni aaqqissugaaneq
eqqarsaatigalugu naalakkersuinikkut ingerlatsinermi maannamut angusaasimasut
nalilersorsimavaat suliniutissallu takkuttussat saqqummiullugit.
2003-mut Inatsisartut aningaasanut
inatsisissaattut siunnersuummi kisitsisit pingaarnerit.
Siunissami aalajangigassat annertuut
akissaqartilernissaasa sulissutigineranni aningaasartuutit eqqarsaatigalugit
naalakkersuinikkut ingerlatsineq pingaarutilerujussuuvoq. 2003-mut aningaasanut
inatsisissatut siunnersuummi tamakku isumaliutigisariallit sammilerpagut.
Ilimagineqarpoq isertitat 5,4
milliarder kronit missaannik amerlassuseqassasut. Taakkua pingasunngorlugit
avikkaanni aggorneri marluk missiliorlugit tassaapput naalagaaffiup
ataatsimoortumik tapiissutai EU-llu aalisarneq pillugu isumaqatigiissummut
akiliutai. Taakkua qaavaniipput akileraarutit, akitsuutit isertitallu
minnerusut arlallit.
Ingerlatsinermut aningaasartuutit
katillutik 4,6 milliarder kronit missaanniipput, tassani ilaallutik 774 mio.
kronet inatsisitigut pisussaaffigalugit aningaasartuutaasut assersuutigalugu
pisortanit soraarnerussutisianut ilinniagaqarnersiutinullu.
Naalakkersuisut siunnersuutigaat
sanaartugassanut iluarsagassanullu suliassanut atorneqassasut katillugit 752
mio. kronet. 458 mio. kronet sanaartornermut pilersaarutinut atorneqassapput
295 mio. kronellu iluarsaassinermut pilersaarutinut atorneqassallutik.
2003-mi aningaasartuutit
qaffasissusissaat siunnersuutigineqartoq takussutissaavoq Namminersornerullutik
Oqartussat aningaasartuutaasa qaffakkiartornerisa kigaallatsinnerannut.
Namminersornerullutik Oqartussani kommunenilu pisortat aningaasartuutaat ukiuni
kingullerni tallimani annertuumik qaffassimapput. Unittariaqarpugut
eqqarsaatigalugulu taamatut ingerlaannassanerluta. Naalakkersuisut isumaqarput
taamatut ingerlaannartariaqanngitsugut. Taamaattumik akit akissarsiallu
allanngoriartornerat naatsorsuutigalugu Naalakkersuisut siunnersuutigaat
aningaasartuutit katillutik 2002-misut qaffasissuseqassasut.
Siunissami aningaasartuutinut tunngasutigut
naalakkersuinikkut ingerlatsinissami ilaavortaaq isertitaasarallartut arlallit
2003-mi peertussaammata. Tamatumani pineqarput naalagaaffiup iluarsagassanut
immikkut tapiissutai aamma taarsigassarsianut arlalinnut akilersuutit ilaatigut
Tele Greenland A/S-iminngaanneersut. Naalakkersuisut naatsorsuutigaat ukiuni
aggersuni isertitat katillutik 200 mio. kronet missaanni appariassasut.
Naalakkersuisut aningaasartuutit unikaallatsinnissaat kissaatigaat siunissami
aningaasatigut periarfissaqalernissaq pilersikkumallugu. Isertitat apparnerisa
aningaasartuutitigut ingasattajaannginnissaq pisariaqarnerulersippaat.
Decemberip pingajuanni 2002-mi
qinersinerup kinguneraa 2003-mut aningaasanut inatsisissap pisarnermiit kingusinnersusumik
suliarineqarlunilu akuersissutigineqarnissaa. Naalakkersuisut
nassuerutigisariaqarsimavaat iluarsagassat allanngortitsinerillu annerusut
2004-mut aningaasanut inatsisissamut kinguartittariaqarmata. Tassami
Naalakkersuisut kissaatigaat aaqqissuussinerit atuuttut misissuilluarneq
aallaavigalugu allannguutissiorneqassasut. 2003-mi Naalakkersuisut 2004-mut
aningaasanut inatsisissatut siunnersuummi suliniutit nutaat arlallit
aallartippaat. Suliniutit tamakkua 2003-mut aningaasaqarniarnikkut ingerlatsineq
pillugu nalunaarummi sammineqassapput.
Tamannali imatut paasineqassanngilaq
2003-mut aningaasanut inatsissatut siunnersuumi nutaamik
suliniuteqartoqanngitsoq. 2003-mi nutaanik suliniuteqartoqarpoq, ukiunullu
aggersunut sillimmateqarpoq ilimagigatsigu 2003-mi misissuinitta aningaasanik
amerlanerusunik pisariaqartitsineq takutissinnaagaa.
2003-mut aningaasaliissutinut
inatsisaagallartumi inatsisaagallartumi decemberimi aammalu januarimi
Inatsisartut aningaasaliissutit nutaat arlallit sallinngortereersimavaat.
Taakkua 2003-mi pingaarnerutitanut tamarmiusunut ilaapput. Tamatumani
pineqarput sillimmasiinermut akiliutit qaffanneri, aalisarnerup
aaqqissugaanerata naleqqussarnera, raajat tunisat akiinut tapiissutit,
isumaqatigiissutinut nutaanut aningaasartuutit, innarluutilinnut
aningaasartuutit sanaartugassanullu pilersaarutit arlallit. Tamakkuali
saniatigut Naalakkersuisut suliniutit nutaat arlallit
aningaasaliffigineqarnissaat pingaartissimavaat.
Peqqinnissamut tunngasuni
suliaritinniartunik utaqqisoqarpoq, nakorsaatit akitsoriartorput nunalu allani
suliaritittarneq akitsoriartuinnarpoq. Taamaattumik Naalakkersuisut
siunnersuutigaat taakkununnga pineqartunut agguarlugit 20 mio. kronet
qaavatigut aningaasaliissutigineqassasut. 2004-miit peqqinnissaqarfimmut
innarluutilinnullu 20 mio. kronet sillimmatitut immikkoortinneqarput.
Naalakkersuisut 2004-mut aningaasanut inatsimmik suliaqarnerannut atatillugu
pineqartut misissorneqarnissaat atugassanngortitsinissami utaqqimaarneqarpoq.
Naalakkersuisut siunnersuutigaat
julip aallaqqaataani 2003-miit ukiumut illuartinneqartassasut 7,5 mio. kronet
pisortanit soraarnerussutisialinnut aapparisamik isertitaqarnerat pissutigalugu
siornatigut soraarnerussutisiaqarsimanngitsunut. Tamatuma saniatigut 2004-miit
sillimmatissatut illuartinneqarput 12,5 mio. kronet pisortanit
soraarnerussutisiat pitsanngorsarnissaannut atugassatut.
Ineqarnermut akiliutit
nutartigaanerat januarip aallaqqaataani 2002-mi atuutilerpoq. Ineqarnermut
akiliutit nutarterneqarnerisa inernerisa takutissimavaat inoqutigiit ilaat
100.000 kronet ataallugit isertitaqartartut ineqarnerminnut
qaffaavigineqarsimasut. Taamaatttumik Naalakkersuisut siunnersuutigaat 2003-mi
3 mio. kronet aammalu 2004-miit 2006-imut ukiumut ataatsimut 5,6 mio. kronet
illuartinneqassasut. Aningaasat atorneqassapput inuit pineqartut namminneq
akiligassaannut killissat allanngortinnerannut, taamaalillutik ineqarnermut
tapiissutinik amerlanerusunik pisalersillugit. Siunnersuutigineqarpoq
allannguut julip aallaqqaataani 2003-miit atuutilissasoq.
Naalakkersuisoq kulturi, timersorneq
sunngiffillu pingaarteqaat taamaattumillu siunnersuutigalugu kulturi pillugu
Siunnersuisooqatigiinnut aamma timersorneq pillugu Siunnersooqatigiinnut
aningaasaliissutit ingerlaqqilissasut. Siunnersuisoqatigiit Naalakkersuisunut
tapertaassapput isiginnaartitsineq, nipilersorneq, atuakkiorneq
eqqumiitsuliornerlu pillugit ineriartortitsiniarluni suliniarnermi.
Naalakkersuisut isumaqarput
atuarfeqarnerup tungaatigut suliassat annertuujusut. Inuit amerliartorsimanerat
qiviaraanni sumiiffinni amerlasuuni atuarfiit mikivallaalersimapput.
Sumiiffinni allani atuarfiit nutartertariaqaqaat. Taamaattumik Naalakkersuisut
pilersaarutit 2003-mut aningaasanut inatsisissamut ilanngunneqareersimasut
saniatigut 2003-mi atuarfinnut tunngasut sukumiisumik isummerfiginiarpaat
illoqarfinni atuarfiit pillugit nalunaarusiaq majip tallimaani 2002-meersoq
nunaqarfinnilu atuarfiit pillugit nalunaarusiaq tunngavigalugit.
Ilulissani, Sisimiuni Nuummilu
ilinniartut ineqarfiini ineeqqanik inissianillu sanaartorneq
aallartinneqarsimavoq. Illoqarfinni taakkunanerpiaq ilinniagaqartut
inissaqartinniarnerat ajornartorsiutaaqaaq. Init illullu namminersortunit
attartortarlugit maannamut aaqqiisarnerit akisuallaaqaat. Iluarinartuuvoq ilinniagaqartut
amerliartormata ilinniartut ineqarfiinik amerlanerusunik pisariaqalersitsisut.
Piffissami aggersumi ornitatsinnut
Naalakkersuisut pisortat aningaasartuutaasa aaqqinniagassatut naleqqussarlugit
aaqqissornissaat immikkut sammivaat. Taamaattumik Naalakkersuisut 2003-mi aamma
qitiusumik allaffissornikku aqutsineq sukumiinerusumik misissorniarpaat.
Annerusumik sipaaruteqarnissaq
isumannaatsumik ingerlanneqartariaqarpoq. Qularineqassanngilarli
Naalakkersuisut kissaatigimmassuk allaffissornikkut aqutsinerup
pisariillisaavigineqarnissaa. Taamaattumik Naalakkersuisut ukiuni 2004, 2005
aamma 2006-imi sipaarutissat 5, 10 aamma 15 mio. kronet ilanngussimavaat.
Taakkua ilassutaapput 2003-mut aningaasanut inatsisissamut
ilanngunneqareersunut, tassa 2003-mi 7 mio. kronenut ukiunilu 2004-miit
2006-mut ukiumut 12 mio. kronenut.
Septemberip 20-ani 2002-mi
kommunenut ataatsimoortumik tapiissutit isumaqatigiissutigineqarput.
Isumaqatigiissutip kinguneraa ataatsimoortumik tapiissutit 2002-miit 2003-mut 37,2
mio. kronenik qaffanneqarnerat. Kommunet taarsiivigineqarput Atuarfitsialammut
aningaasartuutaanerusussanut aamma meeqqanut inuussuttunullu suliniutinut,
kommunet ingerlatsiviinut meeqqanit inuussutunillu ulloq unnuarlu
najorneqartartunut isumaqatigiissuteqartoqarluni. Qinersisimanerup
Naalakkersuisullu pingaarnersiuinerminnik allanngortitsisimanerisa
kingunerisaannik isumaqatigiissutip ilaa isumaqatigiinniutigeqqittariaqassaaq.
Naalakkersuisut ilaatigut ilimagaat qinersisimanerup kingunerisaanik meeqqat
inuusuttullu pillugit inatsit nutaaq ukiup affaanik kinguartinneqassasoq,
taamaammallu isumaqatigiinniartoqaqqittariaqarluni.
Naggasiut.
Neriuutigaara Inatsisartut nutaat
maanna ileqquusumik ataatsimeeqqaarnermiilli apeqqutit pingaarutilerujussuit
ukiuni aggersuni sammisartagassavut pillugit patajaatsumik tamakkiisumillu
suleqatigiinnissaq tunngavileriissagaat.
Naalakkersuisut aningaasanut
inatsisissamut siunnersuutaata ilisarnaatigaa imminut napatinnerulernissap
tunngavissiornissaata pilersaarusiornissaa aammalu pisortat aningaasartuutaasa
aningaasatigut ineriartornermut isertitarisartakkattalu pitsanngorsarnissaannut
ilimagisatsinnut naapertuuttumik ikilisarnissaat.
Nunatta siunissami aningaasatigut
pituttorsimannginnissaq pisariaqartippaa. Tamatumani pisariaqarpoq maannangaaq
pingaarnersiuilluta tulleriiaarinissarput. Taamaattumik Inatsisartunut
ilaasortat kajumissaarumavakka killissat sianiginiaqqullugit aningaasanut
inatsisissap siunnersuutillu ataasiakkaat Inatsisartuni maani oqallisigineqarneranni.
Aningaasartuut nutaaq, tapiissut nutaaq iliuusissalluunniit nutaat allat
eqqarsaatigigaangatsigit eqqaamassavarput qanoq ililluta taamaaliornitsigut
aningaasatigut imminnut napatissinnaalernissatta oqallisiginissaanut
immitsinnut killilertarnersugut. Nutaamimmi aningaasartuuteqarfiusunik
pilersitsinitsigut siunissamut aningaasaleeqqittarnissamut immitsinnut
pituttoreertarpugut.
Taamatut oqaaseqarlunga 2003-mut
Inatsisartut aningaasanut inatsissaannut siunnersuut Inatsisartunut
oqaluuserisassanngortippara. Qujanaq.
Isak Davidsen, Sinniisussaq siulleq, Atassut.
Aningaasaqarnermut Naalakkersuisumut
qujavugut. Taava massakkut tikipparput partiit oqaaseqartui Kattusseqatigiillu.
Siulliulluni oqaaseqassaaq Ole Thorleifsen, Siumut.
Ole Thorleifsen, Siumup oqaaseqartua.
2003-mut ukiunullu tulliuttunut
Naalakkersuisut Inatsisartut aningaasaannut inatsisissatut siunnersuutaat
Aningaasaqarnermi Ataatsimiisitaliami suliarineqarluni aallartinneqareerpoq.
Siumumiit Naalakkersuisut
isumaqatigaagut malugeqqummassuk nunatta aningaasaqarnera ukiorpaalunni
annertuumik annertusiartoriarluni annikilliartuaalermat nunarsuarmi raajat
akiisa appasinneri annertuumik pissutaallutik.
Aningaasanut inatsisissap
suliarineqarnerani aningaasalersuinissat peqqissaartumik nalilersorluagaanissaannik
oqariartorneq akuersaarlugu taperserparput, paasilluarsinnaalluguli 2003-mut
aningaasanut inatsisissami inuiaqatigiit aaqqissugaanerannik annertuutigut
aallannguiniarsinnaaneq periarfissaqangikkallarmat.
Siumumiit maluginiarparput 2004-mut
aningaasanut inatsisissami ukiunilu tulluttuni pisortat aningaasartuutaasa
annikillisaaviginiarneqarneri. Tamatumalu malitsigisaanik inuiaqatigiinnik
aaqqissuusseqqissaarnerit ingerlanneqalernissaat neriulluarfigaarput Namminiilivinnissamut
Ataatsimiititaliap isumaliutissiissutaa saqqummiunneqariarpat, tamannami
suleriarnermi tunngaviusussaammat.
Tamatuma malitsigisaanik kommunet
aaqqissuussivigineqarnerisa allanngortiternissaat suliniutigalugu
aallartinneqassasoq. Naalakkersuisut pisortaqarfinni tamani ingerlatsinermut
aningaasartuutit qaffakkiartornerinik unitsitsiniarnerat Siumumiit
taperserparput.
Naalakkersuisut isumaqatigaagut
oqariartuutigimmassuk nunatta imminut napatissinnaanera anguniassagutsigu
inuiaqatitigut aaqqissuusseqittariaqartugut, aningaasatigut
iluaqutiginerulerlugillu iluanaarutigilernissaat anguniarlugu. Nunatta
isertittagaanit 5,4 mia. Kroneusunit ukiumut 200 mio. kronet mitsaannik
nalillit nunatta karsianut isertitatigut appariaataanissaat saneqqunneqarsinnaanngilaq,
ukiuni tulliuttuni iluarsagassanut immikkut naalagaaffimmiit
tapiissutigineqartartut taavalu ilaatigut Tele Greenland A/s-ip
taarsigassarsianut akilersuutai pissarsiarissaassagatsigit.
Isumaginninneq.
Pisortanit soraarnerussutisialinnut
aapparisamik isertitaqarnerat pissutigalugu siornatigut
soraarnerussutisiaqarsimanngitsunut aaqqiiniarneq akueraarlugu Siumumiit
erseqqissaatigissavarput Naalakkersuisut utoqqalinersiutinik siusinaartumillu
sulisinnaajunnaarnersiutinik qaffaaneqarnissamut suleqataarusuppugut.
Innarluutillit sullinneqarneranni
ineriartortitsijuarneq pisariaqarmat kommuneni misiliilluni ingerlatsinerit
ingerlalluartut sukumiisumik naliliiffigineqarnissaat isumageqquarput,
taamaalilluni akisussaaffiit pisussaaffillu naapertorlugit kommunenut
aningaasaliissutitigut naapertuuttunngorsaanerit pisinnaaqqullugit.
Isumaginninnikkut sulisut
qasusuillutik sullissisut sineriapput tamakkerlugu inuppassuusut
pikkorissartinneqartarnerisa annertusarnissaannik anguniakkap piviusunngortinnissaa
kaammattuutigeqqissavarput, aammalu ilanngullugu meeqqanut
sumiginnagaasimasunut sullissineq iluatsissappat tamanna pingaaruteqarmat.
Peqqinnissaq.
Peqqinnissaqarfimmut tunngatillugu
Naalakkersuisut aningaasaliissutit qaavisigut 20 mio. kronenik
aningaasaliisimanerat 2004-milu peqqinnissaqarfimmut innarluutilinnullu
sullissinissamut aamma 20 mio. kronenik sillimmatissanik immikkoortitsisimaneq
Siumumiit iluarisimaarlugu taperserparput.
Ilanngullugu kaammattuutigissavarput
PAARISA-p nutaamik aaqqissuussivigineqarnissaa kiisalu Inerisaavik meeqqanut
inuusuttunullu pinaveersaartitsinermut tunngatillugu annertunerusumik
suleqatigineqarnissaa.
Atuartitaaneq ilinniartitaanerlu.
Atuarfitsialaap aasamut
inatsisitigut atuutsinneqalernissaa Naalakkersuisut atuarfinnut tunngasunik
pingaartitsilluinnarnerat isumaqatigaarput. Atuarfeqarfi pitsaasoq
inuiaqatigiinnut nukittorsaallunilu pisuussutinik tunioraasuuvoq.
Malugeqquarpullu Siumumiit
kissaatigigatsigu ilinniartut angajoqqaaminniittut aaqqissuussivigineqarneranni
ilinniaartut kollegiani najugallit ilinniarnersiutaasa aamma
nalilersoqqinneqarnissaat. Ilinniartitaanermut tunngatillugu
aaqqissuusseqqinnerup naammassineqarnerata aningaasatigut malitseqarnissaa
Siumumiit eqqumaffigaarput, ililnniartummi ilinniarnerminni inuuniarnerminnilu
pitsaasumik atugaqarnissaat Siumup anguniartuarpaa. Tamannalu tunngavigalugu
aaqqiissutit pitsaasut pingaartillugit ilinniartut atugaannik qaqilerinerit
isumalluarnartumik ingerlanneqarsimapput.
Siumup pingaartippaa inuiaqatigiinni
suliffiit sulisussanik amigaateqarfiusut amigaateqarfiulersussallu
eqqumaffigalugit ilinniartitaanikkut eqaaatsumik aaqqissuussivigijuarnissaat.
Suliffeqarfiillu ilinniarsimasunik amigaateqarfiuallaat nunagisaq qimannagu
ilinniartitaanermik aaqqissuussineq ilinniartitsisunngorniartarnermi
iluatsilluarsimasumi periuserineqartoq malillugu ikorfartorneqarnissaat
innersuussutigissavarput.
Inatsisartut Ilisimatusarfissap
avataanit aningaasaateqarfinnit aningaasaleeqataaffigineqarnissaanik
piumasaqaataat tunngavigalugu Siumumiit nalunaarutigissavarput
sananeqarnissaanut avataaniit aningaasateqarfinnik 40 mio. kronet
pissarsiarinissaat isumannaartariaqarmat. Ilisimatusarfeqarfissap
piviusunngortinneqarnissaa Siumumiit aalajangiusimavarput, taamaatttumik
Naalakkersuisunut kaammattuutigissavarput avataaniit
aningaasaliissutissarsiornerup pitsaanerusumik sukumiinerusumillu
ingerlanneqarnissaa sulissutigeqqullugu.
Sunngiffik.
Suliffeqarnermi
inuussutissarsiornerup anersaakkut nukittorsarnermik sunngiffimmi
sammisaqarnissamik ilaqanngitsoosinnaannginnera Siumumiit eqqumaffigaarput
inuiaqatigiillu akornanni piorsarsimassutsikkut ineriartornermi
pingaarluinnartutut isigalugu kattiffiit peqatigiiffinnit katersuiffiusut
nukittorsarneqarnissaat pingaartipparput. Kattuffiit assigiinngitsunik
anguniagallit tamanut tunngatinneqarpata timersornikkulluunniit nunanut allanut
unammiartortarnissamik anguniagaqarpata Siumumiit aningaasaliissutitigut
pisariaqartitsineq malilllugu naammattusaarilluarnikkullu
naleqqussarneqarnissaa tapersersortuassavarput. Taamaattumik
suliniaqatigiiffiit, peqatigiiffiit kattuffiillu aningaasaliissutitigut
alaatsinaanneqarnissaminnik noqqaanerat Siumumiit tapersersorparput.
Kulturi.
Inuiaqatigiit piorsarsimassutsikkut
ineriartortut pisariaqartittuarpaat suliniutit
ataqatigiissaarilluarneqarnissaat. Taamattumik Kulturikkut siunnersuisoqatigiit
Timersornerlu pillugu siunnersuisoqatigiit aningaasaliissutaasimasut
ingerlateqqiinnarnissaat Naalakkersuisunit kaammattuutigineqarmat Siumumiit
tapersersorlugu akuersaarparput.
Kulturitta nunarsuarmioqatitsinnut
nittarsaannerata annertusarneqarnissaa aningaasarsiornikkut ineriartornermut
iluaqutissatut eqqumaffigaarput. Taamaattumik Naalakkersuisut
kaammattorumavagut kattuffiit inassuteqarfigeqqullugit Nunani Avannarlerni
EU-milu nunat suleqatitta aningaasaateqarfiit nunatsinnut iluaqutaasussamik
aningaasaliissuteqartarnissaanut suleqataaqqullugit.
Aalisarneq.
Sinerissami qanittumi aalisartut
naapertuuttunngorsaavigineqarnerat ukioq manna naammassineqassaaq. Taamaattumik
sinerissap qanittuani raajarniat imminut akilersinnaanerusumik
ingerlatsilernissaat qulakkeerneqassalluni.
Aammattaaq Siumuminngaanniit
erseqqissaatigissavarput 2000-mi aningaasanut inatsimmi taakkua aamma ilanngullugit
aningaasaliivigineqarnissaat piareersimaffigineqassasoq, tassami aalisarnikkut
ingerlaneq taamannak ingerlatillugu aningaasaliissutit
unitsiinnarneqarsinnaanerat akuersaarsinnaannginnatsigu.
Taamatuttaarlu saattuarniarneq
qaleralinniarnerlu aamma taamatut sammisariaqartutut Siumumiit
innersuussutigissavarput. Ilanngullugulu Naalakkersuisunut piumasarissavarput
angallatitigut naapertuuttunngorsaanermi siunertaasut tunaartaralugit ESU-p
tunngavigisai ilanngullugit nalilersoqqissaaqqullugit. Aningaasalersueriaatsimik
nutaamik pilersitsinissaq Siumumiit misissoqquarput, tassami paasisimagatsigu
Danmarkimi Fiskerifond,
aningaasaateqarfik aalisarnermut soqutiginnimmat Kalaallit Nunaannut
aningaasalersuinissamut aalisariutinik.
Kiisalu misileraalluni
aalisartitsinermut tunisassianillu ineriartortitsinermut
aningaasaliissutaasartut annertusinneqarsinnaanerat Siumumiit
suleqataaffigissavarput.
Piniarneq.
Puisit neqaasa annertunerusumik tunisassiarineqarnissaata
nutaamik aaqqutissiuunneqarnissaat Naalakkersuisunut sulissutigeqqussavarput.
Tassami puisit neqaasa nerukkaatissiassatut tunisassiassatut isummat
Norgemiunik taamannak ingerlatsereersunik suleqateqarnikkut
piviusunngortinneqarsinnaanera ilanngullugu aamma misissoqqussavarput.
Minnerunngitsumillu annertusartariaqartutut isigaarput nunata iluani puisip
neqaanik nioqquteqarnerup piorsaavigineqarnissaa.
Piniarnermik aalisarnermillu
inuutissarsiornermik allagartat kommunenit akisussaavigineqarnissaat
anguniagassatut pingaartipparput, taamaalilluni kiffartuunneqartut
eqaannerusumik sullinneqarsinnaanissaat anguneqassammat.
Savaateqarneq.
Savaateqarnermik
inuussutissarsiuteqarnerup imminut akilersinnaanerusumik ingerlanneqarnissaa
siunertaraarput, Siumumiillu savaateqarnerup ullumikkut ajornartorsiornera
ilisimavarput, pitsanngorsaatissatullu siunnersuutigineqartut Naalakkersuisunit
nalilersorluaqqissaaqquagut. Pissutsit tamakku atuutilersut Nunatsinni
immitsinnut pilersornerulernissatsinnik siunertaqarnermut naapertuutinngitsut
aaqqinniartariaqaratsigit. Taamaattumik Naalakkersuisut Inatsisartullu
kaammattussavagut savaateqarnermik inuussutissarsiuteqarnerup
patajaallisarneqarnissaanut aningaasaliissutit 2 mio. kronenik apparneri naliliiffigeqqullugu
ilanngullugulu inuussutissarsiuummi akimmiffiusut savaatillit suleqatigalugit
nalunaarsoqqissaarlugit, taamaalilluni aaqqiiniarnermut taakkua
tunaartareqqullugit.
Inussutissarsiutitigut
siuarsaanerit.
Inuussutissarsiutitigut
siuarsaanissamut aningaasaliissutaasartut nutaamik aningaasanut
inatsisikkoorlugit ilusilersorneqarnissaat kaammattuutigissavarput
inuussutissarsiutinut aningaasarsiornerunermik pilersitsiviusunut
aningaasalersuineq pisussanngorlugu.
Siumumiit Naalakkersuisunut kaammattuutigissavarput
inuussutissarsiutitigut ineriartortitsinissanut aningaasaliissutit nunap immikkoortuinut agguaqqullugit
taamaalilluni agguarnerani kommunet oqartussaaffii annertusarneqarnerinik
taamaalillutik annertuumik aamma taakkua oqartussaallutik inuussutissarsiutitigut
ineriartortitsisinnaassammata.
Siumup inuussutissarsiutit
Naalakkersuisunit peqataaffigineqarlutik ineriartortinneqartut
namminiilivinnissatsinnut aamma aqqutissatut isigai. Suliffeqarfiit
tunisassiorfinnik sullissisut tunisassianillu suliareqqiisussat
namminersortunit pilersiortorneqartariaqarput sinaakkusersuinikkullut
ingerlajuaannarsinnaanerat aqqutissiuunneqartariaqarluni.
Siumumi isumaqarpugut sermimik
imermillu nioqqutissiornerunissaq sukkanerusumik pilersitsivigisariaqartoq.
Taamaattumik Namminersornerullutik Oqartussat kommunellu aallarnisaasutut
assigiinngitsunik piginneqataaffigineqartunik nioqqutissiornerit
aallartisarnissaat kaammattuutigissavarput. Aammalu avammut tuniniaaveqarnikkut
ataatsimoortumik aaqqiisinnaanerit ilanngullugit aqqutissiuunniaqqullugit
inassutigissavarput. Kisianni isumannaaqquarput sermimik imermillu
tunisassiornermi piginneqataassutit nunatsinni nuanqavissunik
piginneqataasinnaasut tamakkiisumik periarfissinneqaqqullugit.
Takornariaqarnikkut ineriartortitsinerup
nunap immikkoortua aallaavigalugit ingerlanneqalernissaa Naalakkersuisunut
aqqutissiuuteqqussavarput. Takornariaqarnermut aningaasaliissutaasartut 20 mio.
kronet pallillugit ukiut tamaasa amerlassuseqartut sineriak tamakkerlugu
sunniuteqarnerunissaat siunertaralugu.
Takornariaqarneq nuanatsinni
inuussutissarsiutit pingaarnerit aappaattut inissisimavoq, taamaattumillu
illoqarfinni nunaqarfinnilu takornarissanik sullissinermi ingerlalluarfiusuni
suli pitsanngorsaanerit ingerlanneqarnissaat kaammattuutigissavarput,
taamaalilluni takornariaqarnerup nunap sinneranut sunniussinnaanera
siunniunneqassammat.
Amutsiviit nunatsinniittut tamaasa
ataatsimut naalakkersuinikkut tapersersuutaasinnaasut tamaasa atorlugit
suleqataaffigineqartariaqarneri Siumumiit Naalakkersuisunut
innersuussutigaarput, tamatumani Qaqortumi amutsiviup nutaamik
periarfissinnissaa aamma pisariaqartutut isigaarput.
Kujataaniinnerput iluatsillugu
Aningaasaqarnermut Ataatsimiititaliaq Alluitsup Paani angalasimavoq, taavalu tassani
aningaasaliissutit 30. april killillugu aningaasaliissutigineqarsimapput
maannamut, taavalu Naalakkersuisut aamma kaammattorumavagut taakku
nalilersuiffigeqqullugit taamaalillugit suliffiup ingerlaannarsinnaanissaa
isumannaarneqassammat.
Inunnik angallassineq.
Siumumiit ilisimavarput nunatsinni
aningaasaqarnikkut ingerlaaserput aaqqissugaanerup killilersoraa. Taamaattumik
aaqqissugaanerup asllanngortinnissaanut piareersimavugut. Angallannerup
akisuallaarnera Inatsisartuni nalilersugassanngorlugu oqalliseqataaffigerusupparput
piareersimallutalu pitsanngorsaataasinnaasunik nassaarniarnermi Siumumit
suleqataarusukkatta. Tamatumalu aaqqiiviginiarnerani pingaarluinnarpoq Air
Greenland aamma Arctic Umiaq Line atuisullu suleqatigineqarlutik ilusilersueqataanissaat.
Angallannikkut aningaasartuutit
apparsarneqarnissaanut suliniutit aningaasanut inatsisissami taakkartorneqartut
Siumumiit tapersersorpagut, tamannalu ukiaru Naalakkersuisunit
saqqummiunneqarpat uterfigeqqissavarput.
Imaatigut usinik assartuineq.
Imaatigut usinik assartuinikkut
nutarterinerup siorna atuutinneqalersup suli malinnaaffigeqqissaarnissaa
Siumumiit kaammattuutigaarput nioqqutissat akiinut aammalu sanaartornermi
akigititaasunut annertuumik sunniuteqartarmat, malugeqqullugulu avammut tunisat
annertusiartorneranni akitigut naleqqussaasinnaaneq piareersimaffigeqqullugu.
Nunaqarfinni nioqqutissanik
pilersuineq pitsaasumik sukkasuumillu aaqqissuussaq Pilersuisup naammineerluni
suliarisinnaaneraa Siumumiit misissoqquarput.
Nunatsinnit avaammut tunisassiatta
EU-mut matumani Danmarkimut eqqunneqarnerminni nakkutilliisunit
pisariaqanngikkaluamik misissoqqissaarneqartarnerata nunatsinnut
aningaasarpassuarnik naleqartartup atorunnaarsinneqarnissaa siunertaralugu
danskit naalakkersuisut isumaqatiginninniarnissaannut inassutigaarput.
Suliffissaqartitsiniarneq.
Nunatsinni suliffissaaleqineq
ataatsimut isigalugu ukiut kingulliit annikilliallappoq, malunnartumilli
isorliunerusuni suliffissaaleqineq annertunerulluni. Taamaattumik
isorliunerusuni suliffinnik pioreersunik namminersortut aallartitsiniartut
Naalakkersuisunit tapersersorneqarnissaat Siumumiit kaammattuutiginiarparput.
Ilanngulluguli Siumumiit saneqqunneqarsinnaanngitsutut isigaarput sulisut
ilinniarsimanngitsut allallu piffimmiit piffimmut noorusuttarnerat
aningaasaliffigissallugu, tassami ilinniarsimasut kisimik suliffissaminnik
akiliutsillutik nuuttarsinnaanerat periarfissaqartinneqarmat.
Ineqarneq.
Inissialiortiternerup
illuliortiternerullu inissiat amerlanerpaat siunnerfigineqarlutik
aaqqissuussinikkut inerisarneqaruarnerat piginnqeatigiilluni
illuliorsinnaanerup annertunerusumik nunatsinni tamani atorneqalernissaa
illuminnillu attartukkaminnik piserusuttut annertunerusumik Naalakkersuisunit
tapersersorneqarnissaat Siumumiit kaammattutigerusupparput.
Ilanngullugu Naalakkersuisunit
saqqummiunneqarpoq ineqarnermut akiliutit nutarternerisa inernerisa
takutissimagaat inoqutigiit 100.000 kr. Ataallugit isertitallit ineqarnerminnik
ailiummik qaffaaffgineqarsimasut, Naalakkersuisullu aaqqiissuteqarnissamik
siunniuteqarnerat Siumumiit tapersersorparput.
Sanaartorneq.
Sanaartugassanut iluarsagassanullu
752 mio. kronet atorneqarnissaat Naalakkersuisut siunnersuutigaat. Kisianni Siumumiit
piumasarissavarput sanaartugassanut pilersaarutit tamaasa Aningaasaqarnermut
Ataatsimiititaliamit Naalakkersuisut suleqatigilluarlugit
nalilersorluaqqullugit sinerissami pisariaqartitsivinnernut
naapertuunnerusunngornissaat pisariaqartutut isigigatsigu.
Erseqqissaatigerusupparput
pingaarluinnarmat siunissami sanaartugassat ukiunut tallimanut
pilersaarusiortarnissaat, saniatigullu aserfallatsaaliuinermut
aningaasartuutissat ukiunut qulinut siumoortumik pilersaarusiortarnissaat.
Tamannalu 2004-mi aningaasanut inatsisip suliarineqarnerata aallartinnerani
piareersimaffigeqquarput.
Ingerlatsinermut sanaartugassanillu
aningaasaliissutit inuiaqatigiit ingerlanerannut qanoq pingaaruteqartigisut
ilisimavarput. Puigorneqartariaqanngilarli aningaasaliissutit saniatigut
inatsisitigut ilusilersuinerup malinnaatinneqartuarnissaa. Inuiaqatigiinni
naleqqussaanerit aningaasanik naleqartuaannartanngillat, inuiaqatigiilli
periarfissaasa inatsisitigut aqqutissiuunnissaat ilanngunneqartuartussaasoq
ilisimavarput.
Qorlortorsuarmi erngup
nukissiorsiliassap aningaasalersorneqarnissaa pillugu innersuussutigiumavarput
Aningaasaqarnermut Ataatsimiititaliap Naalakkersuisut peqatigalugit
Qorlortorsuarmik erngumik nukissiorfissap sanaartornissaata
aningaasalersornissaa avataanit attartornikkut pisussanngorlugu
aaqqutissiuutissagaat. Nukissiuutitigut inerisaaqqinnissaq annertunerusumik
eqqummaffigisariaqarparput, taamaattumillu nukissiutit allat atorneqalernissaat
aqqutissiunneqartariaqarpoq.
Paamiuni mittarfiliassap piviusunngortinneqarnissaa
Siumumiit isumaginiaqqissavarput. Taamaaliornikkut kujataani silaannakkut
angallassinikkut nalornissutaasut sapinngisamik ataqatigiissumik aaqqinnissaat
pisinnaaqqullugu.
Nunatsinni aningaasaqarnikkut
killiffiusoq naalakkersuisut erseqqissumik oqariartuutaat Siumumiit
nuannaarutigaarput. Aningaasarsiornikkut nammineernerusumik siunertaqartumik
ingerlatsiniarnitsinni alaatsinaattuartariaqarparput aningaasarsiornitsinnut
tunngavigisagut siunissami ataavartumik inuiaqatigiittut ingerlaqqinnissatsinnut
periarfissaqarnissaat.
Naalakkersuisut erseqqissumik
nalunaarutigaat silarsuarmi tamarmik aningaasarsiornerup mianersortumik
nalilersornissaa peqataaffigisariaqaripput. Oqaatitiginiarneqarmammi
isumaqartoqartartoq nunatta aningaasaqarnera ukiuni kingullerpaanut
sanilliullugu qaffariartunnginnerulissasoq.
Tamatumani inuiaqatigiittut
aaqqissugaanerput Naalakkersuinermi ingerlatsinermi aamma alaatsinaaginnarnagit
sakkortusaarluguli ingerlaqqissasugut Naalakkersuisunit siunnerfigineqartut
taamaalillugu Siumumiit taperserparput.
Nunatsinni inuiaqatigiinni suli
annertunerusumik isertitaqarnissarput anguneqassappat taava aalisarnikkut
isertitarisatta saniatigut inuussutissarsiornikkut piorsaanerit allat aqqutillu
nutaat atorlugit nukittorsaasariaqarpugut.
Tamatumani Naalakkersuisut
tunngavigisanit nutaanik misissuijumanerat tapersersorusupparput. Ilami danskit
tamatumani Naalakkersuisutigoortumik oqaloqatiginnissinnaanerminni neqeroortutaat
soorlu siusinnerusukkut statsministerip aamma taakkartorsimagaa misissuinermi
matumani ilaatittariaqartoq Siumumiit isumaqarpugut.
Inuussutissarsiornikkut
nukittorsaanissamik Naalakkersuisut siunnerfeqarnerat pimoorutamik
siunnerfeqartariaqartoq isumaqarpugut, taamaaliorniarnerlu tapersersorparput.
Taamak oqaaseqarlunga
Naalakkersuisut 2003-mut aningaasanut inatsisissatut Inatsisartut
inatsisissaattut siunnersuutaat aningaasaqarnermut ataatsimiititaliamut
qilanaarlunga suleqataaffigissavarput.
Per Rosing Petersen, ataatsimiinnermik aqutsisoq,
Inatsisartut Siulittaasoqarfiat sinniisussap aappaat, Siumut.
Ole Thorleifsenimut qujanaq
tullinnguuppoq Josef Motzfeldt Inuit Ataqatigiit takanna.
Josef Motzfeldt, Inuit Ataqatigiit oqaaseqartuat.
Inuit Ataqatigiit isumaqarput
nunatsinni innuttaasut illoqarfissuarnut ikittuinnarnut pisortanit
aningaasaliiffigineqarluartarnermikkut ineriartorluarfiulluareersimasunut
eqiterneqartariaqanngitsut. Minnerunngitsumik ukiuni kingullerni pisortat
suliffeqarfitsigut assigiinngitsutigut aningaasalersuisuunerat
aalajangiisuunerpaalersimavoq illoqarfiit qassikattaannaat ilaatigut
nalaatsornerinnakkut isumannarpallaanngitsumik napasinnaalersimanerannut.
Illoqarfiit ineriartorfittut
borgmesteriminnit inimi maani qinikkat ilaannit aningaasarsiornermillu
ilinniagartuutut taaneqartunit taagorneqartut tamarmik tassaanngillat
innuttaasut sulinerisigut avammut tunisassiornikkut aningaasanit nutaanik
nunatsinni pisariaqarteqisatsinnik pilersitsiviusut.
illoqarfiit nunaqarfiit imaluunniit
nunap immikkoortui ineriartortitsiviusutut taaneqartariaqartut tassaapput
avammut tunisinnaasatsinnik imaluunniit nunanit allanit pisiarisartakkatsinnut
taartaasinnaasunik tunisassianik ingerlatsiviusut. Taamaattumik aningaasanut inatsit
nunatta annertuutigut siammasinnerpaamillu ineriartortinneqarneranut
qulakkeerutaasussaalluni sakkussaavoq.
Tamatumani apeqqutaavinnarpoq taamak
isummernissamut Naalakkersuinikkut sapiissuseqarneq. Nunattalu immikkoortuini
periarfissanik upperinninneq. Soorunalumi nunap immikkoortuini innuttaasut
qinigaasa innuttaasut peqatigalugit periarfissarsiullaqqissusaat
piumassuseqarnerallu tamatumunnga aalajangiisooqataalluinnarpoq.
Ilumut innuttaasut ullumikkut
ingerlalersut illoqarfissuarni qassikattannguaannarnut eqiterunnissaat
siunnerfigineqanngitsoq nassuerutigigaanni tamanna aningaasaliisarnerup
siammasissumik oqimaaqatigiinnerusumillu timitaliivigineratigut
naqissuserneqartariaqarpoq.
Ilumut nunatsinni nammaqatigiinneq
naligiimmillu periarfissiineq ilumoorunneqarpat tamanna aamma
akileraarusersueriaatsikkut timitaliivigineqartariaqarpoq. Kommunini
akileraartitsinermi assigiinngissutsip annertuvallaartup akileraartarnermi
inatsisikkut iluarsiivigineratigut tamanna anguneqarsinnaavoq.
Ilisimaneqartutummi innuttaasunik
kiffartuussinerup meeraappata utoqqaappata siusinaarluni
pisartagaqartariaqartuuppata il.il. assigiinnerpaajutinnissaa nunap inuisalu
ataatsimoorluni misiginerannut pingaaruteqarpoq.
Qujanartumik kingullermik
inatsisartunut qineqqusaarnermi partiit arlaqartut aamma ullumikkut
Naalakkersuisuutitaqartut akileraarutaasussatut isertitanut ilanngaataasartut
malunnaateqartumik qaffaaviginiarlugit peqataalernerat Inuit Ataqatigiit
isumaannut naaperiaanertut nuannaarutigaarput. Tassuunakkut isertitakinnerpaat
akunnattumillu isertitaqartut oqilisaavigineqarsinnaammata.
Taamaattumik ataatsimiinnermi
matumani martsip qulinganni ataasinngorpat oqaluuserisassani immikkoortup 18-nip
oqaluuserineqarnissaanut Inuit Ataqatigiit isumalluarpugut Siumukkut
Atassutikkullu qineqqusaarnermi ilanngaatip qaffannissaanik malunnaateqartumik
qineqqusaaruteqaqataasimammata.
Aamma manna iluatsillugu
Naalakkersuisunut eqqaasitsissutigissavarput 2001 ukiakkut ataatsimiinnermi
Inuit Ataqatigiit taamanikkut Naalakkersuisooqataagallarnitsinni inatsisartunut
neriorsuutigisarput nunatsinni akileraartarnikkut atugassarititaasut nunat
tamat akornanni pissutsinut sanilliullugit misissuiffigitinniarlugit.
Ukiorlu
Naalakkersuisooqataatsiarnitsinni nuannaarutigalugu suleqatigiissitaq
tamatuminnga suliaqartoq ataatsimeeqatigisimavara ataatsimeeqateqarninni
paasitinneqarpunga suliaq martsimi tassa qaammat una naammassippat
Naalakkersuisunut tunniunneqalersaartoq akileraartarnikkut pissutsinut
aaqqiiniarnissamik isumassatsialappassuarnik imaqarmat suliap naammassinerani
nalunaarusiaq qaqugu inatsisartunut saqqummiunneqalersaarnersoq apeqqutigaarput
qanorlu akileraartarnermi aaqqissuusseqqinnissami Naalakkersuisunit
atorneqalersaarnersoq ilanngullugu tusarusupparput.
Ullumikkut innuttaasut
isertitamikkut periarfissaasa assigiinnginnerujussuannut takussutissat
pingaarnersaat innuttaasut kommuniminnut akileraarutimikkut
tunniuttagaaniippoq.
Kommunini suliffissatigut
inuussutissarsiorsinnaanikkullu qeqqani annertunerusumik
tapiiffigineqarsimanngitsuni akileraarummi procenti ataaseq 250.000 kr-nit
missaanik isertissutaasartoq qaffasinnerpaamik procentimut ataatsimut
pissarsiviusartoq 20 million kr-nit pallillugit isertitsisarpoq.
Unneqqarissaarnertut
taaneqarsinnaanngilaq pissutsit taamaannerisa malitsigisaannik kommunit
periarfissalunnerusut innuttaminnut pisussaaffitik naammaginarnerpaamik
naammassiniaraluarlugit taakkuummata qaffasinnerpaamik innuttaasunut akileraartitsiviusut.
Kommunit qassikattannguit ullumikkut
aningaasarsiornikkut periarfissaareersut taamalu ingerlarsorfioreersut nukik
pigisartik atorluarlissuk inatsisartunilu nunatta ataatsimoorluni
ingerlallualernissaa isumannaarniagassarigatsigu aallutassagut tassaasussaapput
kommunit ingerlallualernissaminnut perusukkaluarlutik Namminersornerullutik
Oqartussani annertunerusumik periarfissinneqarsimanngitsut
siuarsaavigissallugit.
Ilumut inuiaqatigiit nukittullutik
ineriartornissaat namminiilernissamut tunngaviulluinnartoq
periarfissikkusukkutsigu ullumikkumut sanngiinnerusutut inissisimasut
inuussutissarsiutitigut periarfissikkumallugit kommunit inuussutissarsiutinullu
ingerlatsivioreersut peqatigalugit aalluttariaqarigut Inuit Ataqatigiit isumaqarput.
Ingerlatsinitsinni sumiuna sanngiiffeqartugut qanorlu tamakku
aaqqinniarsinnaavagut.
Assersuutissat arlaqarput,
siullermik takornariaqarnermut inatsisartut januarip aallaqqaataani 1992-mi
Greenland Tourisme pilersinneqarmalli maannamut 300 million kr-nit qaangerlugit
aningaasaliisareerput.
Ullumikkulli takornariaqartitsinermi
ineriartortitsiviusup Greenland Tourismep salliutillugit aallussivigisai
tassaanerupput ingerlalluarfioreersut uffa isumaqarnartoq
siuarsaaviusariaqartut salliullugit GT-p aallutissagai.
Angallannermut akit iluarsinngippata
takornariaasinnaasunut ussassaarinermut aningaasaliussat kinguneri
qaqugorsuarmut utaqqisariaqarunarpagut.
Taamaattumik Angallanermut
Naalakkersuisoq ippassaq iterluarnaami Naalakkersuisoq angallannikkut aasiit
iluarsartuusseqqinniarnerannik oqaasii sunik siunertaqarnersut
itisileriffigitissallugit oqaluuserisaq manna piffissatsialaavoq.
Sanaartornikkut aningaasalersuutit
ingerlarsorfioreersunut annertunerpaajupput. Taamak ingerlarsorfioreersut
amerlanerpaatigullu inissaaleqiffiunerpaasut suli sanaartugassatigut
allatigullu inerisaaviginerisigut inooqatigiinnikkullu ajornartorsiutinik aamma
pilersitsivinngortinneqartartut saviup kajungerisaatut innuttaasunit
nutsuisuutinneqarnermikkut.
Kiisalu illoqarfissuit
qassikattannguit aamma taakkuupput inissialiortiternerni inigisanillu
attartornermi piginnittunngornissamut periarfissiiviusut.
Kingumut qiviarluni
inissialiortiternermi inatsisitigut iliuuserisimasat nalilersuiffiginerini
eqqarsaatiginngitsoorsinnaanngisagut tassa 104050 atorlugu piginneqatigiilluni
initaarsinnaaneq atorlugu attartortuunermit piginnittuunermut
aqutissiuussisimanikkut innuttaasut assigiinngitsunik periarfississimagatsigit.
taakkunanimi illoqarfissuarni
realkreditsikkut taarsigassarsisinnaaneq kisimi periarfissaqarpoq. Tamakkuli
qaavisigut attartortuunermit piginnittuunermut aningaasat landskarsimut isertut
aamma illoqarfissuarni taakkunani suli nutaanik inissialiornermut
atorneqassasut Naalakkersusut siunnerfigigaat ersarippoq.
Inatsisartut inatsisaat
innuttaasunit immikkoortitsisussaanngimmata Inuit Ataqatigiit kaammattuutigaat
sanaartugassanut aningaasaateqarfik aqqutigalugu realkreditsimut assingusumik
taarsigassarsisitsisarsinnaanerup illoqarfissuit avataaniittunut
periarfissiissutigineqarsinnaanera.
Taarsigassarsisitsisarfik ilaatigut
aningaasalersorneqarsinnaavoq illoqarfissuarni attartortuunermit
piginnittuunermut ineqartut pisinerisigut isertitatigut. Illoqarfissuarnimi
ullumikkutut annertutigisumik sanaartugassatigut aningaasalersuijuarnerup
kingunerisa ilagaat taakkunani sanaartugassat naammassineqarsinnaanatik
kinguaattoorfiujuarnerujussuat aammalu sanaartukkanut akitsorsaataanerujussuat.
Naak sanaartornermi
naammassisinnaasat killeqaraluartut sanaartornerup aningaasaliissutinut
malinnaasinnaannginneranut pissutaasut
aningaasaqarnermut ataatsimiititaliamit misissorneqassasut
kaammattuutigaarput.
Sanaartornermut pisortaqarfik
eqaannerusumik pilertornerusumillu naammassinnissinnaaqqullugu inatsisartunit
aningaasaliiffiigineqareeraluarpoq ilanngullu sanaartugassatut
aningaasaliissutaareersut nunatta ilaani sumiinneri kiisalu sanaartornermi
ingerlataqartut nuna tamakkerlugu qanoq atorneqarnerat aamma qanoq iliornikkut
tamakkiinnerusumik atorneqarsinnaanerat sanaartornerup
nassuiaavigineqarnissaani ataatsimiinnermi matumani pisussami
ilanngunneqarsimassasut Inuit Ataqatigiit naatsorsuutigaat.
Inuussutissarsiutitigut
siuarsaanissamik siunnerfeqartumik Naalakkersuisut siorna upernaakkut
saqqummiussaatigut qanoq iliuuseqarfissatut saqqummiunneqartut nunatta
aningaasarsiorneranut iluaqutaasussatut naatsorsuutigisariaqartut qanoq
pilersaarusiorneqarsimanersut aningaasanut inatsisissami inatsisissatut
siunnersuummi ujaraluaratsigit taamak soqaraluanngilaq.
Inatsisissatut siunnersuummut
nalinginnaq oqaasertaliussani inuussutissarsiutitigut siuarsaanissamik
quppernerit aappaat avillugit saqqummiunneqartut oqaasiinnakkut sumit
tigussaasumit pilersaarutinit anguniakkanik takorluukkanilluunniit
pilerinartunik ilaqanngitsut.
Inuussutissarsiutit maannakkumut
pingaarnersaat torersumik ingerlatsiviusariaqarmat Naalakkersuisut maannamut
sangusaqattaartumik kinalu nipitunerusumik oqartoq naalagarinerullugu
ingerlatsinerat sakkortuumik uparuartariaqarparput.
Saattuarniarneq qaleralinniarneq
raajarniarneq aamma tamakkerlutik tamakkersorfiginiarneqaraluarput.
Nunarsuarmili akit naalakkersuinikkullu atugassarititaasut aalisakkanillu
allanik iluaquteqarniannginnerup piujuaannartitsinissamik tunngaveqarniarneq
annertuumik ulorianartorsiortippaat.
Tassungalu atatillugu sinerissap
qanittuani aalisarnerup iluarsiiviginiarneranut atatillugu minnerpaamik
angallatinik piginnittut sulisitsisutut ingerlatsinermik
ilinniartinneqartuarnissaat kattuffiat peqatigalugu isumannaagassat ilagilluinnarpaat.
Aamma avataasiutini inuttat 2000
missaaniittut ilaasa 300-jut missaaniittut nunanit allamiunit suli
inuttaqartinneqarnerat suliffissanik ujartuinitsinni
isumaliutiginerusariaqarigut Inuit Ataqatigiit isumaqarput.
Inuussutissarsiutitigut siuarsaaniarnermut
suliniutit oqaaseqarfiginerat naggaserlugu aningaasaqarnermut
ataatsimiititaliamut kaammattuutigerusupparput selskabit marluk suliffissanik
pilersitsiniarnermut pilersaaruteqartut Greenland Ressources aamma Sulisa
nalilersuiffigilluaqqullugit siunnerfii imminnut ungasinngimmat
kattussinnaanerat ussernartorsiornarpoq. Immikkut tamarmik siulersuisoqaqinatik
direktioneqaqinatik allaffissuaqaqinatillu ingerlasinnaanerat iluatinnarmat.
Tamannalu aallaqqaataasinnaavoq
Namminersornerullutik Oqartussat selskabiutaasa 20-t missaaniittut ataatsimut
siulersorneqalernissaat aningaasaateqarfimmillu aqunneqalernissaat
eqqarsaatitsinniitilissagutsigu.
Pensionisiat aaqqiiffiginiarnerannut
2002 ukiakkut ataatsimiinnermi uparuaagatta aningaasaliunneqartut ilumut
naapertuuttuunersut annertunerusumik isummersorfiginngilagut.
Taamanikkut tikkuagarput aamma
ullumikkut suli tikkuarusutarput tassaaneruvoq pisariaqartitsineq annerpaaq
ilumut aaqqiiviginiarneqartuni inunni 400-niniinnersoq.
Mittarfiliortiternerup
nanginneqarnissaanut tunngatillugu Paamiuni mittarfiliassap
piviusunngortinneqarnissaa inatsisartut isummiuteriigaattut Inuit Ataqatigiit
aalajangiusimavaat. Taamaattoq maluginiarparput Naalakkersuisut Ilulissani
Nuummilu mittarfiit tallinissaannut aningaasaliilersaalereersut.
Sunaana tamatumunnga toqqammaviusoq.
Inatsisartummi suli taamak aalajangiisimanngisaannarput. Ilanngullugu
Naalakkersuisut siunnersuisooqatigiinnik annikillilerisimanerannut tunngasoq
apeqquteqarfigissavarput. Nerisaqarneq pillugu siunnersuisooqatigiit
atorunnaarsinniarneqarput. Naligiissitaanermut siunnersuisooqatigiit
annikillileriffiginiarneqarput, kulturikkut siunnersuisooqatigiit
annikillisamik ingerlaannartussaatinneqarput.
Nuna tamakkerlugu suliffeqarnermut
siunnersuisooqatigiit oqaasertalillannguarnagit atorunnaarsinniarneqarput.
Imigassamut aanngajaarnartunut siunnersuisooqatigiit atatiinnarniarneqarput.
Taamak immikkut ilisimasalinnut siunnersuisooqatigeeqarneq siammasissumik
inuttalersorneqartoq oqartussaaqataanermik isummamut naapertuuttoq suunuku
toqqammavigalugit Naalakkersuisunit pingaarnersiuffigineqarsimasoq imaluunniit
pingaannginnersiuiffigineqarsimasoq.
Taamak tamakkiinerusumik
aningaasanut inatsisissatut siunnersuut isumaliutersorfigereerlugu aningaasanut
inatsisissatut siunnersuutip uparuagassartai uninngavigilaassavagut. Siullermik
landskarsip isertitassai 36,6 million kr-nik qaffariassangatinneqartut tassa
ukiarmi Siumukkut Atassutikkullu siunnersuutaanniit maannamut siunnersuummut
36,6 million kr-nik qaffariassangatinneqarput isertitassat. Taakku
nuannaajallaatiginiarlugit tamatumunnga pissutissaqanngitsugut ingerlatsinermut
aningaasartuutit aamma qaammatit sisamaannaat ingerlaneranni 57,1 million
kr-nik qaffanniarlugit Naalakkersuisut siunnersuutaannit
illuatungilerneqarujussuarpugut.
Tamanna Naalakkersuisut
siunnersuummut saqqummiussissumminni oqaasiinut naapertuutinngilaq.
Naalakkersuisunut ilaasortaq tassannguaq saqqummiinermini ilaatigut ima
oqarmat: "Naalakkersuisut aningaasartuutit unikaallatsinnissaat
kissaatigaat siunissami aningaasatigut periarfissaqalernissaq
pilersikkumallugu." Isertitat apparnerisa aningaasartuutitigut
ingasattajaannginnissaq pisariaqarnerulersippaat.
Ilumoortormi maanna
Naalakkersuisunit nassuerutigineqartoq alla tassaavoq ukiut tulliuttut marluk
ingerlanerinnaanni landskarsip isertittagaasa pinngitsooratik 200 million
kr-nit angullugit appariartussaanera.
Taamaakkaluartoq akileraarutitigut
isertissangasat nikissanngitsut maannamiit naassaanngitsumut Naalakkersuisut
saqqummiussaanni takuneqarsinnaavoq. Naanguna akileraarutitigut
iluarsaaqqinnissamik qineqqusaarnermi oqaatsit timitaat? Naak
inuussutissarsiutitigut siuarsaanisamik inatsisartut aningaasaliissutaasa
kingunissaat?
Tassunga atatillugu inatsisartut
aningaasaqarnermut ataatsimiititaliaata aningaasaliiffiit 64-miittut
sukumiisumik misissorneqarnissaat Inuit Ataqatigiit kaammattuutigaat.
Aningaasaliiffimmi tassani inuussutissarsiutitigut siuarsaanermut
siunnerfeqartut aningaasaliissutit arlalissuupput. Immaqa ataatsimut
kattunneqarunik sunniuteqarnerusinnaasut.
Inuussutissarsiutitigut
siuarsaanissaq suliffissaqarnikkut iluaqusiivinnarani nunatsinni immitsinnut
pilersornerulernissamut aqqutissaavoq. Aatsaalli Inuussutissarsiornermut
Naalakkersuisoqalernikkut aallutassaq pilerinartoq.
Aappaattut nunaqarfiit
angallannikkut nioqqutissanillu pilersorneqarnikkut atugarisaannut tunngasoq.
Nioqqutissanik pilersuinermut Pilersuisoq A/S-imut 58 million kr-nit
landskarsip ukiumut akilertarpai. Royal Artic Line A/S-ip nunaqarfinnut
ingerlatsivianut aamma ukiumut 58 million kr-nit landskarsip akilertarpai.
Taamaattoq Pilersuisup tamanna
naammaginagu angallatinik sukkasuulianik arlaqartunik pisisariaqarsimavoq.
Taakkulu saniatigut Artic Umiaq Line A/S-ip ilaasunik annertuumik aamma
nunaqarfinnut isumaginninneranut 65,5 million kr-nik landskarsi akiliisarpoq.
Soorlumi aamma qulimiguulinnik ilaasunik assartuinermut Air Greenlandimut Air
Alfamullu kiffartuussinermut 108 million kr-nik landskarsi suli
akiliisariaqartoq.
Pingaartumik nunaqarfinni
pilersuinermut ilaasunillu imaatigut angallassinerup immikkut
naliliivigineqaqqittariaqarnera Naalakkersuisunit isumannaaneqassasoq Inuit
Ataqatigiit kaammattuutigaat.
Tamatuma aaqqiivigineqartariaqarnerani
nunatsinni pissutsit selskabit ataasiakkaat soqutigisaannit
pingaarnerutinneqassasut siunnerfigalugu sulisoqartariaqarpoq. Nunatsinni
pissutsinik najoqqutaqarluni ingerlatsisariaqarneq ilaatigut
kalaalinngorsaanermik taaniarneqartartoq ilumoorunneqartariaqarmat selskabit
amerlanerit Namminersornerulluni Oqartussani pigineqartut immikkut tamarmik
silarsuaaralersorlutik ingerlatsisinneqarnerat aaqqiivigineqartoq Inuit
Ataqatigiit isumaqarput.
Pingajussaattut aningaasaliiffik
pingaarneq 72 tamakkerlugu aningaasaqarnermut ataatsimiititaliap
Naalakkersuisut susassaqartut peqatigalugit misissuiffigissagaa Inuit
Ataqatigiit kaammattuutigaat. Aningaasaliiffimmi tassani pineqarput
ineqarnermut minnerunngitsumik BSU aqqutigalugu illuutit inatsisit BSU-p
tunngavigisai ullumikkut pissutsinut naleqqussarneqartariaqalivissutut
isumaqarfiginarput.
Illut inueruttut minnerunngitsumik
nunaqarfippassuarni isorliunerusunilu illoqarfinni nakkutigineqarnerat
unnersiutissaanngilluinnarpoq. Soorlumi aamma ukiorpassuarniluunniit
ineqarlutik aningaasarpassuarnik akiuteqareeraluartut akiliutigisamik nalingi
namminneq pigisamittut qularnaveeqqutitulluunniit atorsinnaanngikkaat.
Inatsisartuni ilaasortatut
nunatsinni angalalluni apuunneqartuartartoq tassa BSU atorlugu illuliat kimit
oqartussaaffigineqarnerisa ersernerluppallaarujussuarnerat.
Tamanna INI A/S-ip Ineqarnermullu pisortaqarfiup
pisussaaffimmissut piaartumik aaqqiivigisariaqarpaat. Nunaqarfinni aqutsisut
kommunalbestyrelsit minnerunngitsumik inissaaleqisut tamanna mikinngitsumik
erloqissutigaat illut asiujartortut isiuannguarlugit.
Sisamaattut naggasiullugu
Naalakkersuisut saqqummiussissumminni oqaatigisaannut inuiaqatigiit
aaqqissugaanerat pillugu iliuusissatut pilersaarutip sulissutiginera
aalajangiusimaniarlugu Naalakkersuisut kissaatigigaat. Tassunga tunngatillugu
apeqqutigiinnassavarput iliuusissatut pilersaarut 2000-mi ukiakkut
ataatsimiinnermi inatsisartunut saqqummiunneqartoq taamak oqarnerminni
Naalakkersuisut isumagineraat.
Inatsisissatummi siunnersuut una
oqaluuserisarput pilersaarummut 2000-mi saqqummiunneqartumut
naapertuutinngilluinnartunik arlalissuarnik takussutissaqarmat. Oqaatsit
iliuusissaqannginnermik ersersitsiinnartut naammanngillat.
Naalakkersuinikkut siunnerfittut
oqaasiinnaat atussallugit naammanngilaq, qanorluunniit oqaatsit
kusanartigigaluarpata.
Isertittakkat ikiliartorfianni
aningaasanut inatsisikkut sinneqartooruteqaminernissamik isumaliorneq
naammanngilaq aningaasanik isaatitsiffissat siulliunneqartariaqarput
eqqaallugulu ilaasortat ataasiakkaat aningaasanik agguaarusunnersuat qaqagu
pinerpoq piviusunngortiteriffigisinnaanngussagutsigu.
Aningaasanut inatsisissatut
Naalakkersuisut siunnersuutaat ataatsimut nalilissagaanni allaanngilagut nunani
kangiani qiterlermi uuliaatilissuit akornanniittugut. Tamanna piviusumik
toqqammaveqannginnami sinnattuaqinerinnaavoq. Aamma Naalakkersuisooqatigiit
ilisimareertariaqagaat.
Taamak inatsisartut 2003-mut
aningaasanut inatsisissaattut Naalakkersuisut siunnersuutaat oqaaseqarfigaarput.
Inaarsarneqarnerani aningaasaqarnermut ataatsimiititaliami inuiaqatigiinnut
ajunnginnerpaamik ilusiliiniaqataanissarput qilanaaralugu.
Per Rosing Petersen, ataatsimiinnermik aqutsisoq,
Inatsisartut Siulittaasoqarfiat sinniisussap aappaat, Siumut.
Inuit Ataqatigiit sinnerlugit Josef
Motzfeldtimut qujanaq. Tullinnguuppoq
Atassut sinnerlugu Jakob Sivertsen takanna.
Jakob Sivertsen, Atassutip oqaaseqartua.
Qujanaq. 2003-mut inatsisartut
aningaasanut inatsisissaannut siunnersuut Atassummit imatut
oqaaseqarfiginiarparput.
Inuiaqatigiit aningaasarsiornikkut ukiuni
kingullerni tunngavigissaariartuinnarsimagaluartut piffissami matumani
siunissamilumi aningaasaqarnikkut ingerlatsilluartoqanngippat
aningaasarliorfiuleratarsinnaasumik inissisimasoqartoq Atassummit
ilisimaarilluinnarparput.
Taamaakkaluartoq Atassummit
naammagisimaakkatsinnik 2003-mut inatsisartut aningaasanut aningaasanut
inatsisissaattut siunnersuummi aningaasarsiornikkut pissutsit
ajornerulersinnaanerat sillimaffigereerlugu Naalakkersuisut 29,4 million kr-nik
sinneqartoornissamik siunnersuuteqarput.
Naalakkersuinikkut aalaakkaasumik
ingerlatsineq unikaallatsinneqarpoq pilersaarutaasumik siusinnerusukkut
qinersisoqartariaqalersimaneratigut. Tamatumalu kingunerisaanik inuiaqatigiit
aningaasarsiornikkut ingerlanneqarnerat kigaallatsinneqarujussuarpoq. Maannali
tamanna qaangerlugu ingerlaqqittariaqarpugut.
Naalakkersuisullu siunnersuutaat
aningaasanut inatsisissatut siunnersuutaaqqaartumut sanilliullugu
allannguinernik annertuunik peqanngikkaluarluni inuiaqatigiinni
atorfissaqartitsinerussunut iluarsiissutinik arlalinnik siunnersuuteqarput
Atassummit tamakkiisumik peqataaffigerusutatsinnik.
Aningaasanullumi inatsisaagallartumik
raajat akilunnerujussuannik pissuteqartumik raajat akiinut tapiissutit
orsussarsiniartarnermi tapiissutit suliffissuit ingerlaannarnissaat
qulakkeerniarlugu tapiissutit, innarluutillit sullinneqarnerannut
aningaasartuutaanerusussat sanaartornermullu aningaasartuutissat maannamut
inatsisartuni inatsisartullu aningaasaqarnermut ataatsimiititaliaanni
suliarineqareerput.
aningaasanullu inatsisissatut
siunnersuummi ukioq manna nutaat aningaasaliiffigeqqullugit Naalakkersuisut
siunnersuutaat tamakkiisumik taperserpagut. Uani pineqarlutik
peqqinnissaqarfimmi utaqqisorpassuit ikilisarneqarnissaat nakorsaatinut
akitsoraluttuinnartunut matussusiisinnaanissaq. Nunanilu allani
suliaritittariaqartunut aningaasartuuteqarnerulernissaq sillimaffiginiarlugit
peqqinnissaqarfimmut 20 million kr-nik aningaasaliinerunissamik siunnersuut
Atassummit peqataaffigissavarput.
Taamaatutaaq aappaasut isertitaqarnera
tunngavigalugu maannamut pisortanit utoqqalinersiaqartitasimanngitsut ukioq
manna julip aallaqqaataaniit utoqqalinersisinnaatitaalernissaannut siunnersuut
tamakkiisumik Atassummit taperserparput. Taamatullu saniatigut pisortat
pisortanit utoqqalinersiallit aningaasatigut atugarisaasa
pitsanngorsarnerunissaat siunertaralugu aappaagumiit 12,5 million kr-nik
illuartitsiniarneq aamma Atassummiit peqataaffigerusupparput.
Ineqarnermut akiliutit nutartigaanerisa
kingunerisaannik innuttaasut isertitakinnerit eqqugaasimanerat
iluarsiiffiginiarlugu ukioq manna 3 million kr-nik aappaagumiillu ukiuni
missingersuusiorfiusuni 5,6 million kr-nik illuartitsiniarneq Atassummit
peqataaffigissavarput.
Taamatut oqareerluta innuttaasut
aningaasaqarnerannut toqqaannartumik attuumassuteqartut
aalajangersorniarneqartarneranni pilersaarusiortarnerit
peqqissaarunneqarnerunissaat Atassummit piumasarissavarput. Taamaaliornikkummi
inatsisartuni aalajangersakkat kingusiinnakkut kingunipilui matussuserniarlugit
immikkut aningaasanik illuartitseqattaartarnerit
pinngitsoorneqarsinnaalissammata.
Kulturip timersornerup sunngiffimmilu
sammisassaqarnerup inerisarniarneqarneratigut innuttaasut nukittuut akisussaassusillit
inuiaqatigiinnilu sullisseqataarusuttut amerliartuinnarnissaannut
qulakkeerinneqataassasoq ilisimaarilluinnarlutigu Atassummit
toqqissiallaatigaarput siunnersuisooqatigiit taakkunannga aallutaqartut
ingerlaannarnissaat Naalakkersuisut qulakkeerniarmassuk.
Atuarfitsialaap eqqunneqaraluttuarneranut
atatillugu nassuerutigisariaqarparput meeqqat atuarfiit
iluarsartuuttariaqalersimasut mikiallaalersimasulluunniit amerlavallaarmata.
Taamaattumik Atassummit atuarfiit pineqartut iluarsartuunneqarnissaat
allilerneqarnissaallu pillugit suliassat nukingernartutut isigaagut.
Taamaammat illoqarfinni nunaqarfinnilu
misissuinerit nalunaarsorneqarsimasut aallaavigalugit ukioq mannamut
siunnersuutaasut saniatigut Naalakkersuisut aqqutissiuussiniarneri Atassummit
taperserluinnarlugulu suleqataaffigissavarput.
Illoqarfinni ilinniartoqarfissuarni
ilinniartut ineqartitaanermikkut atugaat pitsanngorsarniarlugit suliniutit
ajunngilluinnarput. Ilinniagaqartummi sultigu tamatigut aamma ineqarnikkut
ajunngitsumik atugassaqartitaanerisigut qularutissaanngilaq ilinniarnerminnik
taamaatinnartartut ikiliartussasut.
Pisortat ingerlatsineranni
allaffissornermut aningaasartuutit ikilisarneqarnissaannut allioriarnerit
tamarmik inuttaasut sullinneqarnerannut ajorseriartitsinermik
kinguneqartinnaveersaartariaqarparput.
Taamaattumik Atassummit pisortat
ingerlatsivii kaammattussavagut sipaarniarnerup aqqani
pilersaarusiornerlunnaveersaaqqullugit. Eqaallisaasoqarneratigut sipaarniutinik
nassaartoqarluarsinnaasoq qularutissaanngilaq. Taamaammallu Naalakkersuisut
ukioq mannamut ukiunullu missingersuusiorfiusunut tulliuttunut pingasunut 30,2
million kr-nik allaffissornikkut sipaarniarnissamut pilersaarutaat
illersorneqarsinnaasutut nalilerlugit Atassummit tapersersorpagut.
Taamak oqareerluta Naalakkersuisunut
kommuninullu kaammattuutigissavarput allaffissornikkut
suleqatigiissutaasinnaasut pimoorullugu nassaariniaqqullugit. Sutigut tamatigut
immikkut ingerlatsiniarsarineq inuiaqatigiit akissaqartinngilaat. Taamaattumik
soqutigisatigut illuatungeriissinnaagaluaraanniluunniit ukiuni
aningaasarsiornikkut eqqanaariniarfiusuni soqutigisat innarlinngikkaluarlugit
suleqatigiissinnaaneq Atassummit upperaarput aqqutissiuuteqqullugulu.
Kommunit illuatungaanilu
Namminersornerullutik Oq artussat
suliassat nammagassallu aatsaat taamak ataqatigiissaarneqarluarnissaat
pisariaqartigaaq. Kommunit namminersornerat
uninngaaffigiinnarneqarsinnaajunnaarpoq. Naalakkersuisummi oqariartuutaat
inuiaqatigiit aaqqissugaanerat eqaannerusoq aningaasatigullu
illersorneqarsinnaasoq nassaariniartariaqalerpoq.
Inuiaqatigiit aningaasatigut
tunngavissarissaarlutik ingerlaannarsinnaassappata piffissaq kingulleq atorlugu
aaqqiiniartarnerit qimallugit siunissamut ungasinnerusumut
isigisinnaassuseqarluni pilersaarusiortarnerit aaqqissuussinermi
tunngavigineqarnerusariaqarput. Pingaartumik inuiattut
nammineernerulernissatsinnik aqqutissiuussinitsinni aningaasatigut immitsinnut
artukkissanngikkutta ullumikkut pisut kisiisa aallaaviginagit
pilersaarusioqatigiittariaqarpugut. Naalagaaffiit tapiissutaannik
isumalluuteqarnerput qimakkiartuaartariaqarparput.
Ullumikkullumi imaalersimavoq
Namminersornerulerneq, utoqqatserpunga Namminersulernissaq pillugu
ataatsimiititaliarsuup innersuussutai utaqqineqarmata ukiumiit ukiumut
Naalagaaffiup tapiissutai isumaqatigiinniutigineqartalerlutik. Maannangaaq
oqaatigineqarsinnaanngikkaluartoq ukiut qassit ingerlanerini Naalagaaffiup
tapiissutaasa ingerlaannarnissaat sullisilerluta inuiaqatigiit aningaasatigut
isertittagaat ikilinaveersaartinneqartarnissaannut iliuusissat
nassaariniartariaqarpagut.
Taamaattumik Naalakkersuisut
ilungersorlutik Inatsisartunut kajumissaarutaat tassalu killissat
sianigeqqullugit minnerunngitsumillu pingaarnersiulluni tulleriiaarinissaq
Atassummit paasilluarlugu Inatsisartuni sulineq ingerlateqqissavarput.
Sulinerli Inatsisartut Naalakkersuisullu
kommunillu kisimik kivissinnaanngilaat. Suliffeqarfiit Namminersornerullutik
Oqartussat pigisaat inuussutissarsiornermi ingerlataqartut kattuffiit
soqutigisaqaqatigiillu minnerunngitsumillu innuttaasut ataasiakkaat tamavitta
tamatta peqataasariaqarpugut. Inuiaqatigiit atukkamikkut ajornerusumik
tunngaveqalinnginnissaat qulakkeerniarlugu.
Ukiut 24-t Namminersornerulluta
ingerlasimanitsinnit ilinniarsimasavut aallaavigalugit ingerlaqqinnissatsinni
akisussaaqatigiinneq aallaavigalugu ingerlaqqittariaqarpugut.
Eqqaammasariaqarparput oqaluttuarisaaneq ullumikkullu pisut kisiisa
aallaaviginiarsinnaannginnatsigit.
Kingulissatsinnulli nunamik taassumalu ingerlanneqarneranik
tunniussisussaagatta taakkulu aamma kingulissaminnut tunniussisussaammata
taamaammat nukanganerup ukiui qaangertariaqalerpagut inersimasutut
akisussaassusilittut tamatta pissuseqarluta nunarput
ingerlateqqittariaqarparput.
Aningaasarsiornikkut siuarsaataasinnaasut
tamaasa atorfissaqartippagut. Nunatta karsianit tapiissutinik isumalluuteqarneq
qimakkiartortariaqarparput. Imaassinnaanngilarmi inuiaqatigiit ataatsimoortumik
aningaasaataat kisiisa ukiunut ajornernut illuartinneqartassasut.
Suliffeqarfiit pingaartumik Namminersornerullutik Oqartussat suliffeqarfiutai
aningaasarliornerminni nunatta karsianut aallerniartarnerat
oqaluttuaannanngortariaqarpoq.
Aningaasarpassuit inuussutissarsiornerup
siuarsarneqarnissaanut atugassaraluit aningaasarliornermut matussutissatut
atorneqartarnerat qimattariaqalerparput. Taamatuttaaq tapiissutinik
isumalluuteqarluni inuussutissarsiutinik ingerlatsineq aamma
qimakkiartuaarneqartariaqarpoq. Nunatsinni inuussutissarsiornermik
ingerlataqartut aalisarneruppat sanaartornerulluunniit iluaniippat piffissanut
aningaasarliorfiusunut sillimmartaarnerat ullumikkumiit
qajannaannerusariaqarpoq.
Innuttaasut ataasiakkaat
initaarsinnaanissaminnut suliffeqarfiutitaarnissaminnut aammalu
utoqqalinissaminnut ileqqaarinninnerusariaqarput. Ataatsimut oqaatigalugu
tamatta pinngitsoqarata aningaasatigut toqqissisimasumik nunatta
ingerlaannarnissaa aqqutissiuffigeqataaffigisariaqarparput.
Naalakkersuisut aningaasanut
inatsisissaattut siunnersuutiminni ersersippaat piffissap aalajangersimasup
iluani isertitat ukiunut tulliuttunut 200 million kr-nik ikileriaateqassasut.
Tassa iluarsartuussinissamut Naalagaaffiup
tunniuttagai aammalu suliffeqarfiit nunatta karsianut taarsigassarsisimasut
utertitassaat naammassineqartussaammata. Taassumaannaalluunniit takutippaa
nunatta karsianut aningaasat isertittakkat aalaakkaasumik taamak
amerlassuseqarnissaannik qulakkeerninniarneq qanoq pingaaruteqartigisoq.
Inuiaqatigiit aaqqissugaanermikkut
allanngortinneqartariaqarnerannik Naalakkersuisut oqariartuuteqarnerat
uagutsinnut inatsisiliortunut kommuninut innuttaasunullumi tunngassuteqartoq
suliassatut unamminartutut tigusariaqarparput. Inerneqartittariaqarparpullu
tamatta inooqataaffigisinnaasatsinni. Nunarput isorartoorsuaq taassumalu pisuussutai
uumassusillit uumaatsullu iluaqutigalugit inuuffigissallugu qanoq iliorluta
ataqatigiissaarluakkamik aaqqissuussisinnaavugut.
Sulifffeqarfiit suut sumiititssallugit
naleqqunnerpaajussava? Sanaartukkat sumiiffinnut naleqqussakkanut qanoq
tulleriiaarneqassappat? Innuttaasut najugaqartiternerput qanoq
kalluarneqassava? Isumaginninnikkut ataqatigiissaarineq qanoq ittoq
toqqarneqassava? Peqqinnissaqarfiup sullissinera qanoq aaqqissuunneqassava?
Apeqqutillu allarpassuit inuiaqatigiittut aaqqissugaanitta
allanngortittariaqarneranut atatillugu pimoorullugit suliassat Atassummit
tamakkiisumik suleqataaffigissavagut.
Ataatsimut isigalugu nunatta
ineriartortinneqarnerani inuiaqatigiit aningaasarsiorneratigut
suliffissaqartitsiniarnikkut allaffissornikkut imaatigut silaannakkullu
ilaasunik usinillu angallassinikkut illoqarfinni nunaqarfinnilu
tunisassiorfeqarnikkut suliffissuaqarnikkut atortorissaaruteqarnikkut
akileraartarnikkut akitsuusersuinikkut minnerunngitsumillu ilinniartitaanikkut
inunnillu isumaginninnikkut piviusumik anguniagaqarluta
iluarsartuussisariaqalerpugut.
Tamatumani pisortat aningaasaliissutaasa
inuiaqatigiinnut iluaqutaasumik pissarsissutaasumillu atorneqartarnissaat
qulakkeerniartuartariaqarpoq.
Avataaniit eqqussukkagut avammullu niuerutigisartakkagut
nakkutigeqqissaartariaqarpagut. Anguniartariaqarparpullu avammut
tunisassiornitta avataaniit isaatitsinitsinnit annerujuarnissaa.
Nioqqutissiornermullu isumassarsiullaqqissut inatsisiliornikkut akimmisaarnagit
tapersersortariaqarpagut. Namminersorlutik inuussutissarsiuteqartut
inuussutissarsiuteqalerusuttullu tapersersorluartariaqarpagut.
Avataaniit aningaasaleerusussuseqarneq
annertusartariaqarparput. Nunarput sutigut tamatigut
inuuffigiuminarsartariaqarparput sulisussat ilinniarluarsimasut
pigiinnarumallugit amerlisarumallugillu.
Minnerunngitsumillu
inuussutissarsiuteqartut nunatsinnut qammarumallugit EU-mut aalisarneq pillugu
isumaqatigiissut aqqutigalugu isertittakkagut kisiisa isumalluutigiunnaarlugit
allatigut suleqatigiissinnaaneq annertusartariaqarparput. Taamatuttaaq nunanut
tamalaanut niuillaqqinnerulertariaqarpugut.
Taamatut oqaaseqarluta 2003-mi
Inatsisartut aningaasanut inatsisissaattut Naalakkersuisut siunnersuutaata siullermeerneqarnera
oqaaseqarfigaarput. Partiinillu saqqummiunneqartut siunnersuutip
aappassaaneerneqannginnerani aningaasaqarnermut ataatsimiititaliami
nalilersoqqissaarneqarnissaannut suleqataanissarput Atassummit matumuuna
oqaatigaarput. Qujanaq.
Per Rosing Petersen, ataatsimiinnermik aqutsisoq, Inatsisartut
Siulittaasoqarfiat sinniisussap aappaat, Siumut.
Atassut sinnerlugu Jakob Sivertsenimut
qujanaq. Tullinnguuppoq demokratit sinnerlugit Per Dahl Skaaning, takanna.
Per Dahl Skaaning, Demokratit oqaaseqartuat.
Demokratit aningaasanut inatsisissatut
siullermeerinnilluni 4. marts oqalligisineqarneranut oqaaseqaataat
saqqummiutissavara.
Kalaallit Nunaanni meeraaninni ataatama
qimussernermik ilinniartimmanga oqarfigineqartuartarpunga inuit qimusserlutik
piniarlutik aallaraangamik taava kingumut qiviarneq ajortut. Tassami
angerlarsimaffimmi kialaaq qimattarpaat siunnerfiannilu ipput nu... ilisimanngisat isigisassallu qularnanngitsumik tupinnartut.
Taava ilorleq angerlarsernermi ajornartorsiutaasinnaasunillu
nanertorneqassanngilaq. Issuaaneq Ivars Silisip atuakkiaasa ilaanneereerpoq.
Issuagara atuaqqaaraanni eqqarsarnarpoq
atuakkiortup Kalaallit Nunaanni ukiuni kingullerni 25-ni aningaasaqarneq
pillugu pilersaarusioriaaseq aallussimasaat pigaa. Ilami ilumoorluni
oqassagaanni taava eqqorunarpoq oqarutta tamanna ingerlanneqarsimasoq aqqutaani
kukkunerit ilinniutiginngilluinnarlugit.
Taamalu assiliartalittut ittunik
oqaaseqaaseqaateqarniarnitsinni ilanngukkusunnarpoq manna tassalu qaqqat portusuut
maani kangerlunni siku saalisartoq qaangerniarsarileriga. Kingumulli qiviarutta
taava suna takussavarput? Qamutitta illerngi narlorinngilluinnartut
sangujoraaqisulli. Ilami soorlu tassa tumit sumut tamanut siunnerfeqaratik
sangujoraartut piffissatut qaangiuttutut avungarsuaq aanngariartortut.
Aqqusaartukkat ilaat nuannersuupput
ilaalli eqqarsaarmernartuullutik. Maanna piffissanngorpoq unissarnissatsinnut
immitsinnut aperaluta sumununa ila ingerlarusuttunga. Illerngit sangujoraaqisut
maliinnarniarpagut? Imaluunniit siunnerfeqarnerusumik ingerlarusuppugut?
Kalaallit Nunaat ukiuni makkunani
unammiuaagassaqaqaaq aningaasaqarniarneq eqqarsaatigalugu aammalu innuttaasut
eqqarsaatigalugit unammijuaagassat anguneqarsinnaanngitsut sangujoraarluta
maniitsorsiuinnavillutalu ingerlagutta unammiugassat ulluinnarni inuunermut
sunniuteqartussaassaqisut unammiugassat pisariaqartitsilluinnartut politikkerip
pisariaqartumik pingaarnersiuilluni tulleriiaarinissamut.
Tulleriiaarinerit ilatsinnut
paasiuminaassinnaasunik imaqanngitsoornavianngitsut siunissamili
paasineqanngitsoornavianngitsut.
Aningaasaqarnermut Naalakkersuisoq Augusta
Salling oqaaseqarnermini naggasiivoq oqarluni aningaasartuutissatsinnut
tunuarsimaarnerusariaqalersugut. Tamanna demokratit tungaaninngaaniit
isumaqatigerujussuaannarsinnaavarput. Kisiannili apeqqutaavoq mianersortumik
pineq kisiat aqqutigalugu ilorraap tungaanut saqittaassinnaanersugut.
Demokratit tungaanniit tamanna qularaarput.
Mianersortumimmi aqutsineq kisimi
atorsinnaanngilaq timitalimmilliuna iliuuseqarneq pisariaqartoq,
pimoorussisumik takutitsisumik ilumoorussisugut timitalimmik iliuuseqarneq
uatsinnut inuiaqatigiinnguanut aammali avataanit alaatsinaattunut tikkuussisoq
sumut ingerlaniarnitsinnut.
Tamannali aamma pisariaqartitsivoq
allanngujaatsumik isummersornissamik aamma aalajangiussat ilaat ilannut
annernarsinnaagaluarpataluunniit. (Isumagisaassaarusunngilagut?) taamatut
oqariartuuteqartumik Inatsisartut aningaasaqarnermut ataatsimiititaliaa Alluitsup
Paanut tikeraarnermini Nuka A/S-ip fabrikkianit sulisunit fabrikkiminnik
matusinissamik pinngitsoortitsiumasunit oqariartorfigineqarluni
tikilluaqquneqarpoq.
Alluitsup Paa allatulli nunatsinni
inukilliartornermik eqqorneqarpoq. Taamak takusaqartinneqarneq
assigiinngitsutigut qiimmaallannartoqarpoq. Piumassutsimimmi takutitsinerugamik
siunissamik qaamanerusumik isigilersitsilerpoq. Ataatsimoorlunilumi
unammiuagassanik nammaqatigiinnissamik oqariartuuteqarami. Piffissami aggersumi
pisariaqartissaqaarput inuiaqatigiit ataatsimoornerusumik piumasaqarnerminnik
takutitsisarnissaat.
Ukiunimi tulliuttuni unammijuagassat
qitiusussaassaqaat nunatsinni aningaasaqarniarneq ilorraat tungaanut
saqitsarneqassappat. Namminiilivinniarneq piviusunngortinneqassappat inuusuttagut
amerlanerusut ilinniagaqalersissagutsigit inuussutissarsiuteqartut
pitsaanerusumik tunngavissaqartinneqalissappata aammalu inuiaqatigiinni
sanngiinnerusortagut pitsaanerusunik atugassaqartinneqalersinnaassappata.
Taakkulu ataanni aamma eqaarsaatigalugit sumiginnagaallutik inuutitaasartut.
Suulliuku unammijuaagassarigigut. Tele
Greenland aappaagumiit ukiumut 50 millioninik kr-nik akiitsuminik landskarsimut
akilersuijunnaassaaq. EU-mut politikkikkut sulinermi malunnarsiartorpoq
aalisarsinnaanermut EU-mut nunatsinnut 319 million kr-neertarneq
ingerlatiinnaruminaassasoq.
Tassami paasinarsinnaavoq tamatuma allaat
affaannanngortinneqarsinnaanera. Qularnanngitsumimmi affaannaassanngippat taava
affaasut appaat piumasaqaatitaqartut aatsaat tunniukkumaneqartalissapput.
3. aamma naalagaaffiup
piumasaqaasigaasumik iluarsakkanut tapiissusiisarnera aappagu unissaaq.
Taamatullu nunatta ukiumut isertitai 50 million kr-nik ikileriassallutik.
Kiisalu qallunaat nunaat ukiumoortumik
tapiisarnermik nutaamik isumaqatigiissusiorfigisussaavarput tassanilu
qallunaani ilaatigut piumasaqaataavoq tapiissutit apparsalernissaat. Tamatuma angissusissaa suli
ilisimanngilarput. Kisianni sukkasuumik kisitsisinik katiterinerup takutippaa
naatsorsuutigineqarsinnaasoq ukiuni aggersuni isertitakkagut 250 million kr-nit
pallillugit ikileriarsinnaassasut.
Tamakkulu allatut iliorluni
matussuserneqartariaqartussaassapput. Koruunit millionerpassuit
paasiuminarsarniarlugit taava oqaatigineqarsinnaavoq tamakkiisumik
isertitakkatta taakku 5%-terimmatigit. Imaluunniit allatut oqaatigalugu
aningaasat taakku naligivaat Air Greenlandimut, Artic Umiak Linemut Royal Artic
Linemullu ukiumut tapiissutigisartakkagut. Kiisalu aamma allatut oqaatigalugu
tassaapput kommuninut tamakkiisumik aningaasaliissutigisartakkatta
pingajorarterutaat.
Taavami ullumikkut inuusaaserput
tigummiinnarniarlugu taava 250 million kr-nit taakku ukiut tamaasa qanoq
iliorluta matussuserniarsinnaassavagut? Tamatumunnga atatillugu
soqutiginarsinnaavoq Naalakkersuisut maannarpiaq tamatumunnga
akissuteqarniarsinnaassappata ilami ungasikkunanngimmat taakkartukkatsitut
tunngaveqalersinnaaneq.
Demokratit isumaqarput
aningaasaqarnikkut immikkut imminut napatilersinnaanissaq anguneqassappat taava
makku malinniarneqartariaqartut. 1. qulequttat tunngaviginiarneqartariaqarput
ukiumi 2000-mi nunatta siunissaanik takorluukkmik taallugu siunissami
ingerlatsinissamik siunnersuusiaq.
Naammi taanna ukiunik pingasunik
maanna nutaanngissuseqaleraluarluni ullutsinnut aatsaat taamak piukkunnartigilersoq.
Ajuusaarnaraluartumilli oqaatigisariaqarpoq inatsisartut siulitta ilaasa
pilersaarusiaq taanna malinngilluinnarlugu ingerlasimammata.
Pilersaarusiami ilaatigut ippoq
inuussutissarsiutinut tapersiisarnerup apparsarneqarnissaa. Akit assigiissaarnerisa
atorunnaarsinniarnissaat. Aammalu ilisimasatigut qaffassaanissaq sutigut
tamatigut ilinniagaqarnikkut ilinniagaqaqqittarnikkullu. Namminersornerullutik
Oqartussat aningaasartuutaasa sukumiisumik misissuiffigineqarnissaat.
Ilami ullutsinni aatsaat taamak
ingerlatsinermut aningaasartuuteqartigivugut. Taakkulu maanna
mianersoqqusilluni ikittaartartoq qulleq aappaluttoq ikittaartilersimavaat
akissaqanngilagullu suli aningaasartuutitta qaffassaqqinnissaannut. Ukiummi
sisamat kingulliit ingerlanerinnaanni ingerlatsinermut aningaasartuutivut
sisamararterummik 25 %-mik amerleriarsimasimapput. Imaappoq timitalimmik
iliuuseqartoqartariaqalerpoq.
Aningaasartuuteqarfik
ernumanartoqartoq alla tassaavoq kommuninut tunngasoq. Ukiummi kingulliit kommuninut
qitiusumik tapersiissutaasartut annertuumik qaffariarsimapput. Taamaakkaluartoq
ullumikkut kommunit arlaqaqisut aningaasaqarniarnerat ajorluinnartumiippoq.
Tamatumalu malitsigisaanik kommunit ilaasa karsimiittuutit minnerpaaffissaat
kommunit tamakkiisumik isertitaasa aningaasartuutigisartagaasa 5 %-terisaasa
ataallugu inissisimalersimavoq.
Allaallumi kommunit ataasiakkaat
Namminersornerullutik Oqartussanit atorniartariaqartarsimapput.
Ernumanartoqarporlu ilumut taakku utertitsisinnaanissartik artussannginneraat.
Tamannami pinngippat taava Namminersornerullutik Oqartussat aningaasartuutaat
missingersuusiornermi naatsorsuutigisimanngisartik nammalissavaat.
Naalakkersuisut tamanna pillugu qanormita eqqarsaateqarpat?
Tamatumunnga atatillugu immaqa eqqarsaatigisariaqarpoq kommunit sulineranni sullissisoqarfiusut amerlavallaannginnersut. Inuiaammi tamakkerluta 57.000 tusindtiinnaagatta. Ullutsinnimik qarasaasiat atorlugit sullissisinnaaneq ullutsinnut sullissinermut apparsaataanngitsumik eqikkaatitsisinnaavoq allaallumik immaqa taamatut iliorneq sammiviit ilaanni pitsanngorsaataasinnaavoq.
Taamaaliornikkut suliassanik pikkorinnerpaat piorsarneqarsinnaalissammata. Taamak iliornikkut aningaasartuutit ilaatigut apparsarneqarsinnaapput. Ilami pikkorinnerusariaqalerpugut atorluaanissamik siammasissumik ingerlatsineq pivallaarunnaarlugu.
Kommuniinnaanngillallit
ataatsimoortitaasinnaanermut eqqarsartariaqalersut. Ilami Namminersornerullutik
Oqartussat ataanni ingerlatsiviit ilaat taamatuttaaq eqqarsartariaqaleraluarput.
Soormi inunnik nassiussanillu assartuisut kattunneqarsinnaanngillat? Tassani eqqarsaatigaakka Air
Greenland, Artic Umiaq Line aammalu Royal Artic Line. Tamakkuninnga sooq
pilersitsineqanngila ingerlatsivik ataasiinnarmik qullersaqarfilik ataasiinnarmillu
siulersuisoqartoq pilersinniarlugu.
Qularnanngitsumik taamatut
iliornikkut sulisut akisoqisut ikilisarneqarsinnaapput atorluaaneq
aqqutigalugu. Taamatut aamma iluseqarsinnaapput inuussutissarsiutini
inerisaanermik suliaqarfiusut soorlu Royal Greenland, Tourismeqassaagut
saniatigullu Greenland Ressourceqarluta Sulisa A/S-qarlutalu? Taakkulu
katikkutsigit ingerlatsivinnik nukittuunik ataatsinik pilersitsisinnaavugut.
Erngertumimmi sipaarutissat avataasigut qularnanngitsumik siunnerfeqarnerusumik
ineriartortitsivimmik pilersitsissagaluarpugut, sammisami pikkorinnersat
katersuuffigisaannik.
Demokratit isumaqarput aamma
piffissanngortoq aningaasartuutinut kontot sukumiisumik
misissorneqalernissaannut sipaarutaasinnaasunik ujarlerfigalugit.
Saniatigullu demokratit
isumaqataaffiginngilaat siunertaqanngitsumik
aningaasartuuteqarfiginialersaakkat Paamiut mittarfiat Ilimmarfik ilaatigut
eqqarsaatigalugit.
Piffissami matumani pilersaarutit
taamatut ittut inissaqartinngilagut. Salliutittariaqarpagummi aningaasaliiffiit
inuiaqatigiinnut annertunerpaamik nalilinnik utertitsisinnaassuseqartut.
Tassani eqqarsaatigaagut tunngaviusumik atuarfiit kingusinnerusukkut
uterfigiumaakkakka.
Maannamut ingerlatsinerliorneq
ilorraap tungaanut sangutinniarlugu sipaaruteqarniaannassanngilagut. Aammali
siunissaq aningaasaliiffigisariaqarparput. Tassanilu ipput inuussutissarsiorneq
ilinniagaqarnerlu. Aningaasanut inatsisissaq 800-jut missinginik
qullerneqarpoq. Taakkunanngalu Naalakkersuisut inuussutissarsiornerup siarsarnissaanut
taamaallaat atorsimavaat quppernerit aappaata affaat.
Sulilu ajornerusoq unaavoq, tassalu
titarnerit taakkumerngit atuaraanni paasinarmat Naalakkersuisut sumilluunniit
inuussutissarsiornermut atatillugu takorluugaqanngitsut. Sunnguamilluunniimmi
innersuussisoqanngilaq. Qanoq iliorluni inuussutissarsiorneq
pitsanngorsarneqassanersoq.
Aali inuussutissarsiorneq tassaasoq
ullumikkut isaatissinnaasatsinnik qaffassaasussaq. Taamalu ataatsimoortunik
tapiissutisiarisartakkatta apparsarnissaannut pinngortitsisussaq. Tassani aamma
pisariaqarpoq asuli oqalunnani kisiannili timitaliilluni iliuuseqarnissaq.
Aamma tassani aallarniutitut siunissamik takorluukkamik inassutigineqartut
amerlineqarsinnaagaluarput.
Demokratit isumaqarput nioqqutissat
nunatsinni tunisassiarineqarlutik suliarineqassasut sumiiffinni
inuiaqatigiinnut iniminni akilersinnaanerpaasumik ingerlatsiviusinnaasuni.
Allatut oqaatigalugu iluanaarutit annerpaaffiini suliffeqarfimmi
inuiaqatigiinnullu. Suleriaaseq aamma nunatsinni suliffeqarfiutitta annersaanni
malinneqartoq aammalu taassumap ukiumut naatsorsuusiaani kingullermi atuarneqarsinnaalluni takuneqarsinnaavoq.
Ukiuni tulleriiaani aningaasatigut
tutsuviginanngitsumik ingerlatsinermik takutitsinerugaluariarluni maanna suliffeqarfiup
takutippaa ukiumut naatsorsuutit aningaasarsiorsinnaassuseqarnermik
takutitsisut. Naatsorsuutimmi iluamik atuaraanni takuneqarsinnaavoq
aningaasanik isaatitsiviunerpaasuusut aammalu inuiaqatigiit eqqarsaatigalugit
tassaasut suliffeqarfiit angisuut marluk Royal Greenlandimit pigineqartut. Tassani nunani allani inissisimasut.
Isertitat nunatsinni issimappata
takuneqarunanngitsut. Taakku assersuutiginerinut pissutaavoq nalunnginnatsigu
ussernartorsiorfigineqartartoq tunisassiat pigineqartut nunatsinni
suliaritinniarnissaat nunani allani pinnani (Uani amigaateqarpoq. Båndi 6 aamma
7-p akornanni) ..tuumik misillertitsissasoq. Taamalu nunatsinnut annertuumik
nakkarsaataassasoq. Suliffeqarfimmi nunatsinni imatut aningaasaqarnermut
pingaaruteqartigaaq ingerlatsinera politikkikkut
killilersornialissagaluarutsigu taava tamanna ajutoornerujussuarmik
malitseqassaaq. Avataanut Royal Greenlandimik (guultinik?) manniliortuusut
eqqarsaatigigutsigit.
Ilinniartitaaneq eqqarsaatigalugu
aningaasanut inatsisissaq ajoraluartumik aamma
isumalluaatissaqartitsingaanngilaq. Nalunaarusiarpassuimmi
aningaasaliissutiginialersaakkallu imminnut naapertuutinngilluinnarput. Soorlu
assersuutigalugu ukioq manna 1. august Atuarfitsialak nunatsinni
aallartilerparput. Nalunngilluinnaraluarlugu nunatsinni atuarfiit
amerlarnerpaartaat annertoqisumik nutarterneqarnissamik iluarsarneqarnissamillu
pisariaqartitsisut.
Atuarfiit ilaat allanit pisariaqartitsinerullutik. Tassalu demokratit aningaasanut inatsisissap siullermeerneranut oqaaseriumassaat.
Aqqaluk Lynge, ataatsimiinnermik aqutsisoq, Inatsisartut Siulittaasoqarfiat sinniisussap pingajuat, Inuit Ataqatigiit.
Taavalu tullinnguuppoq Anthon Frederiksen, Attaviitsut Kattusseqatigiit takanna.
Anthon Frederiksen, Kattusseqatigiit.
Qujanarujussuaq. 2003-mut Inatsisartut aningaasanut inatsisissaannut siunnersuutip aappassaanerlugu siullermeerneqarnerani Kattusseqatigiit sinnerlugit pisarnertut sapinngisamik sukumiisumik misissorluareerlugu imaattumik oqaaseqassuunga.
Siullermik ilisimatitsissutigissavara 2003-mut Inatsisartut aningaasanut inatsisissaannut siunnersuutaagallartuusimasoq siulleq qularnanngitsumillu aamma suliarineqarnera naqiterneqarneralu inuiaqatigiinnut akissaajaataasimassaqisoq immikkut oqaaseqarfigissannginnakku. Taamaattumik Inatsisartut 2003-mut aningaasanut inatsisigigallagaannut siullermut siullermeerinninnermi Kattusseqatigiinniit taamanikkut oqaaseqaatigisimasagut innersuussutigiinnarusuppakka.
Aningaasanut inatsisissamut siunnersuut maannakkut saqqummiunneqartoq aammalu inuiaqatigiinni arlalitsigut maqaasineqaleqisoq ataatsimut isigalugu tunngaviatigut akuersaarniarlugu isummersimavunga. Minnerunngitsumik aamma aningaasanut inatsisissamut siunnersuummut aningaasaliissutissatut siunnersuutit inuiaqatigiinnut ajunngitsunik siunertallit sunniuteqartussallu arlallit aningaasaliiffigineqartussat aamma inuussutissarsiornermut aningaasaqarniarnermullu pingaaruteqartut eqqarsaatigalugit. Soorlu assersuutigalugu Alluitsup Paani, Qaqortumi, Paamiuni, Qasigiannguani Qeqertarsuarmilu tunisassiorfiit ingerlaannarnissaat qulakkeerniarneqarmata.
Aammalu utoqqaat innarluutillit sulisinnaajunnaarnersiutillillu tigusartagaasa aaqqiivigineqarnissaannut immikkut aningaasaliissutissatut siunnersuutip kiisalu timersornermut kulturimullu aningaasaliissutit ikiliniarneqarsimsagaluartut annikillisinneqannginnissaat siunnersuutigineqarnera allallu aamma sanaartornermut iluarsaassinissamullu tunngasut inuiaqatigiinni pisariaqartinneqaqisut Kattusseqatigiinniit tunngaviisigut amerlanerit aamma isumaqatigisavut eqqarsaatigalugit.
Taamatut oqareerlunga soorunami aamma suna tamarmi isumaqatigiiffiuinnarneq ajormat ilaatigut makku isumaqataaffiginngisakka matumuuna ersarissareerusuppakka.
Siullertut Inatsisartut Naalakkersuisullu akissarsiaasa qaffanneqarnissaannut aningaasaliissutaanerusussat allanut inuiaqatigiinni pisariaqartinneqarnerusunut atorneqarnissaat ilungersortumik Kattusseqatigiit sinnerlugit Inatsisartut aningaasaqarnermut ataatsimiititaliaanut suliap aappassaaneerneqannginnerani pissutsinut piviusunut naapertuuttumik nalilersuiffigineqarnissaat kaammattuutigerusuppara.
Taakkua saniatigut oqaasissarpassuaqarnaraluaqisoq pingaarnersiuillunga Kattusseqatigiit sinnerlugit makkua pingaartinneqarlutik suliniutigineqarnissaat kaammattuutiginiarpakka.
Inuussutissarsiutinik siuarsaaneq. Aningaasanik nunatta karsianut isaatitsissutigineqarnerulertussamik kinguneqarsinnaasut annertunerusumik anguniarneqarlutillu sulissutigineqarnissaat. Matumani inuussutissarsiutit pingaarnersaat aalisarneq ukiuni kingullerni aaqqissuuteqqinneqartoq eqqarsaatigilluarlugu aalisariutit nutarterneqarnissaannaalluunniit eqqarsaatigigaanni minnerpaamik sinerissamut qanittumi aalisariutinik taarsersuinissamut 200 millionit amigaatigineqarput.
Taamaattumik Kattusseqatigiit sinnerlugit Naalakkersuisunut minnerunngitsumillu Inatsisartut aningaasaqarnermut ataatsimiititaliaannut inassutigerusuppara sinerissami qanittumi aalisarnermik aalisariutit minnerunngitsumillu aamma umiatsiaararsorluni aalisartut angallatiminnik taarsersuinissaannut periarfissanik nutaanik pitsaanerusunillu ujartueqqullugit.
Taakkununnga ilanngullugu aalisarnermi aalisakkat mianerineqarnissaat aamma ilanngullugu pimoorunnerullugu suliniutigineqarnissaa Kattusseqatigiinniit piumasaqaatigniarpara. Aalisakkanik piniakkanilli timitalimmik piujuaannartitsinissamik aamma eqqarsaateqarnermut atatillugu.
Piniarnermik inuussutissarsiuteqartut imminut akilersinnaanerusumik puisit amiisa panerteqqaarlugit tunineqartarnerisa allanngortinneqarnissaat pimoorullugu sulissutigineqarnissaa aamma ilanngullugu pisariaqarsorinarpoq. Isumaqarpungalu ilaatigut maannakkut upernaviup kommuneqarfiani puisit amiisa qassaannarlugit qeritillugit tunineqartalernerat piniartunit iluaqutigineqartoq tamakkiinerusumik atuutilersinneqarnissaa Naalakkersuisunit pimoorullugu misissuiffigeqqunarmat.
Kommunit inuussutissarsiutinik aallartitsiniarnermi allanut unammillinngikkaluarlutik pitsaanerusumik inatsisitigut periarfissinneqarsinnaanerat Naalakkersuinikkut eqqarsaatigilluarneqartariaqarsorinarpoq. Tassami suliffeqarfiit aallartinneqarsinnaagaluartut ilaatigut ataasiinnaanngitsut uninngatinneqarput.
Kommunit inuussutissarsiutinut tapersiisinnaanerat pillugu inatsisip ilaatigut akimmiffissarpassuaqartitsinera peqqutaaqataalluni. Taamaammat Naalakkersuisunut kaammattuutigerusunnarpoq kommunit inuussutissarsiutinut tapersiisinnaanerat pillugu inatsisip siornali kommuneqarfiit kattuffianniit Naalakkersuisunut ingerlatinneqareersimasup piaartumik Inatsisartunut suliareqqitassanngorlugu ingerlatteqqinneqarnissaa eqqarsaatigalugu.
Nalunngilarpummi nunatsinni aningaasarsiornerup ilaatigut aalisarnermi akit aammalu aalisakkat ilaasa aalisarneqarneranni ajornartorsiutit peqqutaallutik aningaasat kommuninut nunattalu karsianut isertinneqartartut ajoraluartumik amerliartorunnaartut tamanna kommunimut malunnarsereerpoq. Uiorlu manna kommunit missingersuutaat qiviaraanni nunatsinni kommunit ataatsimut katillugit 105 millionit sinnerlugit amigartooruteqarnissartik naatsorsuutigigaat takuneqarsinnaavoq.
Taamaattumik nunatta aningaasaqarniarnerannut aamma kommunit pitsaanerusumik eqaannerusumillu inuussutissarsiutinik aallartitsiniartunut tapersiisinnaaneri aqqutissiuunneqartariaqarsorinarput.
Qeqqaniik aqutsinerup annikillisinneqarsinnaanera sutigut tamatigut aamma aningaasaqarniarnikkut iluaqusiisinnaasoq qularutissaanngilaq. Sanaartornermut tunngatillugu Kattusseqatigiit sinnerlugit nuannaarutigalugu oqaatigissavara Naalakkersuisut anguniagaasa ilaat assut Kattusseqatigiinniit iluarisimaaratsigu. Tassalu qeqqaniit aqutsinerup annikillisikkiartortinneqarnissaanik anguniagaqarneq.
Ilumut qeqqaniik aqutsineq ilaatigut ajunngitsortaqarsinnaagaluartoq kisianni ulluinnarni ingerlatsinermut assorujussuaq akitsorsaataallunilu suliassanut assigiinngitsunut kinguarsaataasartoq tamanik ilisimaneqarpoq. Taamaattumik sanaartornermut tunngatillugu Kattusseqatigiinniit aqqutissiuusseqataajumavugut sanaartornerup sapinngisamik pisariinnerusumik akikinnerusumillu ingerlanneqalersinnaaneranut.
Sanaartugassat aningaasanut inatsisikkut akuersissutaareersimasut kommuneqarfiit assigiinngitsut isumaqatigiissuteqarfiginerisigut kommuneqarfinnut ingerlatassanngorlugit agguaanneqartalernissaat Naalakkersuinikkut piviusunngortinneqarnissaa kaammattuutiginaqaaq.
Taamaaliornikkummik allaffippassuit aqqusaanngikkaluarlugit suliassat sukkanerusumik ingerlanneqartalernissaat anguneqarsinnaammat. Aammalu inissialiortiternernut atatillugu titartakkat assigiiaartut arlaleriarlugit atorneqartalersinnaanerat periarfissarsiuunneqartariaqartoq isumaqarpunga.
Tassami sanaartugassamut ataatsimut titartaatitsisarnerit qanoq akisulluinnartigisut tamatta nalugunanngilagut. Kiisalu sanaartornerup akikinnerusumik ingerlanneqarsinnaaneranut aamma sunniuteqaqataasinnaasoq isumaqarpunga Naalakkersuisunit eqqarsaatigineqartariaqartoq, tassalu aningaasanut inatsisissap suliarineqarnerani illoqarfinni assigiinngitsuni pilersaarutit assigiinngitsut ataasiakkaat immikkut aningaasartaasa saqqummiunnaarlugit inissinneqartalernissaat anguniarneqassasoq.
Tassani sanaartornermi suliassat ataasiakkaat eqqarsaatigalugit aningaasaliissutit aalajangersimasut kikkunnit tamanit takuneqarsinnaajuartillugit suliarinninniarlutik neqerooruteqartut nalunngereertarmatigit aningaasat qanoq amerlatigisut immikkoortinneqarsimasut.
Isumaqarpunga aningaasaliissutit suliassanut ataasiakkaanit tamanit takuneqarsinnaatillugit sapinngisamik tamakkerniarneqartarnerat ileqquliutiinnarneqarsimasoq pissusissamisuunngitsoq. Taamaattumik pilersaarutit assigiinngitsut suuneri sumilu suliarineqarnissaat piffinni aalajangersimasuni aningaasaliissutaasussat ataatsimoortumik annertussusaat taamaallaat aningaasanut inatsimmut immikkoortinneqartalernissaat atorlugu ingerlatsisoqaraluarpat suliarinnittussarsiuussinermik neqeroorutit pissanganarnerusut assigiinngiiaarnerusullu immaqa pissarsiarineqartalissagaluarput.
Taamaaliornikkut aamma sanaartugassat akikillisaavigineqarsinnaanerat tassuunaarlugu aqqutissiuunneqarsinnaassagaluarmat. Aammalu sanaartornermi assersuutigalugu inissialiortiternermi sanaartugassat immikkoortitaarlugit suliarineqartarnerat eqqarsaatigeqqittariaqannginnersoq aamma ilanngullugu Naalakkersuisunut eqqarsaatigeqqunaqaaq.
Minnerunngitsumik ukioq kaajallallugu assigiimmik sanaartornerup ingerlanneqarsinnaanera qulakkeerumallugu. Tassa sanaartornermi suliaqartut ukioq, ukiup qanoq ilinera apeqqutaatikkunnaarlugu ataavarnerusumik suliassaqartissinnaanerat qulakkeerumallugu. Soorlu assersuutigalugu toqqavissanik sanaartorneq aasaanerani ingerlateriarlugu ukialernerani sanaartukkat silataat naammasseriarlugit ukiaanerani ukiuuneranilu sanaartukkat ilui suliarineqartarsinnaammata.
Kiisalu 6040 atorlugu sanaartornermi aningaasaliisarnermi 6040-p atorunnaarsikkiartuaarneqarnera Kattusseqatigiinniit assut isumakulunnartipparput. Naak nammineerluni aammalu piginneqatigiilluni illuliortiternerit isumalluarnaraluartut taamaattoq inuup ilaqutariillu ataasiakkaat nammineerlutik imaluunniit piginneqatigiilluni illuliornermut peqataasinnaanerminnut periarfissaqanngitsut aammalu inissaaleqinerup suli taamak annertutigisumik ajornartorsiutaanera eqqarsaatigalugu 6040-p atorunnaarsikkiartortinneqarnera assut eqqarsarnartorqartippara.
Imeq pimoorullugu nunatsinniit avammut tunisassiarineqartariaqartoq isumaqarpunga. Tassami maanna takusinnaasavut tunngavigalugit taannaavoq nunatsinni naammattorsuarmik pigisarput. Piffissanngorpoq nunatta imermik aningaasarsiuteqartalernissaa pillugu naalakkersuinikkut pimoorussinissaq sulissutigissallugu. Tassami ilumoorpoq nunarsuup ilaani imeq allaat oliemiit akisuneruvoq. Aammalu nunarsuup ilaani erngup amigaatigineqaleriartornera allaat peqqinnissamut akornusiisussaq aamma eqqartorneqartareerpoq.
Taamaattumik oliesiorniarnerit nalorninartoqaqisut akisoqisullu taamaatillugit erngup avammut nioqqutissiarinissaa pimoorullugu siulliullugulu sulissutigineqartariaqarsorinarpoq.
Takornariaqarneq suli annerusumik aallunneqartariaqarpoq pingaartumik periarfissat pitsaalluinnartut nunarsuarmioqatitsinnullu pilerinarluinartut neqeroorutigineqartartut avammut tuniniarneqarnerini suli annerusumik naalakkersuinikkut aningaasaliissuteqarnikkut annertusaanermik ingerlatsisoqartariaqarpoq. Billetsit akitsorsarunnaarlugit angallannerup pilersaarusiorluagaasumik tamanut aamma maani nunaqavissunut akikinnerusumik angalasalernissat aaqqissuunneqarnerisigut imminut akilersinnaasumik timmisartuussisarnerit umiarsuakkullu angalanerit annertusarneqartariaqarput.
Soorlu assersuutigalugu Ilulissani takornariartitsinermi suliaqartut piffissami kingullermi helekopterimik S-61-mik diskobugtemi aasamut inissiisoqarnissaanik aarleqquteqarlutik qisuariaateqarnerat takornariartitsinermi takornarissanut neqeroorfigineqarsimasunut qularnanngilluinnartumik paktsissutaassaqisoq. Aammalu takornarissanut neqeroornermi piviusunngortitsisinnaannginnermik tatiginassusermillu annertuumik apeqqusiisussaq Naalakkersuisuniit immikkut ittumik iliuuseqarfigineqartariaqartoq Katttusseqatigiit sinnerlugit matumuuna piumasaqaatigaara.
Tassami taannaannarluunniit qiviaraanni takornarissat pakatsisinneqarnissaat nunatsinnut sunniuteqarnerlussinnaanera aarloqqutigisariaqarpoq. Minnerunngitsumik takornarissat nunatsinnut tikittartut affangajai suli Ilulissanukartartillugit.
Tamatumani aamma annaassiniartarnermi isumannaallisaaneq sillimaniarnerlu eqqarsaatigalugit helekopterimik S-61-mik diskobugtemut inissiisoqarnissaa pisariaqarluiunnarpoq. Tassami ingerlatani suniluunniit aningaasaleeqqaanngikkaanni aningaasani isaatitsisoqarsinnaanngitsoq tamatta nalunngilarput.
Taamaattumik 2003-mi takornariartitsinerup siuarsarneqarnissaanut tapiissutigineqartartut 2 millioninik appartinneqarnissaannik siunnersuutip Kattusseqatigiinniit eqqarsartaaserput naapertorlugu isumaqarpunga piffissamik eqquinerlunnerusoq. Tassami takornariartitsinerup tapersersorneqarnissaanut aatsaat taamak pisariaqartitsineq annertutigisoq takuneqarsinnaammat.
Nunatsinni naatsorsueqqissaartarfiup kisitsisaatai tunngavigalugit takuneqarsinnaavoq nunatsinni aningaasarsiornerup 1993-miit 2001 ilanngullugu qaffakkiartorsimanera tamanut soorunami pitsaasumik sunniuteqarsimasoq. Kisiannili 2001-miit aningaasaqarneq ajoraluartumik ammut saakkiartulersoq aamma takuneqarsinnaavoq.
Tamannalumi aamma kommunimut sunniuteqarnerluppoq tassa naatsorsueqqissaartarfiup kisitsisaataani ilaatigut takuneqarsinnaammat 2002-mi nunatta avammut niuernermi milliardit affangajaani amigartooruteqarsimasoq.
Kisitsisit taamaattut tusarlugit soorunami ernumaammernarput. Taamaammat pisariaqarpoq naalakkersuinikkut immikkut ittumik iliuuseqarnisssaq avaqqunneqarsinnaanngitsoq. Minnerunngitsumik nuna tamakkerlugu akileraarutitigut isertitat immikkullu akileraarutit minnerunngitsumillu aamma ingerlatseqatigiiffiit akileraarutaasa 2001-miit 2002-mut appariarsimanerat naatsorsuutigineqartoq takuneqarsinnaammat.
Taamaattumik ingerlatsinermi pisariillisaaneq qeqqaniit aqutsinerup annikillisinneqarneratigut akisussaaffiillu siammarternerisigut ingerlatsinermut aningaasartuutit annikillisinneqarsinnaanerat kiisalu inuussutissarsiutinik siuarsaanermut aningaasaliinerunikkut nunatsi aningaasarsiornerup suliffissaqartitsiniarnerullu annertusineqarnissaa Kattusseqatigiit sinnerlugit kaammattuutigaakka.
Naggataatigut ilageeqarnermut tunngasut sanaartugassat aammalu sanaartugassanngitsunut kisiannili ilageeqarnermut aningaasaliissutit ukiuni arlalinni nikisinneqarneq ajungajattut aningaasaqarnermut ataatsimiititaliamut nalilersorluarneqarnissaat kaammattuutigerusuppara. Aammalu atuarfinnik nutarerinissanut aningaasaliissutit 2001-miit 29 milliuunioriarlutik 2002-mi 19 millioninut kiisalu ukioq mannamut 9 millioninut appartikkiartorneqarneri atuarfimmut nutaamut siunertamut naapertuutinngimmata nalilersuiffigineqarnissaat kaammattuutigaara.
Taamatut oqaaseqarlunga suliap aappassaaneerneqannginnerani aningaasaqarnermut ataatsimiititaliamut suliarilluarneqarnissaa inassutigaara.
Aqqaluk Lynge, ataatsimiinnermik aqutsisoq, Inatsisartut Siulittaasoqarfiat sinniisussap pingajuat, Inuit Ataqatigiit.
Tullinnguulluni oqaaseqarumavoq Aningaasaqarnermut, utoqqatserpunga, taaguutai allanngulaarnikuugamik ila. Ateqarpoq Aningaasarsiornermut Naalakkersuisoq takanna.
Augusta Salling, Aningaasarsiornermut Naalakkersuisoq, Atassut.
Qujanaq. Partiit kattusseqatigiillu oqaaseqaataannut Naalakkersuisut sinnerlugit qujavunga. Tassa siullermik erseqqissaatigissavara soorunami uani Naalakkersuisoqarfinnut ataasiakkaanut apeqqutit aammalu uparuaassutinut tunngassuteqartut taakkua Naalakkersuisut ataasiakkaat akissuteqarnissaminnut periarfissaqarnerat tassani atorneqassasoq naatsorsuutigilluinnarakku. Uanilu uanga akissuteqarninni aningaasaqarnermut Inatsisartut aningaasanut inatsisissaata siunnersuutigineqartup saqqummiunneqartup ataatsimut eqikkakkamik oqaaseqaateqarnisi oqaaseqarfigissavakka.
Siullermik erseqqissaatigissavara soorunami aamma Inatsisartut arajutsisimanngilluinnaqqissaarpaat massakkut Naalakkersuisuusut ulluni 14-niinnarnik periarfissaqarlutik aningaasanut inatsisissaq suliarisussaammassuk.
Taamaattumik Inatsisartuninngaaniit aamma piumasarineqartarpoq suliassat allanngortitsinissat assigiinngitsut peqqissaarluni misissorluaqqaarlugit misissuilluarnerit tunngavigalugit inuiaqatigiinni allannguutissat assigiinngitsut suliarineqqartassasut.
Taamaattumik takorloorneqarsinnaavoq Naalakkersuisut allannguutissanik annertunerusunik uunga inatsisissamut saqqummiussisinnaanngimmata. Tassani pissutaalluinnaqqissaarpoq allanngortitsinissami suliaqassagutta kalluarneqartussat kikkut tamaasa aamma paasiniaaffigilluaqqaarlugit aammalu tusarniaaffigilluaqqaarlugit aammalu allanngortitsinerup kingunerisinnaasai pitsaasut pitsaanngitsullu tamaasa misissorluaqqaarlugit aatsaat allanngortitsinissamik suliaqarsinnaagatta.
Taamaattumik Naalakkersuisuninngaaniit aalajangiunnikuuvarput aningaasanut inatsisissaq una saqqummiussassarput soorunami pisinnaaffitsitsigut pisariaqartutigut allanngortitsiallassalluta. Kisiannili annertuunik suliassartallit misissoqqaarneqartariaqartut taakkua kinguuaallatsikkallartariaqarlutigit.
Uani erseqqissaatigissavara soorunami Naalakkersuisooqatigiit pilersaaruteqaratta aamma inuiaqatigiinni allanngortittariaqakkanik aningaasarsiornikkut inissisimanerput siunissami pitsaanerusumik inissisimalernisaa anguniarlugu aamma maani Inatsisartunit arlaqartunit oqaatigineqartoq tusaasinnaavara inuiaqatigiinni allanngortiterinissaq taanna pisariaqartussaasoq. Tamannalu aamma ilaatigut immaqa annernartortaqarsinnaassasoq kisianni aningaasarsiornikkut pitsaasumik inissisimassagutta siunissami taava nukissaqarfigisariaqaripput allanngortiterinissamik aamma iliuuseqarnissaq.
Tamannalu aamma Inatsisartuninngaaniit peqataaffigerusunneqartoq tusaasinnaavara. Minnerunngitsumik oqaaseqartut siunissami aningaasatigut sillimmartaarnissarput qanoq pisariaqartigisoq. Tassani taamaaliussagutta pinngitsoornata aaqqissuussaanermik allanngortiterisariaqassuugut. Aammalu taamaaliortariaqarpugut.
Tapiissutit tunngavigalugit ingerlaneq taanna qaangeriartuaartariaqarparput aamma tusaasinnaavara oqaaseqartut arlaqartut tamanna aamma saqqummiukkaat. Tassuunakkut Naalakkersuisut suliniarnerminni inuussutissarsiutit imminut akilersinnaasungorsarniarneranni suliuniutit assigiinngitsut pilersaarutigisaat saqqummiunneqarumaarput 2003-mut aningaasaqarniarnikkut ingerlatsineq pillugu nalunaarummi tamakku sammineqassammata.
Tassa inuiaqatigiinni allanngortiterinissat imaaliallaannaq pisinnaanngillat aammalu aningaasatigut isaatitassat annertunerulissappata taava iliuusissat aamma tamakkua misissuilluaqqaarluni aatsaat pineqarsinnaapput.
Inuit Ataqatigiinninngaaniit ujartorneqarpoq qineqqusaarnermi ilanngaat qineqqusaarutigineqarsimasoq sumut pinersoq aammalu neriulluarlutik siunnersuutertik takkuppata taperserneqarluarnissaminnik. Naalakkersuisooqatigiinninngaaniit aalajangiusimavarput allannguutissat suulluunniit misissuilluarnerit nalilersuilluarnerillu tunngavigalugit suliarineqassasut.
Taamaattumik akileraartarneq pillugu suleqatigiissitaq aamma nunani allani akileraartarneq pillugu nallersuillutik naleqqiussillutik suliaqartut taakkua suliaat upernaaq manna naammassineqartussaasoq takoqqarusupparput Naalakkeruisuninngaaniit. Aamma Inatsisartut oqalliseqataanissaat tassani pisariaqartipparput. Inassutigineqarsimasut aqqutiginiarsinnaanerigut akileraartarnermut allanngortiterinissami. Imaluunniit allaqqinnaamik maani Inatsisartuni isummiussaqarsinnaaneq aamma periarfissaassooq soorunami.
Kisianni pingaarluinnaqqissaarpoq suliaqartitsisimavugut taakkulu suliat misissuinerit tunngavigalugit nalilersuisariaqarpugut sukkut allannguallatsitsissalluta.
Maannangaaq allanngortiteraluta aallartikkaluarutta taava Naalakkersuisuninngaaniit takusinnaavarput pisariaqalersinnaasoq allanngortitsisimanerup aamma allatut ajornartumik immaqa naleqqussarlugu allanut allanngortitsinissanut allatut iliuuseqarfigineqaqqinnissaat. Taamaattumik pingaartipparput suliap taassumap nalilersorneqarluni misissorneqaqqaarnissaa.
Nuannaarutigaara aamma malugisinnaagakku minnerunngitsumik Siumup Atassutillu tungaaninngaaniit Naalakkersuisut siunniussaat taperserneqartut. Soorunami paasisinnaavara illuatungiliuttuninngaaniit annertuumik aamma illuatungiliunneq ilaatigut ersersinniarneqarmat. Taanna pissusissamisuuinnarpoq. Kisianni minnerunngitsumik Inuit Ataqatigiinnut oqaatigissavara uagut Inuit Ataqatigiit qaammat ataaseq Naalakkersuisooqataanerminni aamma aningaasanut inatsisissaq suliarisimavaat. Uagut ullut 14-niinnaat periarfissarigatsigit qinersimavarput allanngortititigassatut tunngavigisimasaat annikitsuararsuarmik allanngortillugit inassutigissallugit. Pissutigalugu misissorneqareersimasut misissugassallu piffissaq atorneqartussat taanna aamma aalajangiisuusorujussuuvoq. Takorloorsinnaavarsilu ullut 14-nit ingerlanerinnaanni kikkut tamaasa tusarniarlugillu paasiniaaffigalugillu suliarineqassappata taava tunngavilersuutit naammaginarnavianngitsut.
Taamaattumik uagut Naalakkersuisuusut massakku qinerparput allanngortiterinissami ukiumut 2004-mut aningaasanut inatsisissamut allanngortiterinissat annertunerusut utaqqikkumallugit. Taamaalilluni misissugassat peqqissaartumik suliarineqarsimasut tunngavigalugit suliassat ingerlanneqassammata.
Uani malugisinnaasakka aamma takusinnaasakka tunngavigalugit isumaqarluinnarpunga Naalakkersuisut aamma siunniussaat partiinit Kattusseqatigiinnillumi aamma taperserneqartut tassa aningaasartuuteqarfigineqartariaqartut assigiinngitsut maani siunnersuutigisagut.
Kisianni aamma malugisinnaallugu Inuit Ataqatigiinninngaaniit ippigigineqartoq utoqqaat utoqqalinersiaqartut taakkua aappaqarsimagunik isertitaqartumik utoqqalinersianik pissarsineq ajortut massakkut aaqqiiviviniarneqarnerat taanna Inuit Ataqatigiinninngaaniiit apeqqusersorneqartoq tusaasinnaavara.
Kisianni qujassutigaara malugisinnaagakku tusaallugulu aamma amerlanerussuteqartut tapersersoraat taamatut allannguisariaqarneq pisariaqarluinnartoq. Taamaattumik aningaasat taakkua immikkoortinneqarsimasut atorluarneqarnissaat qularutissaanngilaq.
Aamma Naalakkersuisuninngaaniit inassutigisarput ukiumut tullissamut 12 millionit sinnilaarlugit utoqqalinersianut aaqqiissutaasinnaasutut aningaasat immikkoortitagut taamatullu aamma peqqinnissaqarfimmut aamma taamatut immikkoortinneqartut imannak kontonut immikkoortitinngikkaluarlugit aningaasartai unitsinneqartut taperserneqarmata assut qujagaara. Tassami Naalakkersuisuninngaaniit pingaartipparput uagut aamma tunngavissat immaqalu aamma inatsisitigut imaluunniit ileqqoreqqusa... (naavoq bånd nr. 7, Augusta Salling)
Bånd nr. 8 kingusinaarluni aallartissimavoq
...qarmata assut qujagaara. Tassami
naalakkersuisuninngaanniit pingaartipparput uagut aamma tunngavissat, immaqalu
aamma inatsisitigut imaluunniit ileqqoreqqusatigut
allanngortitsiallassinnaanerit misissuilluarnerit tunngavigalugit aatsaat
aaqqinneqartariaqartut.
Taamatumik aningaasartai
immikkoortinneqarput kisianni suliassat sulinerup ataatsimiititaliat
assigiinngitsut pilersinneqartut naalakkersuisuni, sulisut akornanni
misissueqqissaartussat suliaat peqqissaartumik suliarisimasaat tunngavigalugit
politikkikkut isummersornissarput tullinnguukkumaarpoq.
Uani Inuit Ataqatigiit aamma
apeqqutigisaat tikilaassagukku apeqqutigivaa, pilersaarut 2000-imi ukiakkut
ataatsimiinnermi inatsisartunut saqqummiunneqartoq pineqarnersoq uani
saqqummiussinitsinni.
Tassa oqaatigisariaqarpara
naalakkersuisut massakkut aaliangiusimavarput, inuiaqatigiit aaqqissugaanerat
eqqarsaatigalugu pilersaarummik 2000-imi pilersaarut suliarineqarsimasoq.
Taanna annerpaatigut ingerlaqqinnissaa
taanna siunertaraarput.
Aamma oqaatigisariaqarpara uani
aningaasanut inatsisissami naak Inuit Ataqatigiit taama isumaqanngikkaluartut,
kisianni inuiaqatigiinni ineriartortitsiniarnermi siunniussat taakkua
aallaavigalugit suliat suliarineqarput.
Aammalu erseqqissalaassallugu taanna
siunniussaq inatsisartunut oqallisigineqarneqanngikkaluartoq kisianni tamatta
tigunikuuarput. Aammalu imarisaat malunnarluarpoq politikkikkut
tapersersorneqartut.
Aningaasanik inatsisissat
politikkikkut aaliangiiffigigaangatsigit pingaartorujussuuvoq ukiuni
ikittuinnarnut atuuttussaanngitsumik suliaqarnissaq.
Inuiaqatigiit toqqissisimasumik
aningaasaqarnikkut ineriartortinneqassappata, taava pingaaruteqarpoq
politikkikkut aqutsisut taarsigaanerat annertunerusumik taarserneqarnerit
tamaasa, aqqut allanngorartuujunnaarlugu silittumik
isumaqatigiittoqartariaqartoq. Aningaasarsiornikkut ineriartorneq sumut
sammivilik ingerlanneqassanersoq.
Taannalu tunngavigalugu tassa
naalakkersuisooqatigiit aamma siunniunneqartut 2000-imi, nunatta
ineriartortinnissaanut tunngassuteqartut taakkua isumaqatigilluaratsigik. Aamma
allannguallatsinneqarfissaani allannguallatsinneqartassapput soorunami.
Pilersaarutit taamaattut ineriigaaneq ajorput.
Toqqammavissat isummersornissamut
suliarineqartarput.
Ulluinnarni politikkikkut
ingerlatsinitsinni immersussavagut.
Allanngortittariaqarfiinilu aamma
allanngortittassallugit.
Nunatsinni ineriartortitsinermi
inuussutissarsiutitigut ineriartorneq pingaartinneqaqisoq maani inimi aamma malugeqqipparput.
Aamma taamaannikuuvoq inatsisartuni siulitsinni.
Aamma ilinniartitaaneq
ineriartortinneqassasoq pingaaruteqartoq aningaasarsiornitsinnut aamma siulitta
aamma aaliangiusimasimasaat aamma massakkut maani inimi tusaasinnaagakku taanna
pingaartinneqarluartoq. Assut qujassutigaara. Taassami nunatta
aningaasarsiornikkut aamma ineriartornerani tamakku pingaaruteqarluinnarput.
Nammineq ilinniarsimanitsigut
ilinniarluarsimasut nunatsinni sulilluarnerisigut, taava aamma
pisariaqartitsinerput avataaninngaanniit annikilliartortinneqassaaq. Aammalu
suliffinnik pilersitsisinnaaneq uani eqqartorneqartoq kommunet suleqatigalugit
immikkut, nunatsinni immikkut assigiinngitsut aallaavigalugit ilaatigut
ineriartortitsisinnaaneq eqqartorneqarpoq.
Oqaatigissavara
naalakkersuisooqatigiilernitsinni isumaqatigiissutitta taanna
ilagilluinnarmagu. Taamaattumik ineriartortitsinermi taamatut politikkikkut
suliaqarnissaq aamma aallaaveqartussaasoq qularutigineqassanngimmat.
Kommunet peqataanerusinnaanerat
inuussutissarsiutinik aallartitsinissami, suliaq taanna ingerlavoq aamma
naammassineqarnissaa anguneqartussaavoq. Uani taamaallaat nakkutigineqartussaq
pingaartuuvoq, Namminersornerullutik Oqartussat namminersortunngorsaanerannut
taarsiullugu kommunet pisortatigut ingerlatsiartuaaginnarnissaat tassani
ikaarsaariarfigineqaannassanngimmat.
Pingaaruteqarpoq
ineriartortitsinermi aallarnisaasutut aallarnisarnermi ikiorsiinertut
isukkulimmik aaqqiisoqarnissaa. Tamannalu tunngavigalugu oqaloqatigiinnerit
ilusilersuinerillu ingerlanneqarput. Taamaattumik suliat aamma
kissaatigineqartutut soorunami naammassineqarpata inatsisartunut
saqqummiunneqartussaapput.
Tassa uani malugisinnaasakka
tunngavigalugit inatsisissatut saqqummiussarput amerlanerussuteqartunit
taperserluarneqartoq malugisinnaavara.
Soorunami
allannguallatsinneqartarnissaa naammassivinnissaata tungaanut
periarfissaasussaavoq. Taamaattuartarpoq.
Naalakkersuisut aningaasaqarnermullu
ataatsimiititaliap akornanni aaqqiallattariaqarsinnaasut assigiinngitsut suliarisussaavaat.
Uanilu partiit assigiinngitsut
saqqummiussaat aammalu Kattusseqatigiit saqqummiussaa soorunami aamma
alaatsinaanneqartussaapput. Kisianni illuatungaanut aamma
alaatsinaanneqartussaavoq, suut allanngorterinissat soorunami
piffissaqarfigineqartariaqarput misissuilluarfigissallugit.
Taamatut oqaaseqarlunga
naalakkersuisut sinnerlugit qujavunga. Siullermeerneqarnerani saqqummiussarput
taamatut partiininngaanniit tunngaviatigut aamma nunatta aningaasaqarnikkut
pitsaanerusumik inissikkiartuaarnissaanut, naalakkersuisut siunniussaat taanna
taperserluarneqartoq malugisinnaagakku.
Qujanaq.
Aqqaluk Lynge, ataatsimiinnermik aqutsisoq, Inatsisartut
siulittaasuata sinniisussat pingajuat, Inuit Ataqatigiit.
Taava partiit oqaaseqartuinut
uteqqippugut.
Oqaaseqarumalluni kissaateqarpoq
Josef Motzfeldt Inuit Ataqatigiit.
Josef Motzfeldt, Inuit Ataqatigiit oqaaseqartuat.
Tassa isumaqarpunga uani
oqallinnermi minnerunngitsumik Atassutikkut aamma Demokraatit oqariartuutaat
Inuit Ataqatigiit oqariartuutaannut naapertuulluartuusut.
Tassa Naalakkersuisut anguniagaanni
ilumut suut tamarmik ungasissoq isigalugu aaqqinniarneqassappata, tassani
partiinit taakkunannga taasannit pingasunit ujartorneqartoq tassaavoq,
akissaqarneq soorunami najoqqutarisariaqarparput.
Soorunami isertitassat
aningaasartuutissallu oqimaaqatigiisinneqartariaqarput.
Pisariaqartitsineq salliutillugu
aaqqiivigineqartariaqarput.
Naligiinnerulernissaq inuiaqatigiit
atukkamikkut naligiinnerulernissaat siunnerfigalugu ingerlatserusuttoqartoq Atassutip
Demokraatit Inuit Ataqatigiillu oqaatigaat.
Taamaammat uani partiimit partiini
aaliangersimasunik illuatungiliuttuunerinnarput pillugu pisuutitsiniarneq,
uagut taanna akisussaaffik uagut akisussaaffiginngilarput naalakkersuisut
siunnersuutaat. Naalakkersuisut massakkut naalakkersuisooqataasut taanna
akisussaaffigaat aamma ajunngilaq.
Akisussaaffigut tamatta immikkut
illersortariaqarpagut, kisianni uani naalakkersuisuni ilaasortap
akissuteqarnermini isarussat suut aaliangersimalluinnartut atorlugit
qalipaasersuiniarnera isumaqarpunga pissutissaqanngitsoq.
Siumup oqaaseqartuanut
apeqqutissagut marlussuinnaapput. Qularnanngilaq aningaasaqarnermut
ataatsimiititaliami tikinngitsuugassarinngisaat. Tassalu ilinniartut
angajoqqaaminnittut aamma kollegieniittut ilinniarnersiutaasa,
nalilersoqqinneqarnissaat sutigut nalilersoqqinneqassanersut
paasilluannginnatsigit isummerfigisinnaanngilarput.
Aamma ISU imaluunniit
inuussutissarsiutinut tapersiisarneq aamma nalilersoqquaat. Sutigut
nalilersorneqassanersoq aamma oqaatiginngimmassuk uani
oqaaseqarfigereersinnaanngilarput.
Taavalu Qorlortorsuarmut
tunngatillugu sutigut tamatigut orsussaq imerpalasoq atorlugu nukissiorneq
qimakkiartorneqassasoq inatsisartunut qularnanngilaq tamanna ilalerneqarpoq.
Taamaattoq inatsisartut
siusinnerusukkut nukissiuuteqarneq pillugu oqallittarnerini oqaatigineqartoq,
tassaavoq minnerunngitsumik Utoqqarmiut Kangerluarsunnguanni nukissiorfik
pilersinneqarmat.
Taamanikkut inatsisartunut
oqaatigineqartoq tassaavoq erngup nukinga imaluunniit olie atornagu
nukissiorneq tulleq annertuumik aningaasaliiffigineqassappat
pisortaninngaanniit. Tassani inuussutissarsiutitigut pilersaarutinik taanna
malitseqartariaqarpoq. Nukissiorfik taanna naammanngilaq
kiassaatigiinnassallugu. Ajornanngippat sarfaq akikitsoq innaallagiaq akikitsoq
pilersinneqarpat, taanna inuussutissarsiutitigut aamma siuarsaaneq
atorneqassasoq.
Inuit Ataqatigiit suli
aaliangiusimavarput nalunnginnatsigu inatsisartunut taanna taamanikkut
ujartorneqartoq.
Taamaattumik Qorlortorsuarmik
imaluunniit taqqavani allami Sisimiut eqqaani, aamma Ilulissat eqqaani
Paakitsukkunni nukissiorfiliornissanik pilersaarutinik suliaqartoqartillugu,
pinngitsoornani inuussutissarsiutitigut qanoq atorneqarsinnaanerat taakkua
nukissiorfiit pukutsutsinniitittuartariaqarpagut.
Atassumminngaanniit
nuannaarutigineqartoq Peqqinnissaqarfimmut 20 millionit annertunerusut, taavalu
utoqqalinersianut pensionisianut 20 millionit ukiormanna ukiup tulluaninngaat
20 millioninik qaffaanissaq aamma. Taavalu boligsikringimut kukkuluttornikkut
inatsisartut aaliangiisinneqarsimammata ukioq tullerminngaannit ukiumut 5,6
million koruuninik atuisariaqarneq.
Atuarfigissartariaqarneq kommunet
suleqatigiinnerulernissaat, naalagaaffiup nunatsinnut aningaasaliuttagaasa
appartikkiartuaarnerat, taavalu nutaanik isertitsiviusinnaasut aningaasat
isaatitsiviusinnaasut ujartuinera taanna minnerunngitsumik taakkua kingulliit
maluginiarpagut Inuit Ataqatigiinninngaanniit.
Aamma maluginiarparput Atassutip
oqaaseqartuata naalakkersuisut oqaaqqissaarinerat naggaataatigut inatsisartut
mianersussuusi, aningaasaliiniarussi aningaasanik allanik
sipaagaqartariaqarpusi.
Taanna isumaqarpunga Atassutip
oqaaseqartua isumaqatigigatsigu. Naalakkersuisunut aamma utertittariaqaripput. Naalakkersuisut
aamma aningaasalersuissagunik aningaasanik nutaanik allanik
sillimmatininngaanniit tigusiinnaratik, nutaanik aamma pilersitsiortornissaq
isumagisariaqarpaat.
Eqqaamassavarput Atassutikkut
naalakkersuisunngortitsinermi decemberip pingajuata kingorna,
naalakkersuisooqatigiilersunut inuussutissarsiutinut sunilluunniit
siuarsaanissanik imaqartitsisoqannginneranut uparuartuimmata.
Uagut isumalluarsimaqigatta nukiit
taamanna nipit taamaattut akisussaaffimmut tigusinermi ilanngullugu nutaatut
isummanik saqqummiivigisariaqartut.
Ullut 14-iunersut ukiarmiluunniit
siunnersuutaanersut tassani apeqqutaanngilaq.
Aningaasarsiornermut naalakkersuisup
oqarneratut ukiarmi siunnersuumminninngaanniit massakkut siunnersuutertik
allanngortingaarsimanngimmassuk.
Taavalu Kattusseqatigiinninngaannit
umiatsiaararsornermut umiatsiaararsorluni tunisassanik aalisarneq,
minnerunngitsumik aalisarneq taanna oqaluttuaannanngortussaavoq tunisassiat
avammut tunisassiarineqartussat eqqarsaatigalugit ukiuni qaninnerni.
Taamaammat Kattusseqatigiit
ujartugaat Inuit Ataqatigiinninngaanniit aamma peqataaffigisinnaasarput
tassaavoq, umiatsiaararsornerminngaanniit angallatinut anginerusunut kutterinut
ikaarsaarnissami qanoq aningaasalersueriarnissami isumalioqatigiissitaliaasarsimasut.
Tassa sinerissap qanittuani
aalisarnermi naleqqussaanermi isumalioqatigiissitaliaasarsimasut marluk
pingasuusut, qanoq inassuteqarumaarnissaat ukiup massakkut aappassaat
naalermat. Taanna pisariaqarpoq nukinnarpoq, ukiut taakkua ilaatigut minnerpaaffiliisarnissami
akinut minnerpaaffiliisarnissami isumaq qimakkiartuaarneqassasoq
oqaluuseriuannguarlugu.
Massakkut immikkut
utaqqiisagallartumilluunniit inatsisiliuinnassanngilagut. Taakku tamakku
tamaasa ilanngussorlugit.
Aningaasat amerliartunngeqaat,
ilaana annikilliartorujussuartussaassapput taamatut ingerlaannarutta
inuussutissarsiutigut siuarsaanernik naalakkersuisut isumaqanngippata.
Taamaalilluni illuatungiliuttuninngaaniit amerlanerussuteqarniarneq
inuussutissarsiutigut siuarsaanermik soorunami pisussaaffittut aamma
tigussavarput.
Taavalu Kattusseqatigiinnut aamma
oqaatigerusutarput isumaqatigalugu tassaavoq, sanaartornermi oqartussaanerup
qeqqaninngaanniit piunnaarlugu kommunenut agguaanneqarnissaanik isuma, Inuit
Ataqatigiit aamma ukiut kingulliit ingerlanerani taanna
saqqumilaartissimasarput.
Isumaqarpugut qeqqaninngaanniit
aqutsinermi inuluuginnilluni oqaluutigaluni taamatut suli kukimmillugillusooq
sanaartugassat suut, immaqa nunap immikkoortuinut ataatsimoortumik
ussarsaarutaasinnaasut kommunet kattunniarneranut, annertuumik avammut
siammarniarnera taanna aamma naalakkersuisut ingerlariaqqinnissaminnut
tappiffigissagaat neriuutigaarput.
Demokraatinut Demokraatit
oqaaseqartuannut Per Skaaningimut, kommunenut aningaasaliuttakkat annertusiartornissaat
aamma taanna naalakkersuisuninngaanniit oqaatigineqartoq, Demokraatit
oqaaseqartuata nuannarivallaanngikkaa iluarivallaanngikkaa tusaasinnaavarput.
Apeqqutaavoq kommunenut
aningaasaliissutit oqartussaaffimmik nassataqarpata. Oqartussaaffik
qeqqaninngaanniit oqartussaaffigineqarsimasoq kommunenut tunniunneqarpat
soorunami aningaasartai ilanngullugit aamma tunniunneqartariaqarput.
Ajoraluartumilli ukioq kingulleq
naalakkersuisuusut kommunenut oqartussaaffimmik isumaginninnermi tunngasunik tunniusseriaraluarnerat,
naalakkersuisuninngaanniit pikkorliorfigineqarujussuarneratigut
pisariaqanngitsumik 18 millionit tikillugit inatsisartut
aningaasaleeqqittariaqarsimapput.
Isumaginninnermi
Pisortaqarfimminngaanniit naalakkersuisoqarfimminngaanniit kommunenut
tunniussigaluarnerit piumasaqaatitalinngiivillugit, najoqqutassanik
allanilluunniit ilanngiivillugit tunniussorneqarsimammata.
Taamaammat tamakkunatigut aamma
naalakkersuisut ilumut akisussaaffinnik oqartussaaffinnillu siammaaniassagutta,
tamakkunatigut naalakkersuisut mianersorfissaqaqimmata taanna
eqqaasitsissutigiinnassavarput.
Ilumulli naalakkersuisut massakkut
naalakkersuisooqatigiittut ukiarmili naalakkersuisooqatigiissimasut marlunnik
siunnersuuteqarnermi, massakkut 2003-mi aningaasarsiornerup suli
ukiarmerninngaaniit ajornerulersumik oqaatigeriinnguarlugu. 50 million
sinnerlugit aningaasartuutinik amerlanerusunik, ingerlatsinermi
aningaasartuutinik amerlanerusunik aningaasanik piginngisatsinnik,
qaffaasimanngitsuuppata uanga taanna nersualaarsinnaasimassagaluarparput.
Kisianni ullut 14-it
piffissaqarsimapput aningaasartuutit ingerlatsinermut aningaasartuutit,
taamannarujussuaq qaffatsinnissaa.
Aningaasat oqimaaqatigiinnissaanik isertitat
aningaasartuutillu oqimaaqatigiinnissaanik inatsiseqarpugut. Inatsisartut
inatsiseqarput.
Taavalu una akileraartarnermut
tunngasoq taanna pappialaq piareereersimassasoq naatsorsuutigivarput. Aammalu
Siumukkut Atassutikkullu qineqqusaarnerminni akileraarutaasussatut isertitat
ilanngaatissaattut pingaartitsinertik pingaartissimaqigunikku.
Aqaguagunnguaq 2004-mut
akileraarutinik ilanngaataasussaq aaliangersorneqartussaapput inimi maani.
Aamma 4-mut tunngasoq aamma 5-imut tunngasoq aamma 6-imut tunngasut. Taakkua
arlaannaallunniit nikeriartussaanngitsutut oqaatigineqarnerat taanna uagut
ajuusaarutigiinnarparput.
Taavalu utoqqalinersiatut
pisartakkat sulluginninnerput imaluunniit pissusissamisoortunngitsutut
isiginninnerput, Aningaasarsiornermut Naalakkersuisup oqarneratulli
misissuilluarnermik toqqammaveqarsimappata, Inuit Ataqatigiit isumaqanngilagut
atorfeqarsimallutik soraarnerussutisiallit aappaat tassaasut utoqqarnit
ullumikkut nunatsinniittunit pisariaqartitsinerpaat.
Misissuisoqarsimasuuppat
taakkuusimassagaluarnerput pisariaqartitsinertut oqaatigisariaqartut.
Tamanna uagut qularivarput.
Aqqaluk Lynge, ataatsimiinnermik aqutsisoq, Inatsisartut
siulittaasuata sinniisussat pingajuat, Inuit Ataqatigiit.
Tulliulluni oqaaseqarumavoq
Attaveqatigiinnermut Avatangiisinut Ineqarnermullu Naalakkersuisoq.
Takanna.
Mikael Petersen, Attaveqatigiinnermut Avatangiisinut
Ineqarnermullu Naalakkersuisoq, Siumut.
Siullermik partiit
Kattusseqatigiillu angallannermut aamma sanaartornermut tunngatillugu oqaaserisaat
assigiinngitsut nuannaarutigaakka.
Soorunami suliassat nutaamik
aallarteqqinneqarnissaat eqqarsaatigalugu aammalu naalakkersuisut taakkua
iluini, angallannerup sanaartornerullu iluini nutaamik aaqqissuusseqqinnissamik
siunertaqarnerat eqqarsaatigalugu, oqariartuutit partiininngaanniit aammalu
Kattusseqatigiinninngaanniit saqqummiussuunneqartut atorluassavagut.
Soorunami aaqqissuusseqqinnerit
imaalitsiaannaq naammassisinnaanngillat. Kisianni inatsisartuni oqallinnerit
annertuut taakku pillugit ukioq manna, aammalu ukiamut inatsisartut
ataatsimiinnissaanni, aammalu upernaaq maanna soorunami ataatsimiinnissaanni
taakkununnga attuisut ingerlanneqartarumaarput.
Taamaattumik naalakkersuisutut tassunga
tunngatillugu oqallinnerit pissangagaakka. Aaqqissuusseqqinnerit
ilusilersorneqarnissaat suliassaq aamma imaannaanngimmat.
Siumup oqaaseqartuata oqaaserisai
angallannermut tunngatillugu nuannaarutigaakka. Tassa nutaamik angallannerup
aaqqissuuteqqinneqarnissaanut tunngatillugu, eqqarsaatit inatsisartuni aamma
maani siusinnerusukkut saqqummiunneqartareersimasut. Aammalu
naalakkersuisooqatigiilersut Siumup Atassutillu isumaqatigiissutaanni
siunertat, inuiaqatigiit ineriartornerannut attuumassuteqartut tamarmik aamma
angallannermut attuisuummata.
Taamaattumik ilusilersuinissami
suliassaq taanna Siumup tungaaninngaanniit oqaatigineqartoq nuannaarutigaara.
Aamma Siumup oqaaseqartuata
ineqarneq pillugu aammalu sanaartornermut tunngatillugu, oqariartuutigisaa
ersarissut ilaatigut aamma Siumup Atassutillu naalakkersuisooqatigiinniani
isumaqatigiissutaani attuumassuteqarluinnartut. Tassa sanaartornerup
tungaatigut pilersaarusiortarnissat ukiunut tallimanut
ingerlaavartunngortinnissaa. Aammalu soorunami tassunga attuumassuteqarpoq
aamma iluarsaassisarnermi pilersaarusiortarneq, aamma tassunga ilaatillugu
naalakkersuisuni suliassaammat oqaatigissavara.
Allat annertunerusumik Siumup
oqaaseqartuaninngaanniit saqqummiunneqartut isumaqatiginarluinnarmata annertunerusumik
oqaaseqarfiginagit.
Inuit Ataqatigiit oqaaseqartuata
ilaatigut toqqaannartumik angallannermut tunngatillugu oqaaserisai aammalu
sanaartornermut tunngatillugu oqaaserineqartut, taakkua
oqaaseqarfigilaassavakka.
Minnerunngitsumillu aamma suliffeqarfissuarni
ingerlatseqatigiiffissuarni angallannikkut pilersuinikkullu tapiissutaasartut
pillugit aamma oqaatigineqartoq oqaaseqarfigilaassallugit.
Kiisalu aamma bolistøttemut
tunngassuteqartoq ersarissoq oqariartuutigineqartoq aamma oqaaseqarfigilaassavara.
Tassa siullermik angallannermut
tunngatillugu soorunami avaqqussinnaanngilluinnarparput angallannikkut
nunatsinni ilusaasup ullumikkut allanngortinneqarnissaa, immaqalu
angallassinermi angallassissutit timmisartut umiarsuillu atorneqartut aamma nalilersorfigineqarnissaat
pisariaqartussaavoq.
Tamatta eqqaamassavarput angallanneq
pillugu nassuiaat, inatsisartut kingulliit atuuttut siorna atorunnaartut,
ukiakkut ataatsimiinnermi tassa angallanneq pillugu nassuiaat tikilivillugulu
ataatsimiinneq unitsinneqarpoq. Qinersisoqartussanngorlunilu.
Ajuusaarnaraluartumillu taanna
nassuiaat oqallisiginngitsoorparput.
Taamaattumik tassani nalilersugassat
assigiinngitsut naalakkersuisut nutaani pinngitsoorsinnaannginnatsigit, ukiamut
angallanneq pillugu nassuiaat neriulluinnarpunga aamma siunnerfeqarluartoq.
Aamma susassaqartut kommunellu peqataatillugit ilusilersuinermi
ilusilerneqartussaq taanna pilersissinnaajumaaripput.
Aammalu tassani ukiamut angallanneq
pillugu nassuiaatip oqallisigineqarnerani inatsisartut ersarissumik
siunnerfeqarsinnaajumaartugut. Silaannakkut imaatigullu angallannikkut
aaqqissuussinissarput pillugu.
Soorunami massakkut tamakkiisumik
itisilersinnaanngilakka suut naalakkersuisooqatigiit massakkut siunniunneraat. Taanna
piffissaq tikikkumaarparput. Tassami Inuit Ataqatigiit oqaaseqartuata
kissaatigigaluarmagu itisiliissasunga taakku pillugit.
Tamanna utaqqilaarallartariaqassaaq.
Tassa erseqqissaatigiinnassavara angallannikkut nassuiaatissaq inatsisartunut
saqqummiunneqartussaq pillugu, suliap ingerlanneqarnerani angallassinermik
ingerlatsisut kommunet aammalu susassaqartut peqataatillugit suliassap
naammassiniarnissaa eqqarsaatigigatsigu.
Aamma soorunami inatsisartut
angallannermut ataatsimiititaliaat tassani aamma avaqqunneqassanngilaq.
Sanaartorneq eqqarsaatigalugu
ilumoorpoq Inuit Ataqatigiit oqaaseqartuat siusinnerusukkut inatsisartut aamma
aningaasaliisareermata, Namminersornerullutik Oqartussat Sanaartornermut
pisortaqarfiata pitsanngorsarneqarnissaanut.
Aamma tassunga tunngatillugu
oqaatigissavara soorunami pilersaarutaammat sanaartorneq pillugu, imaluunniit
sanaartornermut aningaasaateqarfik pillugu inatsisartunut nassuiaat
saqqummiunneqarpat, upernaaq manna ataatsimiinnermi taanna ilanngullugu aamma
saqqummiiumaaratta.
Inuit Ataqatigiit oqaaseqartuata
ilanngullugu uparuarpaa ilaatigut timmisartunut mittarfiit Ilulissani Nuummilu
tallilerneqarnissaat pillugu misissueqqissaarnissamut aningaasaliissutit.
Aammalu konto taanna tassa 800080-i aningaasanut inatsisissani siunnersuummi
tassa sanaartugassanut misissueqqissaarnermut, siunnersuusiorfittarfittut
atorneqartoq.
Kiisalu aamma 900080-i tassa
iluarsaassinissat pillugit pilersaarusiortarnermut konto atorneqartoq, taakkua
2002-mi kontot nutaamik pilersinneqarput.
Taanna taamanikkut finansudvalgimi
aamma ilaasortaasut nalunngilluarpaat. Tassalu 2001-imi naalakkersuisuusut
Siumukkut Inuit Ataqatigiillu, taakku kontot pilersitaraat.
Sanaartornikkut
pilersaarusiorluartarnissaq aammalu sanaartugassat tamakkiisumik
aningaasaliiffiginnginneranni, misissueqqissaarnerit ingerlanneqartarnissaat
kissaatigineqarmat inatsisartuniit. Aammalu budgetlovi eqqortinniarlugu taakkua
pilersinneqarsimapput.
Aammalu erseqqissaatigissavara
Ilulissani Nuummilu mittarfiit tallilerneqarsinnaaneri pillugit oqallinneq
aatsaat pinngimmat. Inatsisartuni qangali taanna ingerlalerpoq
arajutsisimaneqanngilluinnarpoq aamma massakkut inatsisartuni ilaasortaasuni
nutaanit.
Kisianni tassa aamma Siumukku Inuit
Ataqatigiillu ukiarmi naalakkersuisuutsiaratta qaammat missiliorlugu,
aningaasanut inatsisissaq suliarigatsigu, siunnersuutigaagut taakkua.
Josefilu Motzfeldti
Aningaasaqarnermut Naalakkersuisuuvoq. Tassa siunnersuut taanna
saqqummiunneqanngitsoortoq tassani ilaatinneqarpoq,Siumup Atassutillu taakkua
pilersaarutit tassunga tunngasut allanngortinngilagut. Taanna
erseqqissaatigissavara.
Tassa apeqquteqartup taakku pillugit
aamma nammineerluni peqataaffigai.
Kisianni soorunami taanna konto
tassaavoq siunnersutinik imalik. Naalakkersuisut saqqummiuppaat siunnersuutit
uku ukulu sanaartorneqarsinnaasut taakkua pilersaarusiorneqarnissaat
misissueqqissaarnissat tunngavigalugit siunnersuutigaagut. Inatsisartut
pisussaaffigaat aaliangissallugu ilumut taamaattoqassanersoq.
Inatsisartut amerlanerussuteqarunik
peersinnaavaat. Taamaalluinnaqqissaarpoq. Tamanna nalunngilarput.
Taamaattumik pituttoriinngillat.
Inatsisartuni amerlanerussuteqartut kissaatigippassuk Ilulissani Nuummilu
mittarfiit tallilerneqarnissaat unitsinneqassasoq imaluunniit
misissoqqissaarneqassanngitsoq. Taava soorunami naalakkersuisut taanna
naalassavaat.
Kisianni tassa siunnersuutaavoq una
inatsisissatut siunnersuut, tamannalu aningaasaqarnermut ataatsimiititaliami
nalilersoqqissaarneqartussaavoq. Aamma uanga piareersimavunga taakkua pillugit
aningaasaqarnermut ataatsimiititaliap suliami taassuminnga ingerlatsinermini,
aamma aggersassappanga oqaloqataanissannut piareersimavunga.
Ingerlatseqatigiiffiit assigiinngitsut
tapiiffigineqartarnerat pillugu, ilumoorluinnarpoq Inuit Ataqatigiit
oqaaseqartuata oqaaserisai. Tassa ingerlatseqatigiiffiit assigiinngitsut
angallassinermik ingerlataqartut ullumikkut aningaasarparujorujussuarnik
landskasseminngaanniit tapiiffigineqartarput.
Serviceaftalet kiffartuussinissamut
isumaqatigiissutit aallaavigalugit. Erseqqissaatigissavaralu 2002-mi allaat
Artic Umiaq Line aammalu Air Greenlandi allallu Air Alfakkut allallu
namminersortut angallassinermi ingerlataqartut 190 millionit angullugit
isumaqatigiissuteqarfigineqarsimammata.
Tassa uani Inuit Ataqatigiit
oqaatigisaaniit annertunerusut.
Tassa taamaappoq pissutsit
naliliiffigeqqissaarneqarnissaat pisariaqarmat, taamaattumik
naalakkersuisooqatigiit nutaat Siumut Atassullu isumaqatigissumminnut
ilaatippaat ingerlatseqatigiiffiit assigiinngitsut
nalilersuiffigeqqissaarnissaat. Ilaatigut soqutigisat ataasiakkaat
assigiinngitsuni ingerlatseqatigiiffinni ingerlanneqarmata qaleriiaartumik.
Aamma inuiaqatigiinnut
akisoorujorujussuarmik.
Aamma taamaappoq pilersuinermi soorlu
Inuit Ataqatigiit oqaaseqartuata eqqorluinnartumik oqaatigigai, KNI
Pilersuisumut 58 millioninik tapiissuteqartoqartartoq. Taavalu Royal Arctic
Linemut aamma nunaqarfinnut pilersuinermut 58 millioninik
tapiissuteqartoqartartoq. Taamaalilluni 116 millionit angoreerpagut.
Tassa tamakkua kiffartuussinermi
ingerlatsisut nalileqqissaartariaqarput. Qaleriiaartumik pilersuinikkut
angallassinikkullu sullissinerit pinaveersimatinniarlugit. Taamaalillutalu
taama annertutigisorsuarnik landskasseminngaanniit millionekkaarsuarnik
tapiissuteqartarnerput aamma annikillisarneqarsinnaammat.
Tassuunga ataatsimilluunniit
assortuussutissaqanngilagut Inuit Ataqatigiit uagullu naalakkersuisut uanga
isumaga naapertorlugu. Suleqatigiissaagut tassuunakkut eqaallisaanerit
kiffartuussineq ajornerulersinngikkaluarlugu, kisiannili inuiaqatigiit aamma
kiffartuunneqarnerminni pitsaassuseq annertussuserlu, eqqarsaatigalugit aamma
killiliiffigineqarnissaat taanna avaqqussinnaanngilarput.
Killeqanngitsumik suna tamaat
kiffartuussinnaanngilarput, nalunngilarput taanna. Taamaattumik aamma
pitsaassuseq aammalu annertussuseq inatsisartuni maani
killilerneqartariaqarpoq. Tamannalu pillugu aamma soorunami angallanneq pillugu
nassuiaat eqqartorneqalerpat qularnanngilaq
aamma siunnerfeqarsinnaajumaarpugut.
Taava kingulliullugu Inuit Ataqatigiit
oqaaseqartuata ilanngullugu taasaa, tassa BSU boligstøttemik illuliortarneq
eqqarsaatigalugu aammalu taassuma ullumikkut aaqqissugaanera, aamma uparuarpaa.
Ilumoorpoq. BSU ullumikkut taamatut aaqqissuusisimaneq
BSU-mik allanut illulioriaatsinut sanilliullugu kinguaattuulersimavoq. Allaat
akisunerpaanngorsimasutut taaneqarsinnaalersimalluni.
Taamaaattumik qanga pitsassuartut
isigisarigaluarput pissutsit nutaanngoriartorneranni sanaartornerullu nutaanngoriartorneranni,
aaqqissuussinerit nutaat atuutilerneranni kinguaattoorsimavoq.
Allaat BSU-mi illorpassuit inoqanngitsut
sinerissami napaannalersimallutik. Tamanna naalakkersuisuni
arajutsisimanngilarput. Taamaattumik BSU pillugu aamma piaartumik neriupunga
aaqqissuusseqqinneq taanna naammassineqarsinnaajumaassaaq.
Aamma tassani
assortuussutissaqarunanngilagut. Kisianni suleqatigiilluarfigigutsigu taanna
isumaqarpunga piaartumik aamma angusaqarfigisinnaassagipput maani
inatsisartuni.
Allanik annertunerusunik
oqaasissaqanngilanga. Kisiannili naggataarutigalugu Kattusseqatigiit
sinnerlugit Anthon Frederiksenip taatsiagaa tassa, ujaasinermut
annaassiniartarnermullu upalungaarsimanermut tunngatillugu Air Greenlandip
timmisartuisa helikopteriutaata tassa S-61-ip Ilulissaniikkunnaarnera.
Ilumoorluinnarpoq taanna
takornariaqarnikkut Ilulissanut aaqqissuussinernut annertuumik
sunniuteqartussaammat.
Aamma tamanna pillugu Greenland tourismi
ataatsimeeqatigereerpara. Ilaatigut aamma Ilulissat Ilulissani takornariaqarnermi
ingerlatsisut assigiinngitsut tamanna kissaatigimmassuk.
Annertoorujussuarmik Ilulissat
kangerluannut takornariartitsineq sermimut takornariartitsisarneq
aningaasarsiornikkut sunniuteqarsimavoq. Aamma aasamut pilersaarutaasoq tassani
annertuut aasaanerani sualummik annertuut kiputtoortussaassapput tassani
aaqqiisoqanngippat.
Taamaattumik naalakkersuisuni uagut
pisortaqarfitsinni eqqumaffigaarput Greenland tourismi suleqatigalugu, qanoq
iliuusaasinnaasut massakkut misissortippagut. Taakkualu misissuinerit
naammassippata oqaatigissavara naalakkersuisunut inassuteqarnissara
naatsorsuutigigakku.
Tassa aasaanerani takornariaqarnikkut
aaqqissuussinerup tappassuma akunnatsuunngitsumik ingerlanneqarnissaa
qulakkeertariaqassavarput. Tassalu S-61 tassani apeqqutaalluinnarluni.
Tassunga tunngatillugu
erseqqissaatigilaassavara tassa upalungaarsimanissamut tunngatillugu
timmisartut pingasut sillimatinneqarsimagaluarmata Narsarsuami Nuummi
Ilulissanilu.
Taavalu Air Greenlandimut
upalungaarsimanissaq pillugu Namminersornerullutik Oqartussat
isumaqatigiissutaat taanna soorunami atuuppoq. Kisianni Air Greenlandip S-61
ataaseq atorunnaarsippaa marluinnaallu timmisartuutigilerlugit. Taamaalilluni
Narsarsuarmi Nuummilu taamaallaat taakkua timmisartut inissisimalerlutik.
Tassunga tunngatillugu soorunami
naalagaaffimmut aamma isumaqatigiissuterput tassani aamma eqqaamassavarput.
Tassanilu naalakkersuisut soorunami nalilersuinissaminni upalungaarsimaneq
pillugu isumaqatigiissut aallaaviusussaammat avaqqussinnaanngilarput.
Atagu takulaariartigu qanoq Ilulissanut
tunngatillugu taamatut S-61-imi aasaanerani aaqqigallarsinnaaneq
angusaqarfiusinnaanersoq.
Kisianni tassa Nuumminngaanniit avannamut
Uummannaq angullugu taamatut upalungaarsimanermi helikopteri ataaseq
sillimasuulerpoq. Taanna erseqqissaatigissavara. Tamannalu imaannaanngilaq
isorartoorsuummat nunarput.
Qujanaq.
Jonathan Motzfeldt, ataatsimiinnermik aqutsisoq, Inatsisartut
Siulittaasuat, Siumut.
Oqaaseqartussaq tulleq Ole Thorleifsen
aappaassaaneerami minutsit 15 piffissarivai.
Ole Thorleifsen, Siumut.
2003-mi inatsisartut inatsisissaattut
oqaaseqarneranni naalakkersuisunut qujavunga.
Taamaalilluni Siumut saqqummiussaani
tapersiinerat aamma akuerinninnerat qutsatigaarput.
Aningaasanut inatsisissamut politikkikkut
siunnerfiit erseqqissaatigissallugu pingaarluinnartuusarpoq. Taavalu aamma
malunnarpoq partiit Kattusseqatigiillu assigiinngitsut tamarmik politikkikkut
siunnerfii tamaasa isumaqatigigai.
Tassami inuussutissarsiornermi
politikkikkut maanna siunniunneqartoq tamanit akuerineqarpoq. Tassami
namminersortunngorsaaneq saneqqunneqarsinnaanngilluinnarpoq.
Taanna anguneqarsinnaavoq
aallarnisaanikkut assigiinngitsutigut taavalu aamma annertunerusumik suli
namminersortunngorsaanermi politikkikkut sinaakkusersuinikkut.
Taamaalilluta Namminersornerullutik
Oqartussani aningaasartuutinik annikillisaasinnaassaagut. Tassami maani
oqaatigineqaqattaarpoq tapiissuterpassuit Nuka A/S-imut 58 millionit taava
assigiingitsut Pilersuisumut angallannermut aamma taama tapiissuterpassuit.
Tamakku aningaasat pituttorunnaarlugit
allanut atorsinnaalernissaat anguniarniartigu. Taamaalilluta pitsaanerusumik
aningaasanik ingerlatsineq ingerlavigisinnaassavarput.
Aningaasartuutikillisaaneq
eqqarsaatigigaanni aamma isiginngitsuusaaginnarsinnaanngilarput
Peqqinnissaqarfimmut tunngatillugu, napparsimasunut angallassinermi 100
millionit atorneqartartut.
Taakkua arlaatigut annikillisarnissaat
aamma aqqutsiulaartariaqarput.
Tamatta partiit Kattusseqatigiillu
isumaqatigiissutigaarput allaffissornerup annertuumik
aaqqiiviginiarneqarnissaa.
Malunnarporlu Siumuminngaaniit
oqaatiginiarneqartut aamma naalakkersuisunit taperserneqartut tassaasut,
nunanut immikkoortunut akisussaaffiit agguataarnissaat. Taannalu
suliniutigissavarput annertunerusumik.
Inuit Ataqatigiit
oqaaseqartartuaninnngaanniik apeqqutit marluk apeqqutigineqarput. Tassaavoq
ilinniartut kollegieni najugallit aningaasarsiaanut tunngatillugu.
Tassunga oqaatigissavara maanna suliaq
ingerlavoq inatsisartullu aappassaaneerniarpaat ataatsimiinerup ingerlanerani.
Taanna utaqqimaartariaqarparput. Arlaanni
oqallinnermi peqataajumaarpugut aamma tassunga tunngatillugu.
Taavalu Qorlortorsuarmi nukissiorfimmut siunniuteqarnitsinni peqqutaavoq Motzfeldtip tasianut aningaasartuutissat milliardiugamik. Kisiannili Qorlortorsuarmi aningaasartuutissat 220 millioniullutik.
Kisianni soorunami kisitsisinik allanik saqqummiussaqarsinnaappat soorunami aamma nalilersueqqissaagut.
Kisianni saqqunneqarsinnaanngilaq aamma nikissiutit allat soorlu aamma aningaasaqarnermut ataatsimiititaliami eqqartorneqartut, aamma misissuiffigineqarnissaat uagut tapersersoratsigu.
Eqqarsaatigigaanni aningaasaliissutit nunatsinni kommunenut qanoq annertutigisut nalunaarsorneqartuartarput. Oqaatigineqartuartarlunilu nunaqarfinni isorliunerusunilu aningaasaliissutit taamaapput taama millionikkaajupput, kisiannili maannamut saqqummiunneqanngisaannarpoq inuussutissarsiuutit namminersortut qanoq nunatsinni iluaqutaatigineri.
Taamaammat tamakku misissuiffigineqartariaqarput nalilersorlugillu taamalillutalu aamma pilersuineq, piorsaaneq, nunani taamaattuni aningaasarsiorfiusuni nunatsinnilu iluaqutaasuni pilersuineq nalilersuivigisariaqarpoq.
Oqaatigaarput aamma tunisassiorfiit namminersortut maanna matoqqasut, namminersortunik allanik tiguneqarsinnaanissaat ingerlanneqarsinnaanissaalu aqqutigineqartariaqartut.
Ukiorpassuarni utaqqipput 99-ikkunnili. Taamaattumik tamakkua aqqutigineqarnissaat uagut Siumumiit aamma tapersersussavarput.
Qujanaq.
Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.
Tulliulluni oqaaseqassaaq Jakob Sivertsen, aappassaaneerami 15 minutsit piffissaqarpoq.
Jakob Sivertsen, Atassutip oqaaseqartua.
Qujanaq.
Naatsunnguamik. Tassaana Inuit Ataqatigiikkut oqaaserisatsinnut tapersiinerat qujassutigaarput.
Taavalu aamma Inuit Ataqatigiikkormiut Grønlands Turisme pissarsissutaasarneranut tunngasumik oqaaserisai tapersilaaginnarniarlugit.
Pingaartumik ukioq manna takornariaqarnikkut ajoraluartumik nunarput iluatsinngilaq.
Iluatsittoq oqaatigineqarsinnaasoq tassaavoq Tunu, taannalu Grønlands turismeminngaanniit 1 øremilluunniit aningaasaliiffigineqarneq ajorpoq.
Taamaattumik ilaatigut Inuit Ataqatigiikkormiut apeqqusiinerat ilumut ukiut tamaasa 20 millionit koruunit, qanoq annertutigisumik nunatsinnut pissarsissutaasarnerat nalilersoqqissaarneqaqqittariaqarpoq.
Assersuutigalugu aamma Islandimi ukioq
2000 Island Air 300 millionit sinnerlugit sinneqartooruteqarpoq.
Tassani malugineqassaaq avataaniit
nunaminnut qammaanermikkut annertunerpaatimmassuk. Taamaattumik siunissami
nunarput ussassaarutigissagutsigu ilaatigut aamma eqqaaneqartoq, nunatsinni
billetsit akiisa nalilersoqqissaarneqarnissaat pisariaqarpoq.
Soorlu ukioq manna 2003-imi inatsisissami
imaatigut ilaasunik angallassineq, silaannakkullu ilaalluni angallatsineq
katillugu 173 millioninik tapiiffigaarput. Illuatungaatigulli billetsit
akitsoraluttuinnarput.
Taamaattumik allaat uanga isumaqarpunga
ataatsimiititaliuullugit attuumassuteqanngitsunik
misissuiffigineqartariaqarput.
Aqajaroq ulikkaarsinnaanngitsoq sumik
ajoquteqarnersoq paasinissaa soqutiginarmat.
Taavalu aamma silaannakkut angallatsinermi
Air Greenlandip saniatigut Air Alfa avalliunerusuni, Tasiilami Illoqqortoormiit
Diskobugtimilu sullissinissamik Namminersornerullutik Oqartussanik
isumaqatigiissuteqarpoq.
Isumaqatigiissut taanna maannamut
atuunnerani paasinarsivoq Grønlandsflyp sullissineranik pitsaanerunngitsoq.
Taamaattumik Angallannermut Naalakkersuisup oqaaserisaa ukiamut
saqqummiinissaanut pissangalluta aamma nalilersuinissatsinnut peqataassaagut.
Isumaqarpugut nunatsinni inuit taama
ikitsigitillugit silaannakkut angallassinissamik isumaqatigiissutit
immikkoortillugit suleqatigiissinnaanngilluinnartullu, taakkua aamma
nalilersoqqissaarneqarnissaat periarfissaagallartillugu pisariaqartoq.
Taava naggataatigut Siumup oqaaseqartuata
neqit qimminut nerukkaatissanngorlugit misissuiffigineqarnissaanut tunngasumik
oqaaserisai assut tapersernarput.
Ukioq mannamiit piniartoqarfinni Tasiilaq
eqqaani aamma Upernavimmi puisit amiiginnariarlugit, amii qassallugit
tunineqartalerput.
Tamatumalu kinguneranit puiserpassuit
iluatsillugit pisarineqartartut amerlerujussuarnissaat ukiuni qaninnerpaani
naatsorsuutigineqartariaqarpoq.
Taamaattumik amiinnaat
eqqarsaatigineqarsinnaanngillat. Aamma neqaat orsuilu qanoq ilillugit
iluaqutigineqarsinnaanersut piniartunut aamma maannangaaq
misissoqqissaarneqartariaqarput.
Soorlu Siumup ilaatigut oqaaseqartua
ilumoorpoq siornaak Norgeminngaaniit puisit neqaannik
pisiniartoqaraluarnikuuvoq. Qimminut nerukkaatissanik.
Ullumikkut nunatta avataani tonserparparparujussuit
piniartoqarfinnut takkuttarput taamannak akillit. Uffalu uagut saniatigut
inuutissarsiutitsinnik pingaarnersamik oqaatigisartakkagut
tapiissutaannannguanik uumatinniarsaralugit.
Tamakku isumaqarpugut aamma Atassummiit
nalilersoqqissaarneqartuartariaqartut.
Aammalu naggataatigut saqqummiunneqartoq
ataatsimiititaliami peqataaffigissavarput. Aammalu sapinngisatsinnik
inatsisartuni tamani akuersaarneqarsinnaasumik katersuuffeqarsinnaanissaq
pimoorullugu, anguniarneqarnissaanut peqataassagatta matumuuna oqaatigaara.
Qujanaq.
Jonathan Motzfeldt, ataatsimiinnermik aqutsisoq, Inatsisartut
Siulittaasuat, Siumut.
Apeqqutigissavara allamik
oqaasissaqartoqarnersoq?
Maani Demokraatininngaaniit Per Berthelsen.
Takassa.
Per Berthelsen, Demokraatit oqaaseqartuat.
Qujanaq.
Naatsuarannguamik ukua oqaatigilaaginnassavakka, tassa Aningaasaqarnermut Naalakkersuisoq saqqummiussimmat assorujussuaq ernumaammerama oqaatigineqarmat, naalakkersuisut 2002-mi aningaasartuutaasut, nalingatupajaaq tunngaveqartumik aningaasartuuteqarnissaq anguniarneqartariaqartoq.
Saniatigullu taaneqarluni isertitat 200
millionit pallillugit ikinnerunissaat.
Taamaattumik oqaatigiinnassavara
ernumassutigigakku taava avissaanganeq isertitat aningaasartuutillu
avissaanganerat taanna ernumanartumik ingerlalissasoq. Taamaattumillu uani
qanoq oqassaanga toqqississutaalaarsinnaasumik oqarfigineqarsinnaaguma,
nuannaarutigissagakku ujartuilaarpunga.
Iluatsillugulu taalaaginnassavara tassa
assorujussuaq Inuit Ataqatigiinninngaanniit siulittaasup Josef Motzfeldtip
oqaatisai nuannarigakkit. Tassa oqariartuut taanna massakkut asuli
aningaasartuutinik, tunuarsimaarluni oqaatsillu kusanartut atorlugit nunatsinni
aningaasanik nalilimmik ingerlatsinerup oqalunneq unittariaqalermat.
Maanna pisariaqartinneqarluinnalermat
ilumut timitaliilluni suliniuteqarnissaq. Ilumut oqaatigisat tamakkua
eqqortumik malinneqarsinnaanissaat anguniarlugu.
Assorujorujussuaq taanna isumaqatigaara.
Tassami qineqqusaarneq naammassisariaqalerpoq. Maanna pissutsit piviusut pulaffigaagut.
Taakkualu iluini nunatsinnut ernumanaannerpaasumik toqqissisimanarnerpaasumik
ingerlatsinissaq anguniartussaassavarput.
AammaJosef Motzfeldtip
Qorlortorsuarmut atatillugu kujataamiuugaluarluni nuna tamakkerlugu
politikkeriunermini takutitsinera nuannaarutigaara.
Uangattaaq isumaqarama
isumaqarpungalu Demokraatini taanna immikkut qaqinnikuunngikkaluarlugu
isumaqatigiissutigigipput, tassalu sumik nunatsinnut annertuumik
aningaasartuutaasussat pilersissagutsigit, taava taakkua qanoq inuiaqatigiinnut
utertitsisinnaassuseqarnerat aallaavigisariaqaratsigu.
Uanga Qorlortorsuaq pineqalermat
oqarpunga, peqataaffigerusoqaarput tungitsinninngaanniit nunatta
minguitsuulluni avammut kiinnersinnaanerata nukittorsarnissaa. Tamanna
aqqutigalugu pilersinneqassappat.
Kisianni tamanna isaasalerlugu
pilersinniaannarlugu aningaasartuutit taama annertutigisut,
qaqinniarneqassappata taava pisariaqartutut isigaara unissaanissaq
eqqarsaqqeqqusinissaq. Tassami aningaasartuutit taama annertutigisut pilersinneqassappata,
uanga aamma tunginninngaanniit Josef Motzfeldtip oqaatigisaatulli aamma
takorloorakku. Taava tamatuma arlaatigut pilersitsissutaasinnaanissaa
aallaaviussasoq.
Tassa imaappoq tunisassiornikkut
inuutissarsiornikkut aningaasanillu isaatitsinikkut qaffassaataasumik
kinguneqartitsinissaa taanna pisariaqarluinnartutut nalilerakku. Taamaattumik
Qorlortorsuarmut atatillugu Ole Thorleifsen Siumuminngaanniit
eqqissisaataasinnaasumik oqaaseqaraluartoq, tassalu piareersimaffigalugu
nalilersueqqinnissaq tunngavissaqassappat.
Uani oqaatsit taakkua atorlugit
miloriussiumavunga isumaqarama tunngavissaqartoq nutaamik Qorlortorsuaq pillugu
naliliinissaq.
Tassami aamma isumaqarpunga Josef
Motzfeldip oqaatigisaani tassa, pisariaqalerpoq arlaatigut inuiaqatigiinninngaanniit
aningaasalersuutinik pilersitsissagutta, taava taakku piumasaqaaserlugit
ingerlatsisariaqaleratta.
Aatsaat taama iliorluta asuli
isumaliutissiilluataanngitsumik ingerlatsinerit qimakkiartussavagut.
Maanna allamik oqaaseqassanngilanga
taamaallaalli aamma pissangallunga eqqaasitsissutigissallugu Demokraatit
tungaaninngaanniit naalakkersuisunut allagaqarnikuugatta. Paasiumallugu
inuiaqatigiit sumut kalilernerlugit, tassa naalakkersuisooqatigiiliornermi
isumaqatigiissutit aallaavigalugit nalunnginnakku aningaasartuuterpassuarnik
taakkua naleqartussaasut.
Taamaattumik taakkua neriuppunga
piaartumik akineqarsinnaajumaartut. Aamma nassuerutigissavara akineqannginneri
peqqutigalugit akunnattuunganera siulittaasoqarfimmut ingerlannikuugakku. Tassanilu
kissaatigalugu saaffiginnissutit atorfissaqartinneqartut tassa uunga atatillugu
atorfissaqartinnikuugaluaratsigit taakkua ilaatigut akineqarnissaat, asuli
oqallissaarinissaq piumanagu.
Tamakkua piffissaq qinnutigineqartoq
ataqqillugu ingerlanneqarsinnaanngippata, tamannami ilaatigut
peqqutissaqavissinnaasarmat. Taava minnerpaatut pisariaqartutut isigalugu taava
ilisimatinneqalaartarnissaq piffissap kissaatigineqartup iluani,
akisinnaannginneq taanna peqquteqarmat nalunaarutigilaartarneqarnissaa taanna
Demokraatit tungaaninngaanniit anersaaruluutigaarput.
Qujanaq.
Jonathan Motzfeldt, ataatsimiinnermik aqutsisoq,
Inatsisartut Siulittaasuat, Siumut.
Tulliulluni oqaaseqassaaq Anthon
Frederiksen.
Ordførerip avataatigut oqaaseqarniartut
minutsini qulinik piffissaqarput.
Anthon Frederiksen, Kattusseqatigiit.
Siullermik naalakkersuisut
akissuteqaataannut qujavunga.
Aammalu pingaartumik Angallannermut
Naalakkersuisup, takornariaqarnermut sullisunermut attuumatillugu Ilulissat
kangerluanut, timmisartuussisarnermi helikopteri atorneqaranut tunngatillugu
periarfissanik misissuiniarnera assut nuannerpoq.
Tassami naluneqanngitsutut aamma
naatsorsueqqissaartarfimmi kisitsisit takutereerpaat, takornarissat
amerlanerpaangajaat Kalaallit Nunaannut tikittartut affangajai Ilulissat
kangerluannut takuniaasartut.
Taamaattumik tassaniippoq
inuutissarsiornermi takornariartitsinermi Kalaallit Nunatsinni tamarmut,
Ilulissanuinnaanngitsoq annertuumik sunniuteqariartortussaq. Minnerunngitsumik
Ilulissat kangerluata ukiuni makkunani nunarsuarmi nunanut eqqissisimatitanut,
allattorsimaffimmi ilanngunneratigut eqqarsaatigisariaqarparput
naatsorsuutigineqarmat takornariartitsineq allaat 40 % angullugu
qaffariarsinnaasoq.
Taamaattumik tassuuna sillimanissaq
assorujussuaq nunatsinnut tamarmi pingaaruteqarlunilu
Pissanganartussaavoq.
Aamma tassani suliniarnermi
eqqaamasariaqartut ilagivaat pilersaarutit assigiinngitsut, forvaltningsplani
taanna qiviarutsigu tassani takusinnaavarput timmisartunik angallassaneq aamma
ilanngullugu suliarineqareertoq.
Taamaattumik taakkua tamarmik
imminnut ataqatigiinnissaat naapertuunnissaallu aamma isumaqarpunga
eqqaasitsissutigineqartariaqartoq. Tassa timmisartut suluusallit mikisut Twin
Otterinik taaneqartartut atorneqassappata, aamma pissutsit
allarujussuussammata.
Taamaattumik taanna
eqqaasitsissutigilaaginnarusuppara.
Taavalu amminut tunngatillugu taanna
nuannerpoq aamma Atassutip oqaaseqartuata Tasiilaminngaanniit ammit
qassaannarlugit tunineqartalersimanerat iluatsittutut oqaatigimmagu. Tassami
nunatta sinnerani naluneqanngitsutuut amernik panertitsiniaasaartarnermi arnat
suliarujussuat annertooq, tassuuna annikillisinneqarlunilu iluaqutaalereermat
piniartoqarfinnut.
Pingaartumik maannakkut aamma Upernaviup
eqqaani misilittagaasut atorlugit ammit qassaannarlugit qeritillugit
tunineqartarlernerat assorujussuaq iluarisimaarneqartoq paasinarmat.
Taamaattumik ukioq mannamut
aningaasanut inatsisikkut tapiissutigineqartussat ammit tunineqarnerannit 30 millionit,
taakkua pitsaanerpaamik atorluarneqarsinnaanerat aammalu piniartunut
sunniuteqarluartumik atorluarneqarsinnaanerat innersuussutiginarpoq.
Qujanaq.
Jonathan Motzfeldt, ataatsimiinnermik aqutsisoq,
Inatsisartut Siulittaasuat, Siumut.
Aningaasaqarnermut Naalakkersuisoq.
Augusta Salling, Aningaasarsiornermut Naalakkersuisoq, Atassut.
Qujanaq.
Ja, siullermik oqaatigilaarlara
Josef Motzfeldtip oqaatigisaa, Aningaasaqarnermut Naalakkersuisutut isarussat
aaliangersimalluinnartut atorlugit nalilersuiniarnera, taanna oqaatigimmagu.
Kisianni uani akissuteqarninni
tunngavigivakka Inuit Ataqatigiinninnganniit apeqqutit assigiinngitsut
uparuartuutillu akiniarsaralugit akillugit. Taamatut oqaaseqarnera
erseqqissaatigilaassavara.
Imaanngilaq Inuit Ataqatigiiummata,
kisianni uparuartuutit apeqqutillu tassani toqqammaveqarlunga akisariaqarakkit.
Taama oqaaseqarfigivakka.
Taava Qorlortorsuarmut tunngatillugu
kallerup inniliorfik ilumut inuussutissarsiornermik kinguneqartumik,
kinguneqarsinnaasumik kallerup inniliorfiliornissat nukissiuutinik atuinissamut
tunngavissaqarnissat taakku pingaaruteqarnerat.
Taanna
assortorneqarsinnaanngilluinnarpoq inuussutissarsiornermik
ineriartortitsinissamut atorluarneqarsinnaanissaat taanna tunngaviusariaqarpoq.
Kisianni aamma avataaningaanniit orsussamik eqqussuineq taanna
annikinnerutinniarlugu ineriartortitsinissarput taanna
pingaaruteqarluinnaqqissaarpoq.
Taamaattumik soorunami uani aamma
aningaasartuutit annertussusaat tassani aammalu qanoq atorluarneqarsinnaanerani
imaluunniit inerititassanut sanilliullugu, qanoq isikkoqarnera tassani
soorunami nalilersuinermi peqataatinneqarluinnartariaqarpoq.
Uani eqqartorneqartut Qorlortorsuaq
taavalu aamma Motzfeldtip tasiani attuumassuteqartut, aningaasat
eqqartorneqartut assigiinngitsorujorujussuupput. Taamaattumillu tassani
inatsisartut aamma minnerunngitsumik nalilersueqataasariaqarput,
alloriarnissami tassani suna qinerneqassanersoq.
Naalakkersuisut
aningaasaliissutissanik pilersitsiniarnermi aamma matussutissanik peqareerlutik
aaqqiisarnissaat tassani aamma oqaatigineqarpoq. Taamatut naalakkersuisut
inatsisartunut piumasaqarnerminni aamma imminut qiviaqqaartariaqartut.
Ilaanarujussuaq
taamaalluinnartariaqarpoq soorunami. Siunertaraarput siunissami
aningaasartuutit aammalu isertitat imminut naapertuuttuunissaat. Taamaattumik
pingaaruteqarpoq tamatta aningaasanik tunngasunut atuinissamut
aaqqissuiniartartugut. Aamma tamanna eqqummaariffigilluinnassagipput.
Tamaani aningaasanik
isaatitsiniarnermi tunngavissat ilagilluinnarmassut inuussutissarsiutinik
siuarsaaniarneq. Siuarsaanissaq aamma maluginiarpara ujartorneqaqqittoq.
Naalakkersuisut taamatut massakkut uani aningaasanut inatsisissami
suliaareersut saniatigut, immikkut ersarissumik saqqummiussinnginnera
ujartorneqarmat.
Kisianni oqaatigisariaqarpara naak
siullermik oqaaseqarninni aamma tikikkaluarlugu.
Tassani
pingaaruteqarluinnaqqissaarpoq allangortiterinissatsinni soorunami aamma
tusarniagassat assigiinngitsut aamma. Aammalu aningaasartassaat soorunami
taakkua immunut oqimaaqatigiissinnissaat pingaaruteqarmat.
Taamaattumik suliniutissat
inuussutissarsiornermi ineriartortitsinissami taakkua siunnissat,
suliarineqassapput aamma ukiuni aggersuni piviusunngortinneqassapput. Tassami
inuussutissarsiorneq ilinniartitaanerlu tassa aningaasaqarnitsinni
toqqammavissatta pingaarnersaasut tamatta oqaatigisarparput.
Soorunami aningaasanik
piginngisatsinnik atuilluta ineriartortitsissagaluarutta tamanna nunatta
aningaasatigut aamma nakkaattorneranik kinguneqartussaavoq. Taamaattumik pingaaruteqarluinnaqqissaarpoq
tamanna ilanngullugu aamma inerisaaniarnermi tamanna ilanngullugu
alaatsinaanniarluaqqissaarnissaa.
Oqaaseqarninni eqqaavara 2000-imi
2002-mi aningaasartuutit nalinginik atuinissaq tunngavigalugu, aningaasanut
inatsisissaq suliarisimallutigu.
Naammassineqarnissaalu taanna
kissaatigalugu.
Tassani ilumoorpoq ukiuni aggersuni
aningaasanik annertuunik amigaateqalernissarput, imaluunniit ullumikkut
isertittakkagut amigaataalersussaasut aamma oqaaseqarnitsinni eqqaavarput.
Tassani oqaatigalugu ilaatigut
aktieselskabeninngaaniit isertittakkagut aammalu ilaatigut iluarsaassinermi
Danmarki naalagaaffianinnngaanniit pissarsiarisartakkagut, taakku
tigussaartussaavagut.
Kisianni uani oqaatigisariaqarpara
massakkut eqqartugarput taanna 2002-mi aningaasartuutaasimasut, amerlaqataanut
inissinnissamut siunniussarput aallaaveqarpoq. Ukiuni siuliini aningaasartuutit
qummuinnaq ingerlasimapput, massakkut unikaallatsinniarpagut. 2002-mi
aningaasartuutaasimasuninngaaniit amerlanerunngitsumik inissisimanissaat
siunertaralugu pilersaarusiorpugut.
Siunissamullu sillimmartaarnissamut
aamma suliniutit ukiunut tulliuttunut aaqqissuussassat aammalu soorunami
isertitatigut annertusaanissami, inuussutissarsiornerup qaffassarnissaa taanna
pingaarluinnartunut naalakkersuisut siunniussaannut ilaavoq.
Taamaattumik neriuppunga
paatsoorneqassanngitsoq taanna. Uani eqqartunngilarput ukiuni ungasinnerusuni
aningaasartuutigisartakkagut taamatut nikisinneqarnatik isertittakkatsinnut nikingassutaat
taama annikitsigiinnassasoq.
Ukiuni tulliuttuni
sinneqartoorutissatut missingersuutit massakkut overslags åreni
takuneqarsinnaapput qaffasinnerupput ukioq mannaminngaaniiit
naatsorsuutigisatsinnut.
Soorunami oqarsinnaanngilagut
ukiumut tullermut ilumut aningaasartuutit amerlanerulissanngitsut. Sulinikkut
taanna takussutissinneqassaaq.
Imaassinnaavoq
aningaasartuuteqarnerugallartariaqartugut. Isertitassat annertunerusut
piumallugit. Siunissami
isertitassat annertunerutikkumallugit. Taamaattumik aningaasanut inatsisissami
suliaqarnermi 2004-mi tunngatillugu suliaqarnermi tamakku ilanngullugit
soorunami oqimaalutaarneqartussammata.
Kisianni naalakkersuisuninngaaniit
pingaartilluinnarparput aningaasartuuteqarnerunissami aamma isertitaqarnerusinnaanerup
ilanngullugu alaatsinaalluinnarneqarnissaa taanna pingaartikkatsigu.
Qujanaq.
Jonathan Motzfeldt, ataatsimiinnermik aqutsisoq, Inatsisartut
Siulittaasuat, Siumut.
Taamaalilluni siullermeerneqarnera
oqaluuserisassap 2003 aningaasanut inatsisissatut naalakkersuisunut
siunnersuummut tunngasoq, oqaluuserineqarnera maannakkut naammassivoq
siullermeerneqarluni.
Taavalu Aningaasaqarnermut
Ataatsimiititaliamut maannakkut ingerlanneqartussaassaaq.